سميرة: نحن هنا يا أهل الدار!
بدر: أحم، يا جدتي بنت عمى طلعت حلوة بقا طالعالك يا جميل.
سميرة بضحك: يا واد يا بكاش! هطلع أخد شاور أنا عقبال متجهزوا الأكل.. أومال فين داليا؟
سميرة: زمانها جاية ما إنت عارف في الكلية بقا.
داليا أخت بدر، قد قمر في السن وفي كلية فنون جميلة، بشرتها سمرا طالعة لخالها وجسمها حلو وشعرها أسود وبتحب الرسم جداً. دخلت الكلية دي لأنها بتحب الرسم بس نفسيتها سودا. وصلت داليا القصر واستقبلتها جدتها وندهت على قمر.
سميرة: قمر، يا قمر!
قمر وهي نازلة على السلم: نعم يا جدتي.
سميرة: سلمي على داليا يا قمر أخت بدر. مدت إيدها قمر عشان تسلم على داليا، مسلمتش واكتفت بكلمة “إزيك” بس. أتضايقت قمر من التصرف دا. التفتت داليا لجدتها وقالت: “من امتى بنقعد الشحاتين عندنا يا ناني؟”. رمقت الجدة داليا بانزعاج: “قمر مش شحاتة، قمر بنت عمتك وليها في القصر والاملاك دي زيها زيك”.
داليا: يعني إيه ليها في القصر والاملاك؟ مين دي أصلا عشان تاخد من ورثنا من حضرتك؟
نزل بدر على صوت داليا:
بدر بحزم: في إيه يا داليا؟ صوتك عالي ليه؟
داليا: في إن جدتك عايزة تدي دي (وشاورت على قمر) من ورثنا!
بدر: اللي إنتي بتشاوري عليها دي بنت عمتك وإنتي متربتيش كويس يا داليا، اطلعي على أوضتك لو سمحتي. طلعت داليا أوضتها. وقف بدر قدام قمر اللي عيونها كانت مغرقة وشها: “أنا آسف يا قمر، داليا ممكن لسه متعرفكيش فعشان كدا متضايقة”.
قمر: ولا يهمك يا أبيه بدر، أنا مش هفضل هنا خلاص.
سميرة بتدخل: يعني إيه يا قمر؟ إنتي مش هتمشي من هنا يابنتي، دا بيت مامك.
قمر: بس أنا مش عايزة منكم حاجة ولا ورث ولا غيره، أنا جيت هنا أهرب من النار اللي كنت فيها.
سميرة: ولا يهمك ياحبيبتي، هعوضك عن كل حاجة.
بدر: إنتي تعليمك إيه يا قمر؟
قمر: أنا مخلصة ثانوية عامة علمي رياضة.
بدر: تمام، بكره هبعت ورقتك على الكلية اللي إنتي عايزة وتكملي تعليمك.
قمر بفرحة: بجد يا أبيه بدر؟
بدر: مقولنا بلاش أبيه دي يا ستتي! آه والله وبكره هتنزلي تشترى هدوم جديدة ليكى عشان الكلية.
قمر بفرحة شديدة: شكرا يا بدر جداً.
بدر بفرحة أنها قالت اسمه منغير أبيه: العفو يا قمر.
سميرة: طيب يا حبايبى اطلعوا انتوا ناموا والصباح رباح.
بدر وقمر: تصبحي على خير يا جدتي.
سميرة: وأنتم من أهل الخير.
على الجانب الآخر في الصعيد:
جعفر: إيه يا أبوي هنسيب لحمنا عند بدر وعائلة الفرماوي؟
عبد الرحيم: لا يا ولدي، الجاي هيبقى خراب على عائلة الفرماوي، وقمر هترجع والليلة وستكتب عليها.
جعفر بابتسامة شر: هتعمل إيه يا أبوي؟
عبد الرحيم: هتعرف يا ولدي.
في إسكندرية، في قصر بدر الفرماوي، صحي بدر ولبس بدلة شيك سودا ونازل على شركته.
بدر: صباح الخير يا جماعة. داليا وسميرة وقمر في صوت واحد: صباح النور.
بدر: داليا، صالحتي قمر؟ داليا بصت لقمر بغيظ: مش هصالح حد يا بدر.
بدر بحزم: وأنا قلت تعتذري!
داليا بغيظ لقمر: أنا آسفة، عن إذنكم.
قمر لبدر: مكنش لازم تعتذر، هي عندها حق أنا مش عايشة معاكم ومليش حق في حاجة هنا.
بدر بتفاهم: يا قمر إنتي بنت عمتنا يعني ليكى حق في ورث جدتك زي زينا لأنك حفيدتها برضه.
قمر بابتسامة: شكرا على وقفتكم جنبي.
بدر بهيام: العفو يا قمر، اسم على مسمى.
سميرة بحمحمة: أحم، نحن هنا ياحلوين. بدر وقمر ضحكوا.
سميرة: تدوم الضحكة. قام بدر: طيب عن إذنكم، رايح الشركة.
