حكايات ملك ابراهيم ٢

رائف فضل قاعد قدام الشاشة الكبيرة حتى بعد ما صوت حنين سكت وبقى الأرشيف على الشاشة مجرد مشهد صامت لبنتين قاعدين وسط رفوف ملفات. ما كانش قادر يتحرك، ولا يفتح الريموت، ولا حتى يشيل عينيه من على البنت. كلماتها كانت لسه بتتردد في دماغه كأن حد بيعيدها له بصوت هادي. قام ببطء ووقف قدام الزجاج الكبير بتاع المكتب، وحط إيديه في جيوبه وبص على القاهرة اللي تحته. عشرين سنة وهو بيتعامل مع الناس على إنهم مصالح وأرقام وصفقات. اتعلم من أبوه إن الناس اللي بتبتسم لك أكتر من اللازم هما أكتر ناس بيستنوا وقعتك. كل الستات اللي عرفهم كانوا عايزين حاجة، حتى ميرهان نفسها، اللي كان فاكرها استثناء. وفجأة لقى نفسه بيسمع بنت صغيرة في بدروم شركته بتقول إنها عايزاه يكون كويس، وبس. رجع لمكتبه وضغط على زرار الاتصال الداخلي، وقال بصوت جاد: «أستاذة سلوى، كلميلي مديرة الموارد البشرية حالًا». بعد خمس دقايق كانت الأستاذة نادية واقفة قدامه بإيدين مرتعشة شوية، فاكرة إنه عايز يعاتبها أو يسألها عن حاجة تخص الأخبار. لكنه قال بنبرة عادية جدًا: «عايز ملف موظفة اسمها حنين، في قسم الأرشيف». نادية رمشت بعينيها بدهشة: «حنين؟ الأرشيف يا فندم؟» رائف: «أيوه. ممكن؟» نادية: «طبعًا يا فندم، حالًا». الملف وصل في دقايق. فتحه رائف وقرأ الصفحة الأولى بتركيز. حنين محمود، خمسة وعشرين سنة، خريجة كلية تجارة بتقدير جيد جدًا، متعينة من سنتين. ملاحظات المديرة المباشرة: «منضبطة، أمينة، لا تتأخر أبدًا، ولا تطلب إجازات، وتتحمل ضغط الشغل من غير شكوى». وفي آخر الصفحة، ورق تقييم سنوي كله درجات عالية، وعلى جنبه بخط صغير: «رفضت ترقية للقسم المالي بسبب ظروف أسرية». رائف قعد يبص على الصورة الصغيرة المثبتة في أول الملف. وش هادي وعيون واسعة وابتسامة خجولة جدًا. وش ما كانش يعرفه، ومع ذلك كان حاسس إنه شافه ألف مرة في الكاميرات من غير ما ياخد باله. قفل الملف وقال لنفسه بصوت هادي: «سنتين في شركتي، وعمري ما شفتها». وقف مرة واحدة، ولبس الجاكيت بتاعه وخرج من المكتب. سلوى كانت بتتكلم في التليفون، أول ما شافته خارج حطت السماعة بسرعة وقامت وقفت: «رائف بيه، حضرتك رايح فين؟ الاجتماع...» ملاحظة: ده كل النص المقروء من صفحات الملف، والصفحة الأخيرة فيها تكملة غير ظاهرة؛ النص متوقف عند كلمة «الاجتماع».رائف:”الاجتماع بعد ساعة. أنا نازل الأرشيف، عايز ملف مهم.” سلوى بصت له كأنها سمعت حاجة مش مفهومة: “حضرتك… تنزل الأرشيف بنفسك؟ طيب أنا أبعت حد يجيبه حالاً.” رائف:”لا. أنا عايز أنزل بنفسي.” قالها بحزم وخرج، وسلوى فضلت واقفة مكانها مش فاهمة حاجة. في الأسانسير كان فيه اتنين موظفين، أول ما دخل عليهم رائف وقفوا زي الجنود وبصوا قدامهم وما حدش فيهم يتنفس. وفي كل دور كان الأسانسير بيقف فيه ويفتح، الموظفين كانت بتبص عليه وتتجمد. كان واضح إن الخبر وصل لكل الشركة إن الباشا نازل البدروم بنفسه. في الأرشيف، كانت بسمة هي