
والتانية… مجرد مرحلة.”
الجملة كانت ضربة مباشرة.
سها وشها شد… بس تماسكت بسرعة:
“خليكي فاكرة إن الورق ممكن يتقطع…”
فريدة قاطعتها بثقة قاتلة:
“بس الكرامة لما تتكسر… مش بترجع.”
ثانية صمت…
والاتنين بيبصوا لبعض…
نار في عيونهم… حرب واضحة.
وفجأة…
صوت جه من عند الباب:
“في إيه؟”
الاتنين لفّوا…
حكايات ملك إبراهيم
ياسين.
واقف… ملامحه هادية…
بس عينه بتقرأ كل حاجة.
بص لسها… وبعدين لفريدة…
“واضح إنكم اتعرفتوا بسرعة.”
سها رجعت لنبرتها الهادية: “كنت بس بطمن عليها.”
ياسين هز راسه… وبص لفريدة نظرة طويلة…
فيها شك… فيها فضول…
وفيها حاجة تانية…
“إنتي هتعملي إيه المرة دي؟”
أما فريدة؟
فوقفت بثبات… وبادلته نفس النظرة…
“المرة دي… أنا مش الضحية.”
—
الجزء السابع: جواز على ورق… وقلب مكسور
سها خرجت من الأوضة…
والباب اتقفل وراها بهدوء…
لكن الهدوء ده… كان كداب.
فريدة لفّت بسرعة ناحية ياسين… عينيها مليانة غضب:
“إنت اتجوزتني ليه؟!”
ياسين بص لها باستغراب: “إيه؟”
قربت منه خطوة… صوتها علي:
“وأنت مش بتحبني!”
الجملة خبطته…
مش عشان جديدة…
لكن عشان وجعت.
ياسين سكت… بص لها نظرة طويلة…
فيها ألف كلمة… بس ولا واحدة خرجت.
هو لسه بيحبها…
بس الجرح اللي سابته فيه زمان… لسه مفتوح.
“إنتي اللي مشيتي… إنتي اللي صدقتيهم…”
لكن بدل ما يقول ده…
لف ومشي ناحية الحمام.
فريدة اتصدمت: “أنا بكلمك!”
مفيش رد.
باب الحمام اتقفل.
وقفت مكانها… الغضب جواها بيزيد…
وأسئلة بتلف في دماغها…
“هو فعلاً مبقاش بيحبني؟
ولا أنا اللي ضيعت كل حاجة؟
وسها… كانت بتقول الحقيقة؟”
عدى وقت…
وهي واقفة… مستنياه.
لحد ما الباب اتفتح…
وياسين خرج… هادي كعادته… كأن مفيش حاجة حصلت.
فريدة قربت منه فورًا:
“أنا مش عايزة أكون مراتك.”
الصوت كان واضح… حاسم.
ياسين وقف… وبص لها ببطء…
ثواني صمت…
وبعدين قال بنبرة ثابتة:
“إنتي هتفضلي مراتي… لحد ما أموت.”
الكلمة كانت تقيلة… فيها سيطرة… وفيها وجع مستخبي.
وبعدين كمل وهو بيتحرك بعيد:
“ادخلي جهزي نفسك.”
فريدة عقدت حواجبها: “ليه؟”
رد بدون ما يبصلها:
“عشان الليلة… الناس كلها عارفة إننا اتجوزنا النهارده.”
فريدة فهمت قصده… واتصدمت:
“إنت أكيد بتهزر!”
لف لها… ونظراته بقت حادة شوية:
“أنا عمري ما بهزر في الحاجات دي.”
فريدة هزت راسها بعصبية:
“مستحيل… ده مش هيحصل.”
سكت لحظة… وبعدين قرب منها خطوة…
المسافة بينهم بقت صغيرة… والتوتر واضح في الهوا.
لكن صوته لما اتكلم… كان أهدى من المتوقع:
“براحتك.”
الجملة غريبة… مش متوقعة.
فريدة استغربت: “إيه؟”
ياسين كمل:
“أنا مش هغصبك على حاجة.”
ثواني صمت…
وبعدين قال وهو عينه في عينها:
“بس خليكي فاكرة…
إنتي اللي اختارتي ترجعي.”
الجملة خبطتها.
مش لأنه بيهددها…
لكن لأنه بيفكرها بالحقيقة.
هو ما جبرهاش…
هي اللي قالت “موافقة”.
