قالها انا ونور خطوبتنا من واحنا اطفال واهلنا اللي قرروها، انا بحب نور كأخت مش كحبيبة، وكنت مستني الفرصة المناسبة عشان افسخ الخطوبة من غير ما اجرح حد، بس لما انتي ظهرتي مبقتش قادر استنى، تاليا كانت سامعة ومش مصدقة ودموعها نازلة، قالها انا فسخت خطوبتي من اسبوع بسببك، رحت للعميد وقلتله مش هقدر اكمل.
تاليا شهقت وقالتله بجد، قالها بجد، بس انتي اللي بعدتي، في اللحظة دي الباب خبط ودخلت نور خطيبته ومعاها العميد، العميد كان شكله غضبان جدا وقال لدكتور زين انت فاكر انك هتسيب بنتي عشان طالبة عندك، انت اتجننت، تاليا خافت جدا وحست انها السبب في مصيبة.
نور بقى فاجأت الكل، قالت لباباها يا بابا زين عنده حق، احنا منفعش لبعض واحنا الاتنين عارفين كده من زمان، انا بحب واحد تاني اصلا، بتحب كنان زميلنا في الجامعة الامريكية، وانا كنت خايفة اقولك، انا وزين اتفقنا نسيب بعض بهدوء، العميد اتصدم بس لما شاف صدقهم هدي شوية.
العميد بص لتاليا وقالها انتي بقى اللي خليتيه يعمل كده، تاليا كانت هتموت من الرعب، بس زين مسك ايدها قدام العميد وقالها ايوه هي، وانا بحبها وهتجوزها بعد ما تخلص دراسة لو وافقت، تاليا وشها احمر وبقت مش عارفة تودي وشها فين، نور ضحكت وقالت لها مبروك يا تاليا انتي كسبتي ارخم دكتور في الجامعة.
بعد الموقف ده الدنيا اتغيرت، العميد وافق بعد فترة لما شاف ان بنته مبسوطة مع كنان، وزين بقى يتعامل مع تاليا رسمي في الجامعة عشان كلام الناس، بس بعد المحاضرات كان بيستناها يتمشوا سوا، وهي نجحت في مادته بتقدير جيد جدا لانها ذاكرت بجد، مش عشان هو ساعدها، هو رفض يساعدها وقالها هتنجحي بمجهودك.
وفي اخر السنة عملها مفاجأة، اخدها لنفس المدرج اللي اتخانقوا فيه اول مرة، وكان مزينه ورد، وقالها هنا اول مرة شوفتك وانتي داخلة متأخرة وبتضحكي وقلت البنت دي هتتعبني، ومكنتش اعرف انها هتبقى حب عمري، تتجوزيني يا تاليا، تاليا قعدت تعيط من الفرحة وقالتله ايوه يا دكتوري يا حبيبي، لينا ونور وادم وزين وكنان كلهم كانوا مستخبيين وطلعوا يزغرطوا.
وتوتة توتة خلصت الحدوتة، تاليا اتعلمت ان العند مش دايما بينفع وان الحب بيجي في الوقت اللي مش عاملين حسابه، وزين اتعلم ان القسوة مش بتعلم حد وان احيانا طالبة عنيدة ممكن تغير حياته كلها.
وبعد اللي حصل في المكتب تاليا بقت حديث الكلية كلها، كل الناس بتتكلم عن البنت اللي خلت دكتور زين يفسخ خطوبته من بنت العميد، ناس بتقول انها ساحراله وناس بتقول انها لعبته صح، وتاليا مكنتش مهتمة بكلام حد، هي كانت كل اللي شاغلها زين وبس، بس زين كان قلقان عليها جدا، كان بيقولها استحملي يا تاليا فترة وهتعدي، الناس بتنسى بسرعة.
ادم صاحبهم كان دايما جنبهم، ادم ده كان ولد جدع اوي وكان بيحب تاليا من اول يوم بس لما عرف انها بتحب زين انسحب بهدوء وقالها انا هفضل اخوكي وصاحبك، وكان بيساعدها في المذاكرة لما زين يبقى مشغول، اما كنان حبيب نور الجديد فكان شاب امور وغني ومتربي، ونور كانت طايرة بيه، والصدفة ان كنان وزين بقوا صحاب جدا بعد ما كانوا هيبقوا ضراير.
لينا كانت هي العقل المدبر بتاع الشلة، كل ما تاليا تتهور تقولها اهدي يا مجنونة، مرة تاليا قررت تروح لبيت زين من غير ما تقوله عشان تعمله مفاجأة، لينا قالت لها يا متخلفة مينفعش تروحي لراجل بيته لوحده، بس تاليا صممت وراحت، لقيته قاعد بيذاكر وبيحضر محاضرات، واتكسف جدا لما شافها، قالها يا تاليا مينفعش كده، افرضي حد شافك، قالتله هو انت بتتكسف مني يا دكتور، قالها لا انا خايف عليكي من كلام الناس، انا راجل ومحدش هيقدر يكلمني بس انتي بنت.
تاليا فهمت قصده وحست انه بيحبها بجد وخايف عليها، فبقت تسمع كلامه، بقت مركزة في دراستها اكتر من الاول، اصلها كانت عايزة تثبت للكل انها مش داخلة الجامعة عشان تصاحب الدكتور، هي داخلة عشان تبقى حاجة كبيرة، وزين كان بيشجعها جدا، كان بيجيبلها كتب من برا وبيساعدها ازاي تفكر صح، وهي كانت بتحب قعدته وكلامه اللي كله خبرة وحنية في نفس الوقت.
في مرة كان عندهم حفلة كبيرة في الجامعة، وتاليا كانت هي اللي بتنظم الحفلة مع نور ولينا، وكانت لابسة فستان جميل اوي، وزين كان واقف بعيد بيتفرج عليها وهي بتضحك وبتجري هنا وهناك، نور راحتله وقالتله يا ابني روح قولها انها زي القمر بدل ما انت واقف زي العسكري كده، زين ضحك وقالها انا لو قربت منها دلوقتي هنسى اننا في جامعة، نور ضحكت وقالتله يا عم الحب بهدلك.
اخر اليوم بعد ما الحفلة خلصت زين استنى تاليا عند العربية بتاعتها وقالها كنتي زي القمر النهاردة، تاليا اتكسفت اوي وقالتله بجد يا دكتور، قالها بطلي دكتور دي بقى، قوليلي يا زين، قالتله مقدرش لسه متعودتش، انا بحب كلمة دكتوري حبيبي اكتر، هو ضحك وقالها ماشي يا ستي دكتوري حبيبي.
علاقتهم بقت اقوى كل يوم، بس كان لسه في مشكلة كبيرة، اهل تاليا، اهل تاليا ناس محافظة جدا ولما عرفوا انها بتحب دكتور اكبر منها بسبع سنين اتجننوا، باباها قالها مفيش حاجة اسمها حب في الجامعة، انتي رايحة تتعلمي مش تحبي، ومامتها قالت لها يا بنتي ده دكتور قد الدنيا هيبصلك انتي ليه، اكيد بيتسلى بيكي.