اللي سمعت الصوت الأول. صوت خطوات تقيلة بتقرب في الطرقة الطويلة اللي قدام القسم. رفعت راسها من على الملف اللي كانت بتصنفه وقالت وهي بتضحك: “ده أكيد عم محمد عامل الشاي وجايب لنا معاه الاخبار الجديدة والكلام اللي بيتقال فوق.” لكن الخطوات ما كانتش خطوات عم محمد. الباب اتفتح بهدوء، ووقف رائف الحريري. طويل، لابس بدلته الغامقة وفي عينيه نظرة تمسح المكان كله بسرعة. الملف اللي كان في إيد بسمة وقع على الأرض من غير ما تحس، وفمها اتفتح وما طلعش منه صوت. حنين كانت قاعدة قدام الجهاز بظهرها للباب، بتكتب اسم ملف على الكيبورد. شافت بسمة متجمدة فقالت من غير ما تلف: “في إيه يا بسمة؟ الملف وقع من ايدك؟” بسمة قالت بصوت مخنوق: “حنين… لفي.” حنين : “ليه؟” بسمة: “لفي بس.” حنين لفت الكرسي ببطء، وفي اللحظة دي حست إن قلبها وقف تماماً. رائف الحريري واقف على باب الأرشيف. مش في صورة، ولا على شاشة، ولا من بعيد في آخر طرقة. واقف بنفسه على بعد خمس خطوات منها، وبيبص عليها. قامت من على الكرسي من غير ما تحس، وإيديها اتخبطت في حرف المكتب ووقعت جنبها الأقلام. وقفت قدامه وصدرها بيطلع وينزل بسرعة، وكل الكلام اللي في الدنيا اختفى من دماغها. رائف دخل خطوة ثم خطوتين، وصوته طلع هادي وعميق: “صباح الخير.” بسمة ردت بسرعة وصوتها بيتهز: “صباح النور يا فندم.” لكن عيون رائف كانت على حنين وحدها. “أنا محتاج ملف قديم، عقود شراكة 2019 مع شركة التوريدات الشرقية. حد فيكم يعرف مكانه؟” حنين فتحت بقها وقالت بصوت ضعيف جداً: “أنا… أيوه… أنا… يعني…” ثم سكتت. رائف قرب أكتر، حتى بقى واقف قدامها بالظبط، وقال بنبرة ألين: “إنتي حنين، صح؟” الاسم خرج من بقه بصوته. صوته هو. حنين حست إن الأرض بتميل تحتها. اسمها اللي كانت بتسمعه كل يوم من كل الناس اللي تعرفهم ، بقى يطلع من فم الراجل اللي حبته سنتين وما حلمتش حتى إنه يعرف شكلها. حنين: “أيوه… أنا حنين يا فندم.” رائف: “كويس. قوليلي يا حنين، الملف اللي سألت عليه فين؟” حنين بلعت ريقها وحاولت تبص في الأرفف: “الملف ده… هو… في الرف التالت… لا لحظة… في الرف الخامس… أنا آسفة… أنا…” وشها كان بيحمر أكتر وأكتر مع كل كلمة، لحد ما بقى لونه أحمر زي الورد في عز الربيع. رائف لاحظ ده ورفع حاجبه باستغراب، وسألها بهدوء: “إنتي كويسة؟” حنين حاولت تهز راسها. حاولت تقول “كويسة”. لكن الصوت ما خرجش. الأرفف اللي وراه بدأت تلف قدام عينيها ببطء، والنور الأبيض بتاع اللمبات بقى بيتحول لبقع سودا بتتسع. آخر حاجة سمعتها كانت صوت بسمة بتصرخ: “حنين!” وبعدين وقعت. لكنها ما وقعتش على الأرض. رائف اتحرك بسرعة ما كانش يتوقعها هو نفسه، ومد دراعه وسحبها قبل ما راسها تلمس أرضية الأرشيف. جسمها خفيف وسقط في حضنه زي ورقة. شالها بين دراعاته بحرص، وحس بقلبها بيدق على صدره بسرعة. بسمة كانت واقفة بتبص على المشهد بعيون مفتوحة على آخرها، وإيديها على وشها: “يا نهار أبيض… رائف بيه الحريري.. شايل حنين!” رائف