ياسين بعد عنها… واتجه ناحية الشباك…
وسابها واقفة…
تايهة بين غضبها…
وكبريائها…
وقلبها اللي لسه مش فاهم هو حاسس بإيه.
أما هو؟
واقف… ضهره ليها…
وعينيه فيها صراع واضح…
“أنا رجعت عشان أنتقم…
بس ليه لسه قلبي بيضعف قدامها؟”
—
الجزء الثامن: لعبة الغيرة
عدّى أسبوع كامل…
القصر هادي… بشكل غريب…
مفيش صوت غير خطوات الخدم…
وفريدة…
مقفولة على نفسها في الأوضة.
لا بتخرج…
ولا بتتكلم…
ولا حتى بتهتم بشكلها…
كأنها بتعاقب نفسها… أو بتستخبى من حاجة جواها.
—
في مكتب ياسين…
كان قاعد ورا مكتبه… قدامه ملفات كتير…
وسها واقفة جنبه… ومحاسب الشركة قاعد قدامهم.
المحاسب قال بحماس: “الصفقة الجديدة هتخلّي الشركة تتصدر السوق… بس لازم حفلة كبيرة نعلن فيها النجاح.”
سها هزت راسها: “وأنا شايفة إننا نعملها في القصر هنا… تبقى حاجة مبهرة.”
ياسين كان ساكت… بيسمع…
لكن عقله مش معاهم.
“بقالها أسبوع… مشوفتهاش…”
وفجأة…
باب المكتب اتفتح بعنف.
الكل لفّ…
وفريدة دخلت.
وشها شاحب… عيونها مرهقة…
ملامحها متغيرة تمامًا…
ياسين أول ما شافها…
قلبه وجعه.
“هي عملت في نفسها كده ليه؟”
بس… رجع لجموده بسرعة.
فريدة بصت حواليها… وبعدين قالت مباشرة:
“عايزة أتكلم معاك.”
سها بصت لياسين…
وهو رد بهدوء:
“سيبونا.”
المحاسب قام فورًا وخرج…
وسها وقفت لحظة… بصت لفريدة بنظرة خفيفة… فيها تحدي…
وبعدين خرجت هي كمان.
الباب اتقفل…
وسكت المكان.
ياسين قام من ورا المكتب…
وقرب منها ببطء…
عينه بتتفحص وشها الشاحب…
وقال بنبرة فيها قلق مخفي:
“إيه اللي إنتي عملاه في نفسك ده؟
وشك مطفي… ودبلان كده ليه؟”
فريدة ضحكت بسخرية… ردت بعصبية:
“معلش… أصلي مش عايزة أحط مكياج…
زي العروسة اللعبة بتاعتك.”
ثانية صمت…
وياسين…
ضحك.
ضحكة خفيفة… مستفزة.
فريدة استغربت واتعصبت أكتر: “بتضحك على إيه؟!”
قرب منها خطوة… وعينه فيها لمعة خبيثة:
“واضح إنك مركزة مع سها أوي.”
فريدة ردت بسرعة: “أنا؟! لا خالص.”
ياسين مال شوية… صوته بقى أوطى:
“غيرة؟”
الكلمة خبطتها.
“إنت بتحلم.”
ياسين ابتسم… واضح إنه مستمتع:
“طب حلو… يبقى مفيش مشكلة إنها تبقى معايا في الحفلة.”
فريدة عقدت حواجبها: “حفلة إيه؟”
ياسين رجع يقف باعتدال: “حفلة كبيرة عشان أكبر مشروع للشركة…
وهي اللي منظمة كل حاجة.”
وبعدين كمل وهو مركز في رد فعلها:
“وطبعًا… هتبقى معايا طول الوقت.”
فريدة حاولت تبان عادية… بس نبرتها خانتها: “طبيعي… دي مديرة أعمالك.”
ياسين قرب أكتر… بص في عينيها مباشرة:
“بس مش بس كده… صح؟”
فريدة سكتت…
مش عارفة ترد.
ياسين همس بنبرة مستفزة:
“مش هي دي المشكلة اللي مضايقاكي؟”
فريدة رفعت راسها بعند: “المشكلة الوحيدة… إني اتجوزت واحد فاكر نفسه مركز الكون.”
ياسين ضحك تاني… بس المرة دي صوته أهدى:
“بس لسه بتبصيلي… كأني كل حاجة.”




