
عدا أسبوعين من غير ما أعرف عنها حاجة.
قلت أسيب كل حاجة للصدف، لحد فعلًا ما عرفت بالصدفة من واحدة قريبتي تبقى جارة نور إنها اشترت عجلة جديدة من فترة، وبتروح كل كام يوم تلف بيها في نادي قريب من بيتها، وأوقات بتنزل تلف بيها لوحدها.
كنت عارف إنها بتحب المغامرة، بس مش للدرجة دي.
الوقت بيغير فعلًا.
يومها روحت النادي ده وفضلت مستنيها لحد ما جت فعلًا بالعجلة، وأنا فضلت مراقبها من بعيد.
كانت بتسوقها بمهارة ولا كأنها متعودة تركبها من زمان.
اللي يشوفها كده ميشوفهاش وهي بالبالطو وبتشتغل بحزم في المستشفى.
ومع ذلك كنت مستمتع جدًا وأنا براقبها، كأني براقب بنتي وهي بتاخد كل خطوة جديدة في حياتها.
بعد شوية طلعت من النادي وأنا خرجت وراها.
كانت ماشية قدامي ماسكة العجلة وماشية جنبها، وأنا ماشي وراها ما بينا مسافة مش كبيرة أوي.
شوية ولقيتها بطأت سرعتها وقالت بصوت عالي شوية من غير ما تبص وراها:
- لما تحب تراقب حد، متمشيش وراه في شارع فاضي.. هتتكشف بسهولة.
ابتسمت وأنا مش عارف هي اللي لماحة ولا أنا اللي غبي.
قربت منها بهدوء ومشيت جنب العجلة وقلت:
- ما هو بردو مينفعش تمشي في شارع فاضي لوحدك.. مش العجلة البمبي دي اللي هتحميكي.
سكتت، فقلت:
- مبروك على العجلة.
- الله يبارك فيك.
- و.. مبروك على الماجستير.
بصتلي باستغراب فقلت:
- أنا كنت موجود.. مكنش ينفع أفوت يوم زي ده.
- اممم.. وأنا شوفتك.
- بجد؟
- آه بجد.. مش عارفة.. يمكن.. كنت بدور عليك.
ابتسمت وقلت:
- زي ما كنتي بتدوري عليا يوم الكافيه؟
بعدت نظرها عني ومتكلمتش، في الغالب اتكسفت.
- شكرًا على الحساب اللي دفعته، مع إن محدش طلب منك تعمل كده.
هي بتتلاعب بالكلام دلوقتي ولا أنا بيتهيألي؟
طيب.. وماله.
همست:
- شكرًا إنك ظهرتي قدامي اليوم ده.
ابتسمت ومردتش.
- مستني الدكتوراه.
- مظنش إنك هتكون موجود هنا عشان تحضرها.
- بس أنا مش راجع الأقصر تاني.
بصتلي باستفهام، فقولتلها وأنا باصص في عينيها:
- القاهرة وحشتني.. مش هقدر على بعدها أكتر من كده، ومهما لفيت مليش غيرها.
- اممم.. بس الأقصر جميلة بردو.. ما يمكن في يوم تحنلها وتحب ترجع لها.
- ما الحب إلا للحبيب الأول.
بصتلي باستغراب وابتسمت وبعدت نظرها عني، وطبعا هي تبتسم من هنا وأنا قلبي يرقص من هنا.
- طب مش ناوية تبعتي سلام لأم بطوط؟
- سلملي عليها وقولها تقول لابنها هو الشاي بلبن قصر معاه في حاجة.
- عمره والله عمره.
ضحكة رقيقة طلعت منها نسيتني عمري اللي فات كله.
قالت برقتها اللي وحشتني:
- ياريت ميكونش في مراقبات تانية.
- سيبي كل حاجة للصدف.
رفعت حاجبها وقالت:
- لما نشوف.
بصتلها بحب وأنا مبتسم براحة نفسية احتلتني من أول ما شوفتها في النادي.
بعدت نظرها عني بخجل وركبت عجلتها ومشيت بيها.
سرعتها مكانتش عالية، فقدرت أفضل ماشي وراها.
الليل محاوطنا، والبدر والنجوم مزينين السما.
جايز لسه في أمل.
جايز لسه في فرص تانية.
جايز الحكاية منتهتش.
الله أعلم.
بس طول ما إحنا لسه عايشين، يبقى لسه بإيدينا نمسح حكايات ونكتب مكانها حكايات جديدة.
أكيد مش هتخلو من الوجع، بس ساعات بتقف على شخص واحد.
شخص واحد قادر يغير حاجات كتير جوانا للأحسن، قادر يكمل الحاجة الناقصة، قادر يحيي اللي اتدفن جوانا من جديد، ونلاقي نفسنا القديمة معاه.
تمت.. ❤
شكرًا على تفاعلكو وتعليقاتكو القمر دي 😘❤
مستنية رأيكو في الكومنتات 🌸❤
“أول تجربة ليا، ممكن رأيكو في الكومنتات 😊❤”