رفع عينيه لها وقال بصوت حاسم: “اعدلي الكرسي بتاعها ؟” بسمة: “أتفضل يا فندم… الكرسي ده.” مشى بخطوات هادية ناحية المكتب وقعدها على الكرسي برفق، وسند راسها على ضهر الكرسي بحرص كأنها حاجة قابلة للكسر. وبعدين لف ل بسمة وقال: “روحي هاتي مايه بسرعة.” بسمة جرت من الأرشيف وهي بتتعثر في خطواتها وبتكلم نفسها: “أنا بحلم… أنا أكيد بحلم.” رائف فضل واقف جنب الكرسي. نزل على ركبته قدامها وبص في وشها الشاحب. شاف رموشها الطويلة بتلمع عليها نقطة عرق صغيرة، وشاف إيدها اللي كانت متشبثة بحرف الكرسي حتى وهي فاقدة الوعي. مد إيده وحطها على خدها بحذر، وطبطب عليه بخفة: “آنسة حنين… آنسة حنين، سمعاني؟” ما ردتش. وقتها حس بخوف غريب كأنه لسه بيجرب الإحساس ده لأول مرة. “حنين.” قالها بصوت أوطى وأحن من قبل. “فوقي يا حنين.”جفونها اتحركت. ببطء شديد، فتحت عينيها. أول حاجة شافتها كانت وش قريب منها قوي، وش ما بتشوفه غير في أحلامها. عيون سودا عميقة وحواجب مقطبة بقلق وخطوط الوش اللي حافظاها من كتر ما بصت على صوره. ابتسمت ابتسامة صغيرة تايهة وهمست بصوت مبحوح: “أنا أكيد بحلم.” رائف رفع حاجبه، وخرجت منه نص ضحكة هادية، وقال بصوته المميز اللي كانت بتحفظ رنته: “مش حلم. إنتي كويسة؟” الصوت دخل ودنها حقيقي، ودافي، ومش جاي من حلم. حنين رمشت مرتين وبصت حواليها بسرعة. شافت الأرفف، والمكتب، والملفات الواقعة على الأرض، وبسمة مش موجودة. ورجعت تبص عليه، وشافته راكع على ركبته قدام كرسيها، بدلته الغالية على أرضية الأرشيف المتربة، وبيبص لها بقلق صادق. عرفت ساعتها إنه حقيقي. عينيها اتملت دموع من غير ما تقدر تمنعها، ونزلت على خدها بهدوء واحدة ورا التانية. حاولت تتكلم فخرج صوتها متحشرج، فهزت راسها بس، هزة صغيرة معناها “أنا كويسة”. رائف بص لها بذهول. كان قدامه واحدة وقعت من الإغماء لمجرد إنها شافته، وبتعيط وهي بتقول إنها كويسة. وللحظة سأل نفسه سؤال ما كانش متوقع يسأله لنفسه أبداً: “معقول؟ معقول تحبني للدرجة دي؟ مجري إني أبقى قدامها فتقع وتبكي كده؟” اللي سمعه في الكاميرات كان كلام. لكن اللي شافه دلوقتي كان أقوى من أي كلام. في عينيها ما كانش فيه طمع، ولا لعب، ولا حسابات. كان فيه حاجة صافية لدرجة ، حاجة عمره ما شافها عند ست قبل كده. بسمة رجعت وهي بتجري ومعاها كوباية مايه، وسلمتها له بإيد بتترعش. رائف مسكها وقرب الكوباية من حنين وقال بهدوء: “اشربي شوية.” حنين مسكت الكوباية بإيدين مرتعشة وشربت رشفة صغيرة، ووقتها لمست صوابعه صوابعها بالغلط. حسّت بكهربا خفيفة سابت رعشة في دراعها كله، وبعدت إيدها بسرعة. رائف لاحظ، ولاحظ إن خدودها اتورّدت من تاني. قام واقف ورتب جاكيت البدلة، وقال بنبرة رجعت رسمية: “خدي وقتك. لو لسه تعبانة ارتاحي . ولو عايزة إجازة النهارده، أنا هبلغ مديرة القسم.” حنين قالت بسرعة وبصوت متقطع: “لا… مفيش داعي يا فندم… أنا كويسة… آسفة جداً… أنا مش عارفة إيه اللي حصل.” رائف بص لها لحظة