من المكان دا قبل ما اعمل جريمة، وبالفعل مشيت وبعدت، مشيت حتى من المحافظة نفسها، روحت اسكندرية، كنت سايق بسرعة كبيرة جدا كأني بطلع غضبي في السواقة لحد ما وصلت، قعدت قدام البحر بفتكر كل اللي حصل، ازاي خدعوني بالشكل دا، ازاي كنت عايش وسطهم وانا مش داري ب حاجة، يا ترى نامت معاه كام مرة، لمسها كام مرة، طب كانت بتقول ل حسن نفس الكلام اللي كانت بتقوله ليا ولا لا، حاجات كتير توجع كانت بتيجي ف بالي، حاجات كانت بتموتني بالبطئ، حقيقي انا مش قادر اصدق….
يوسف مشي، مبقتش عارفة اعمل ايه، اروح فين طيب، مليش حد اروح عنده، مكنش في غيره هو، اتصلت بيه: انت فين.
= انا واقف جنب البيت، في حاجة ولا ايه؟
اخوك طلقني يا حسن.
= يا الف نهار ابيض، دا ايه الأخبار الحلوة دي.
انت فرحان انك خربت بيتي، انت السبب في كل دا اساسا.
= هو كدا كدا كان مخروب، هو أنتي كنتي عايشة اساسا يا اسماء، دا كان بيسيبك بالأسبوع ويسافر وتفضلي انتي قاعدة بين اربع حيطان، زعلانة من ايه بقا، انا اللي انقذتك منه يعني المفروض اقل حاجة تشكريني.
اشكرك على ايه، على اني مش لاقية مكان ابات فيه النهاردة ولا اني مش هعرف اصرف على نفسي و هشحت في الشوارع.
= وهو انا هسيبك ولا ايه، أنتي خلاص بقيتي بتاعتي، أنتي من دلوقتي مسؤولة مني واي حاجة تحتاجيها اطلبيها مني انا ومتقلقيش عندي ليكي مكان تباتي فيه.
= دا فين دا؟
شقة كنت مأجرها، بروحها لما أكون عايز اروق دماغي، هسبقك انا على هناك وهبعتلك العنوان في رسالة، متتأخريش عشان النهاردة هتبقا ليلة محصلتش زيها قبل كدا.
= يا واد هو دا وقته؟
دا احلى وقت، يلا بس تعالي بسرعة ومتتأخريش، مستنيكي يا قلبي.
مشيت من قدام البحر، كنت زهقت خلاص، روحت على اكتر مكان برتاح فيه، طلعت السلم وفتحت الباب، دخلت الشقة.
يوسف، انت ايه اللي جابك، حصل حاجة ولا ايه؟
قعدت على الكرسي باخد نفسي.
ايه اللي حصل يا حبيبي، دا انت لسة ماشي من عندي من كام ساعة.
قربت عليا وهي بتغمزلي: ايه لحقت اوحشك؟
= انا طلقت اسماء.
ومالك زعلان كدا ليه، يلا خليها تغور في داهية، المهم انك دلوقتي بتاعي انا لوحدي.
= مش وقته يا ريهام.
هي عملت ايه عشان تطلقها البت دي؟
= كانت بتخوني مع حسن اخويا.
نهار ابوها اسود، مع اخوك، دي معندهاش دم، خلي بالك انا كنت بحذرك منها وقولتلك مينفعش تسيبها كتير كدا وتسافر.
= و هو انا كنت بسيبها و اسافر ليه، ماهو عشانك أنتي.
يا حبيبي مانا قولتلك تاخدلي شقة في القاهرة بدل ما كل شوية تسافر وترجع تاني.
= و افرضي حد شافني معاكي يا ريهام، ايه اللي هيحصل ساعتها، وانا قايلك من الاول مش عايز حد يعرف اي حاجة عن جوازتنا.
طب خلاص يا حبيبي اهدى، وقولي انت عملت معاهم ايه؟
= المشكلة اني معملتش، مقدرتش اعملهم حاجة و دا اللي هيموتني.
طب اهدا، وليك عليا انا اللي هاخدلك حقك، و حياتك عندي ل هعرفهم هما الاتنين مقامهم كويس.
