
وبعد بضع دقائق كانت سيارة الإسعاف أمام فيلا العميري، ورجال الإسعاف يحملون جسد ندى على نقالة الإسعاف وأصحابها إلى المشفى.
جلست منى معها داخل عربة الإسعاف.
وذهب الجميع خلف سيارة الإسعاف بعربة إياد.
كان الجد جانب إياد بسيارته.
وسيارة محمود يقودها وأحمد جانبه، وفي الخلف عمرو وملك.
في المشفى بعد فحص ندى تبين أن عندها ذبحة صدرية بسبب تعرضها لضغط عصبي شديد، وتم نقلها العناية المركزة لتخضع للعلاج والراحة الطبية.
خارج العناية كانت العائلة تنتظر بقلق خروج الطبيب.
محمد: خير يا بني، بنتي مالها؟
الدكتور: اطمن يا والدي، هي هتفضل معانا يومين نطمن على صحتها.
وأوضح أنها اتعرضت لزعل جامد عشان كدة لازم راحة، هي عندها ذبحة صدرية بس اطمنوا، جت في الوقت المناسب وهي كويسة دلوقتي، بس ياريت تبعدوا عنها أي توتر أو زعل.
محمد: إن شاء الله، المهم تبقى بخير، أقدر أشوفها يا بني؟
الدكتور: آسف، دلوقتي ماينفعش، هي مش حاسة بحاجة دلوقتي، سيبوها ترتاح، ولما تفوق تبقى تطمن عليها، ألف سلامة عليها، بعد إذنكم.
محمد: الله يسلمك يا بني.
كانت قلقة، قررت الاتصال بالبيت فهي تشعر بالقلق والتوتر والخوف، أيضًا تحس بنبضات قلبها تتسارع وتشعر بالخوف من فقدان شيء.
حاولت الاتصال على هاتف المنزل، وبعد لحظات جاءها الرد.
رانسي: ألو، دادة سنية؟
سنية: رانسي، انتي فين يا بنتي؟ الكل قلقان عليكي.
رانسي: أنا كويسة، انتو كلكم كويسين؟
سنية: الست ندى تعبت ونقلناها المستشفى، كانت زعلانة عليكي، انتي فين يا بنتي؟ ارجعي عشان خاطر أمك، دي هتتجنن عليكي.
رانسي بقلق: ماما مالها يا دادة؟ في مستشفى إيه؟
سنية: تعبت من بعدك عنها يا بنتي، بس مش عارفة مستشفى إيه.
رانسي بحزن: طب مين عندك؟
سنية: علا هنا والست نجاة، لكن الكل في المستشفى.
رانسي: خلي علا تكلمني بسرعة يا دادة.
سنية: حاضر يا بنتي، أهي نازلة أهي، علا خدي كلمي رانسي.
علا بسرعة: رانسي، انتي كويسة؟ انتي فين؟
رانسي بدموع: ماما فين يا علا؟ في مستشفى إيه؟
علا: عمتي تعبت، وفي مستشفى، أنا رايحة لها دلوقتي.
رانسي: طيب أنا جايا حالًا، سلام.
علا: رانسي، انتي قفلت، دادة خدي بالك من مروان، أنا لازم أطمن على عمتي.
سنية: اطمني يا بنتي، والحمد لله إن رانسي بخير.
علا بحزن: الحمد لله.
بعد غلق الهاتف ظلت تبكي على مرض والدتها وتركت ورقة تخبر بها يحيى أنها تذهب إلى والدتها في المشفى لأنها مريضة.
أبدلت ملابسها بسرعة وتوجهت إلى طريق المشفى.
بعد دقائق كانت أمام المشفى، توجهت إلى الاستقبال لتبحث عن مكان والدتها وعلمت بوجودها بالعناية، صعدت في المصعد ووصلت مكان العناية.
كان الجميع يجلس أمام العناية للاطمئنان على حالة ندى، وتفاجأوا بوجودها.
أسرع إليها، لم يصدق عينه أنها أمامه الآن.
ضمها إياد بقوة، فهو افتقدها بشدة، يريد أن يتأكد من وجودها حقًا.
رانسي بدموع: ماما فين؟ عاوزة أشوفها.
إياد: انتي كويسة؟ كنتي فين؟
رانسي: آه كويسة، وأنا ماكنتش مسافرة، يعني ابعد، عاوزة أشوف ماما.
إياد بابتسامة: الحمد لله إنك بخير.
محمد: أمك بخير يا بنتي، أول لما تشوفك أكيد هتبقى أحسن، وهتروح معانا كمان، اطمني.
نظرت إلى الجميع ولم تتحدث.
محمود: كنتي فينا يا بنتي، كنا هنجنن عليكي.
رانسي: ممكن أدخل أطمن على ماما؟
إياد: تعالى يا حبيبتي، ادخلي أوضة التعقيم وادخلي العناية عند عمتي.
ذهبت معه وارتدت لبسًا خاصًا بالعناية.
وتوجهت إلى غرفة العناية.
وجدت والدتها مستلقية على الفراش ومحاطة بالأجهزة وإبرة تغرز بيدها لتعطيها التغذية.
وجهاز القلب يعطي صفيرًا بأنها مازالت على قيد الحياة.
قربت إليها تبكي ولمست يدها تقبلها.
رانسي بدموع: آسفة يا ماما، أنا السبب في تعبك، أنا مستعدة أعمل أي حاجة عشان تبعدي عني، كفاية عليا بابا، أرجوكي خليكي جنبي، سامحيني، البيت بالنسبة لي عامل زي المكان المغلق، بس هستحمل أي حاجة عشان تعبك وبعدك عني.
أحست والدتها بوجودها وسمعت صوتها.
ندى بتعب: حبيبتي.
ندى: انتي كويسة يا بنتي؟ وحشتيني، حقك عليا، أنا سامحيني، أنا مش ههتم بكلام الناس ولا بأي حد، أنا مش عايزة غير سعادتك، واللي انتي عايزة أنا هعمله، أنا اللي آسفة يا بنتي.
رانسي بدموع: بلاش كلام عشان ماتتعبيش.
ندى: أنا كويسة إني شوفتك، بس كنتي فين يا بنتي؟
رانسي: اطمني يا ماما، أنا كنت عند أبية يحيى، هو هنا هو ومراته، وأنا كنت عنده.
ندى: يحيى هنا؟ الحمد لله إنك بخير.
ندى: وأنا هنفذ كل اللي انتي تقولي عليه، ومش هسجنك تاني في بيت جدك يا حبيبتي، أنا ماليش غيرك يا حبيبتي، انتي أهم حد عندي في الدنيا، ومش هغصب عليكي حاجة تاني ولا هفرض عليكي أي قرار.
دخلت الممرضة: كفاية كدة، والدتك لازمها راحة.