طويلة زيادة عن اللازم. بعدين قال: “ما تعتذريش.” وبص على بسمة وقال: “الملف اللي سألت عنه، سيبوه دلوقتي. أنا هبعت حد ياخده بعدين.” ولف وخرج من الأرشيف. كانت خطواته أبطأ من وقت ما دخل، وعقله مشغول تماماً. وهو في الأسانسير، بصّ على إيده اللي لمست خد حنين، وضمها في قبضته كأنه بيحاول يحتفظ بإحساس غريب ما عرفش يسميه. رواية الكاتبة ملك إبراهيم. في الأرشيف، بسمة قفلت الباب ورا رائف وسندت ضهرها عليه، وبصت على حنين بعيون مليانة ذهول: “حنين! إنتي عارفة إيه اللي حصل؟ ده شالك! رائف الحريري شالك بإيديه! شالك وقعدك على الكرسي بتاعك! وهو اللي فوقك بنفسه!” حنين كانت قاعدة ساكتة، إيديها على ركبها، وبتبص قدامها بنظرة تايهة: “إنتي… إنتي بتتكلمي بجد؟” بسمة: “بجد يا بنتي! أنا اللي كنت واقفة! ده ما سابش حتى الكوباية لحد غيره يمسكها لك. وبعدين… ده أول مرة في عمره ينزل الأرشيف! الشركة دي عمرها ما شافت رائف الحريري في البدروم. ليه نزل؟ إيه سبب؟ هو أصلاً مش محتاج ملف! ده عنده عشرين موظف يجيبوا له أي ملف في ثانيتين!” حنين حطت إيدها على صدرها وقالت بهمس: “أنا مش مصدقة. لمسني بإيده يا بسمة. حطها على خدي.” بسمة قربت منها وجلست قدامها. “بس إنتي سمعتي؟ هو سألك إنتي إسمك حنين صح؟ يعني عارف إسمك. يا ترى إزاي؟ ولأي سبب؟” حنين هزت راسها بعدم فهم، وهي لسه حاسة إن إيده على خدها حرارتها ما اختفتش. رواية الكاتبة ملك إبراهيم. بعد ساعة. اجتماع مجلس الإدارة كان في قاعة زجاجية ضخمة في الدور الأخير، وعلى الترابيزة الطويلة قعد تمانية رجال أعمال بوجوه تقيلة، منهم عمه الأكبر، ومنهم شركاء قدامى من أيام أبوه، ومنهم مستثمر أجنبي حضر عن طريق الفيديو. رائف قعد على رأس الترابيزة وقدامه ملف مفتوح لكنه ما كانش بيبص عليه. الأستاذ عادل، أقدم عضو في المجلس، فتح الكلام بنبرة حذرة: “يا رائف بيه، إنت عارف إننا كلنا بنحترمك ونقدّر شغلك. بس الحقيقة إن أسهم الشركة نزلت اتنين وتمانية في المية في ساعتين بس من فتح البورصة.” رائف رد بهدوء: “عارف.” “والمستثمر الأجنبي بيبلغنا إنه بيفكر يراجع حصته.” “ده طبيعي في موقف زي ده.” عمه الكبير قال بصوت أجش: “الموضوع مش مجرد فضيحة شخصية يا رائف. الصحافة بتقول إن رئيس مجلس إدارة شركة بحجمنا بقى ضحية في مشهد مهين. الناس بتتكلم عن قدرتك على إدارة الأزمات.” رائف اتعدل في قعدته وقال بصوت رزين: “أنا مش ضحية لأي حاجة يا عمي. اللي حصل اتفضّ وانتهى. وأي حد بيربط بين حياتي الشخصية وبين كفاءتي في الشغل، هو بيدور على حجة.” ثم دخلت السكرتيرة بملف جديد وقال: “فيه عرض وصل من شركة الصياد للاستثمار.” القاعة اتغير جوها في ثانية. رائف رفع عينيه ببطء وقال: “شركة مين؟” السكرتيرة: “شركة الصياد يا فندم. العرض بيطلب شراء خمسة عشر في المية من أسهم الشركة بسعر أعلى من سعر السوق الحالي، وبيقول إنه ‘دعم لاستقرار الشركة في المرحلة الحرجة’.” رائف ضحك ضحكة قصيرة باردة وقال: “أحمد الصياد بيعرض عليا مساعدة؟ بعد اللي حصل امبارح؟” الأستاذ عادل حاول يلطف: “يا رائف، ممكن نفصل بين اللي حصل وبين الصفقة. الرقم مغري، والسوق مضطرب.” “الرقم ده مصيدة يا أستاذ عادل.” قالها رائف بحزم. “أحمد الصياد مش بيعرض عشان يساعدني. هو بيعرض عشان يدخل شركتي من الباب بعد ما حاول يهدمها من الشباك. لو وافقنا، هيبقى له صوت في المجلس وهيستخدمه ضدنا خطوة خطوة. اللي بيننا مش مجرد منافسة. دي حرب.” فضل صمت تقيل في القاعة. وفي ثانية ما كانتش مقصودة، رائف رجع بخياله للأرشيف، لوش حنين الشاحب ودموعها الهادية. كلمتها بتتردد في ودنه: “أنا حبيته من غير ما أستنى حاجة.” وقتها حس إن كل الأرقام والصفقات اللي قدامه بقت أخف. قفل الملف وقال: “العرض مرفوض. وأي حد عايز يبيع نسبته.. انا هشتريها .” ووقف وقال: “الاجتماع انتهى” اتأكدوا انكم بتتابعوا الرواية من على صفحة “الكاتبة ملك إبراهيم malak Ibrahim ” لأن في صفحات بتسرق الرواية وتكملها بالذكاء الاصطناعي وبتكون أحداث مختلفه عن الرواية الأصلية. رواية الكاتبة ملك إبراهيم. في نص النهار. كان رائف رجع مكتبه بعد اجتماع تاني مع المستثمر الأجنبي، اجتماع قصير وحاسم نجح فيه إنه يشتري وقت أسبوعين بس عشان يصلح أوضاع الشركة بعد إللي حصل . قعد على كرسيه وفك رباط الرقبة وسند ضهره، وكان لسه ماسك الريموت في إيده لما سمع خبط عنيف على باب المكتب، وبعده صوت سلوى السكرتيرة وهي بتحاول توقف حد: “لو سمحتي يا فندم، الباشا مش عايز يقابل حد… لو سمحتي!” الباب اتفتح بدون استئذان. ميرهان شوكت دخلت المكتب بفستان أسود قصير ونضارة شمس كبيرة، وشعرها مفرود على كتافها بعناية كأنها داخلة حفلة مش مواجهة. نزعت النضارة ببطء وكشفت عن عينين حمرا ومنتفخة بشكل مبالغ فيه، وقالت بصوت مكسور: “رائف.” رائف ما اتحركش. رفع عينيه ليها ببطء، ونظرة واحدة منه خلت سلوى تفهم إنها لازم تنسحب وتقفل الباب، وقفلته. ساعتها بقيوا لوحدهم. ميرهان قربت من المكتب بخطوات مرتجفة ورمت شنطتها على الكرسي اللي قدامه وقعدت وهي بتمسح دمعة نازلة: “أنا جيتلك عشان مكنتش عارفة أروح فين. مش عارفة أتكلم مع مين. أهلي بيصرخوا عليا، والصحافة قدام البيت، وأنا… أنا محتاجة إنك تسمعني. بس تسمعني.” رائف سند إيديه على المكتب وقال بهدوء غريب: “اتفضلي. أنا سامعك.” الهدوء ده فاجأها. كانت متوقعة صراخ، كانت متحضرة للعتاب والخناقة، وكانت متأكدة إنها قادرة تلعب على أوتاره زي كل مرة. فبصت له لحظة وبعدين انهارت في البكاء بشكل درامي: “اللي حصل ده كله مؤامرة يا رائف! مؤامرة علينا إحنا الاتنين! أنا ما كنتش في وعيي. أحمد الصياد حط لي حاجة في العصير، أنا مش فاكرة حاجة من اللي حصلت بعد أول كاس. أنا صحيت لقيتك واقف قدامي وبتضرب فيه، ومش فاهمة أنا فين ولا ليه!” رائف ما ردش. عيونه كانت بتبص فعلاً ناحيتها، لكن مش عليها. كانت متثبتة على الشاشة الصغيرة اللي في ركن المكتب، شاشة الكاميرات اللي نسي يقفلها، وكانت لسه مفتوحة على قسم