= هتعملي ايه يعني؟
انت دلوقتي طلقتها كلام بس، يعني مكنش في مأذون صح كدا؟
= صح و بعدين بقا.
هي ملهاش حد تروحله غير اخوك، لان زي ما انت قولتلي هي ملهاش اهل، يعني اول واحد هتفكر فيه هو اخوك.
= و افرضي دا صح، هنعمل ايه بقا؟
لا هنعمل كتير، من الاخر كدا يا يوسف احنا هنلبسها قضية زنا..
الحلقة الرابعة
من الاخر كدا يا يوسف احنا هنلبسها قضية زنا.
= لا طبعا انا مقدرش اعمل كدا، أنتي اتجننتي يا ريهام ولا ايه.
دا انا هبقا مجنونة فعلا لو سيبتك من غير ما تاخد حقك من البت دي.
= بس اخويا كدا هيتحبس معاها.
مالك خايف عليه كدا ليه، ما ترميهم هما الاتنين في الزبالة، هو دا أصلا يتقال عليه اخ.
= مهما عمل يا ريهام فهو في الاخر اخويا، ممكن ازعل منه، ممكن مكلموش طول العمر لكن أاذيه لا.
بس انت كدا مش هتأذيه، انت كدا هتربيه من اول وجديد، اسمع كلامي يا يوسف.
= وحتى لو سمعت كلامك انا برضو مش مستفاد حاجة، اخويا ومراتي في السجن.
بس متقولش مراتك.
= اللي كانت مراتي، و اخويا في السجن، انا امي ممكن تروح فيها لو دا حصل، امي روحها في حسن.
والله غريبة فعلا ومع ذلك حسن بيغير منك.
= انا مبقتش عارف اعمل ايه.
تسمع كلامي يا يوسف عشان هو دا الصح، لان انت لو معملتش كدا اكيد هما هيدورو على اي مصيبة عشان تلبسها انت.
= لا لا، لا يمكن يعملو كدا، زمانهم خايفين اصلا من اللي ممكن اعمله فيهم..
ولعت سيجارة وقعدت افكر في اللي جاي.
لقيتها اتعدلت و حضنتني: بتفكر في ايه يا حسن؟
= في يوسف، يوسف مش هيسكت يا اسماء، انا عارفه كويس.
طب ما تفتكرلنا حاجة عدلة احسن.
= لازم نبقا عاملين حسابنا على اي حاجة، منضمنش هو ممكن يعمل ايه.
مش هيعمل حاجة، هو طلقني خلاص يعني دي النهاية.
= نهاية ايه يا عبيطة، دي البداية، يوسف مش سهل، رغم طيبته دي بس هو مش سهل.
وتفتكر هو ممكن يعمل ايه؟
= مش عارف، بس كل اللي أنا اعرفه اننا مينفعش ننام كدا واحنا مطمنين، اكيد هتحصل حاجة. عندك حل؟
= انتي معاكي فلوس؟
ايوا معايا.
= كام مثلا؟
حوالي 10 الاف جنيه دا غير الدهب.
= حلو أوي. دا ناوي تعمل بيهم ايه؟
= هنأمن نفسنا.
ازاي؟
= يعني قبل ما يتغدا بينا، هنتعشا احنا بيه.
ضحكت على كلامه: انت قديم اوي يا حسن.
= صدقيني والله لو احنا معملناش كدا مش هنخلص منه.
مفتكرش ان يوسف يقدر يعمل حاجة، لو كان عايز يعمل حاجة كان عملها.
= دي مش طريقة يوسف، زمانه دلوقتي قاعد بيفكر هيعمل فينا ايه.
لا لا مفتكرش.
هاااا انت سرحت في ايه؟
= معاكي يا ريهام، كنتي بتقولي ايه؟
انت مش مركز معايا خالص يا يوسف، اوعا تكون لسة بتفكر فيها.
= لا طبعا افكر فيها ازاي يعني. المهم قبل اي حاجة، انا لازم ارجع القاهرة.
تاني يا ريهام، تاني الموضوع دا. افهم بس، انا لازم اكون جنبك، مينفعش ابقا انا قاعدة هنا ومش عارفة ايه اللي بيحصل عندك.