الأرشيف. شاف حنين قاعدة على مكتبها بتكتب حاجة بتركيز، وعلى خدها لسه أثر خفيف من الاحمرار، وكل شوية ترفع إيديها وتلمس خدها وتبتسم لنفسها ابتسامة صغيرة وتنزل عينيها بسرعة كأن حد ممكن يشوفها. ميرهان كملت بصوت أعلى وأكتر درامية: “أنا بحبك يا رائف! أنا عمري ما حبيت حد غيرك! كل اللي حصل غلطة، غلطة ما تستاهلش تهدم اللي بينا. إحنا بقالنا سنتين مع بعض، سنتين! إزاي تنسى كل ده في ليلة واحدة؟” “أيوه سنتين!” ميرهان قامت وقربت منه ومدت إيدها ناحية إيده على المكتب. “سنتين من الحب والذكريات…” رائف سحب إيده بهدوء قبل ما تلمسها، واحساسه كان غريب جداً. حاول يدور جواه على أي إحساس بيها، غضب، وجع، حب ، أي حاجة، ولقى مكان فاضي تماماً. كأن قدامه واحدة غريبة دخلت بالغلط مكتبه، واحدة يتعرف على ملامحها لكن ما يعرفش مين هي. وفي اللحظة دي لاحظ لأول مرة إن ضحكتها مصنوعة، وإن دموعها بتنزل من غير ما ترتجف شفايفها، وإن كل حركة بتعملها محسوبة كأنها بتتفرج على نفسها في المراية. قال بصوت ثابت: “خلصتي؟”ميرهان رمشت بعدم تصديق: “إنت ليه مش عايز تسمعني ؟” “سمعتك كويس. وكل كلمة قلتيها كانت أحسن كذبة سمعتها في حياتي، بس للأسف، أنا شفت بعيني. مفيش اي حاجة من اللي انتي قولتيها.. لا عصير ولا مؤامرة. شفتك قاعدة وراسك على كتفه وإنتي بتضحكي، واللي بيضحك كده ما بيبقاش مخدّر يا ميرهان.” وشها اتغير فجأة. الملامح الضعيفة اتبدلت بغضب مكتوم، وصوتها تغير للنبرة المتعالية اللي كانت بتستخدمها دايماً مع الموظفين: “يعني إنت مصمم؟ مصمم تتخلى عن واحدة زيي عشان غلطة؟ فاكر إنك هتلاقي أحسن مني؟ انت لو لفيت الدنيا مش هتلاقي زيي يا رائف!” “اللي زيك كتير جداً.” قالها رائف وهو بيقوم واقف، وطوله وقتها خلاها تحس بصغر حجمها. “وده بالظبط اللي كنت مش شايفه.” قرب منها خطوة واحدة، وصوته نزل لدرجة التحذير: “اسمعيني كويس. اللي بينا انتهى. مش عايز أشوفك في الشركة، ولا في بيتي، ولا في أي مكان أنا فيه. وأي كلمة تتقال عني من ناحيتك في الإعلام، أي لقاء، أي بوست، هتلاقيني أول واحد بيرد عليكي، وبطريقة ما تحبيهاش. أنا عمري ما أذيت واحدة ست، بس لو اضطريت أبدأ بيكي، مش هتردد.” ميرهان شهقت وراحت خطوة لورا. للمرة الأولى بتشوف في عينيه حاجة ما اتعودتش عليها، مش جرح ولا ألم، لكن برود قاتل. بصت له لحظة، وبعدين لمّت شنطتها بإيد بتترعش وقالت بصوت خافت وهي بتتجه للباب: “هتندم يا رائف.” رواية الكاتبة ملك إبراهيم. الباب اتقفل وراها بقوة. ميرهان وقفت في الطرقة ثواني وهي بتتنفس بصعوبة، وقدام عينيها كل حاجة اتبددت: القصر، والخاتم، واسم الحريري، والسنين اللي اشتغلتها عشان توصل لمكانها دلوقتي. كانت واثقة، من كل قلبها، إنها خسرته خسارة ما فيهاش رجوع. وجوه المكتب، رائف قعد على كرسيه ببطء، وبص على الشاشة الصغيرة تاني. شاف حنين وهي بتشتغل.. سند ضهره وهو بيبص عليها وبيتأملها. رواية الكاتبة ملك إبراهيم. في المساء. الفيلا كانت هادية لما رائف رجع. طلع على أوضته من غير ما يقول كلمة. رمى الجاكيت على الكنبة، وفك ساعته، وقعد على طرف السرير الواسع وفضل ساكت. الأوضة كانت كبيرة وفخمة، وعلى الكومودينو صورة قديمة له مع ميرهان في خطوبتهم. بصّ لها ثواني، وبعدين ببرود شديد قلبها على وشها ورجع وقعد. كان مستغرب نفسه. من إمبارح وهو بيتوقع إنه يتعب، يسهر، يشرب، يكسر حاجة، يعمل أي حاجة من اللي بيعملها الرجالة بعد الخيانة. لكن اللي حصل إنه ولا حس بحاجة. كأن ميرهان ما كانتش موجودة في حياته أصلاً، كأن السنتين دول حاجة قرأها في كتاب ونسيها. وده كان بيخوفه أكتر من الوجع نفسه.استلقى على ضهره وبص للسقف. وكل ما غمّض عينيه، كانت ملامح تانية بتتجسد في ضلمة جفونه. عيون واسعة بلون العسل بتبص له بذهول وخوف وفرحة في نفس اللحظة. دموع ساكتة بتنزل على خدود مورّدة. إيد صغيرة بتمسك حرف الكرسي بقوة كأنها بتتمسك بالحياة. وصوت رايق ضعيف بيهمس: “أنا أكيد بحلم.” إزاي حد يحب حد كده؟ إزاي حد يحب من بعيد من غير ما يستنى حاجة؟ هو عاش حياته كلها بيتعامل مع ناس بتاخد، وكل حد بيقرب منه عايز حاجة، فلوس، أو نفوذ، أو اسم. والبنت دي بالذات، من وراء كام دور، حبته في صمت وما طلبتش ولا كلمة. وهمس لنفسه في الضلمة: “حنين.” الاسم كان خفيف على لسانه، ودافي، وبيريّح صدره بشكل غريب. فضل يكرره في سره لحد ما النوم أخده أخيراً، وهو لأول مرة من سنين طويلة بينام وفي وشه شبح ابتسامة. رواية الكاتبة ملك إبراهيم. وفي بيت صغير في حي شعبي، كانت حنين نايمة على سريرها الضيق والمخدة في حضنها، وعينيها مفتوحة على السقف. كل حاجة اتكررت قدامها مرة واحدة. صوته وهو بينادي اسمها. إيده اللي لمست خدها. ريحة البرفان الغالي اللي دخلت أنفها لما شالها. عيونه السودا القريبة جداً منها، اللي كانت بتبص لها بقلق حقيقي. قلق على حنين، على حنين هي بالذات، مش على موظفة ولا أي موظفة. مدت إيدها ولمست خدها في المكان اللي لمسه بالظبط، وابتسمت في الضلمة ابتسامة طويلة وهادية وسعيدة. قلبها كان بيدق بسرعة لدرجة إنها حست إنه ممكن يخرج من مكانه . همست لنفسها: “أنا بحبك آوي يا رائف. ربنا يخليك ويسعدك.” وغطت وشها بالمخدة وضحكت ضحكة مكتومة زي البنات الصغيرين، وبعدين دموعها نزلت على المخدة. دموع فرحة. رواية الكاتبة ملك إبراهيم. صباح اليوم التالي. الصبح طلع بدري. وصل رائف الشركة قبل الساعة تمانية، وكان داخل بخطوات نشيطة وراسه مرفوعة وفي عينيه لمعة ما اتشافتش من كتير. الموظفين اللي كانوا جايين بدري على أمل يتفرجوا على الباشا المنهار، فضلوا واقفين مبهوتين. واحد منهم همس لزميله: “ده شكله مش متأثر خالص.” “يمكن ما كانش بيحبها من الأول.” رد التاني. “وإلا مكانش هيبقى بالشكل ده.” “أو يمكن دي طريقته في إنه يخبي

حكايات ملك ابراهيم ١

حكايات ملك ابراهيم ٣

مقالات ذات صلة

مهره الزين

ستر من السما اماني السيد

ودق القلب ل سهام صادق

قبل كل ليله يمارس الحب

اترك تعليقاً إلغاء الرد