سميرة: مع السلامة ياحبيبي.
وكدا اتبقى بس سميرة وقمر في القصر.
في كلية فنون جميلة، داليا مع صاحبتها البنات: “بقولكم يا جماعة خلانى اعتذرلها”.
سارة: طب وإيه يعني يا داليا؟ البت واضح غلبانة.
داليا بغيظ: دي جاية تاخد ورثنا!
سارة: متبقيش طماعة يا داليا، جدتكم مش مخلياكم محتاجين حاجة، وأخوكى عنده أكبر شركة استيراد وتصدير في مصر والشرق الأوسط.
داليا بتفاخر: طبعا أخويا مفيش زيه، واللي هي برضه لهفت عقله من أول يوم.
سارة بتعب منها: طب عن إذنكم زهقت من الكلام معاكي يا داليا، مش هتتغيري.
منار: فكك منها دي طيوبة وعبيطة، أقولك أنا تطرديها إزاي وتجوزيني أخوكى!
داليا بشر: قوليلي واعتبري أخويا معاكي.
منار: سهلة يابنتي بس كدا.
داليا بشر: يخربيت علامة أخك يا منار! خلاص ماشي هعمل زي ما قولتي.
في القصر، رجعت داليا من الكلية وطلبت من الخدام يعملوا عصير فريش. خدت داليا العصير لقمر وخبطت.
قمر: ادخل.
داليا: إزيك يا قمر؟
قمر باستغراب: الحمد لله بخير.
داليا بخبث: خدي العصير دا ياحبي، أنا عملتهولك عشان أصالحك، أنا عرفت إنك كويسة خلاص.
قمر بحب: بجد شكرا قوي إنك فهمتيني وأنا والله مش عايزة حاجة من الورث ولا الفلوس.
داليا: طب خدي العصير. شربت قمر العصير وداخت! داليا بخبث: “كدا حلو قوي”.
على الجانب الآخر في الصعيد، جعفر: “إيه يا أبوي قولتيلي أصبر؟”.
عبد الرحيم: يلا يا ولدي بجهز اللي هيخلينا نجيب البت هنا.
جعفر: وإيه هو يا أبوي؟
عبد الرحيم بشر: هتعرف، يلا جهز العربيات لإسكندرية وخلي الرجالة معاك.
جعفر بشر: عنيا يا أبوي.
في إسكندرية، بدر رجع القصر. نزلت قمر وهي داخة ومش فاكرة حاجة، وداليا بتبصلها بخبث، وسميرة نزلوا على الغدا. قعدت قمر سرحانة. بدر بصلها: “قمر مش بتاكلي ليه؟”.
قمر: مفيش، دايخة شوية.
بدر بقلق: طب نوديكى لدكتور؟
قمر: لا لا شكرا، مفيش حاجة.
بدر: طب أنا عندي ليكى خبر سعيد.
قمر بصلته: إيه هو؟
بدر: تقدري تنزلي كليتك من بكره.
قمر بسعادة: بجد يا بدر؟!
بدر بفرحة من سعادتها: آه طبعا، مبروك.
قمر بفرحة: شكرا جدا يا بدر.
بدر بابتسامة: هتلاقي فوق شنطة هدوم جديدة ليكى لكليتك.
قمر بسعادة كبيرة: تمام هطلع أشوفهم. وداليا متابعاهم بنظرات غيظ، وسميرة فرحانة بأحفادها.
جعفر في الطريق: “فاضل ساعة ونوصل يا أبوي”.
عبد الرحيم: هانت يا قلب أبوك، هترجع معانا قمر والنهاردة وتكتب عليها.
جعفر بسعادة لأنه بيحب قمر من زمان: ماشي يا أبوي.
بعد ساعة، وصل الحاج عبد الرحيم وجعفر قصر بدر الفرماوي.
جعفر للحراس: قولوا لسيدكم جعفر بيه والحاج عبد الرحيم تحت.
بدر للحراس: خليهم يدخلوا. دخل جعفر وعبد الرحيم القصر ولقوا سميرة بتشرب قهوتها.
سميرة: نورت يا حج عبد الرحيم، اتفضل. قعد عبد الرحيم وجعفر مستنيين بدر. نزل بدر وبدلة سودا أنيقة وشعرا الساحر.
بدر: نورت يا حج عبد الرحيم، خير جايين ليه؟
عبد الرحيم: عايزين قمر يا ولدي والليلة، ويا ريت تيجي عشان كتب كتابها على ولد عمها النهاردة. بدر حط رجل على رجل: “عايزين تاخدوا مراتي؟”. عبد الرحيم وجعفر في صوت واحد: “مراتك إزاي؟!”. بدر وقف: “آه يا جماعة، والقسيمة أهي”.
جعفر بزعيق: مراتك كيف يعني البت لسه جاية عندكم إمبارح؟!
بدر بهدوء: زي ما سمعتوا، ومحدش هياخد مراتي، واتفضلوا منغير مطرود.
جعفر بزعيق وشر: مش هنمشى من هنا منغير قمر! وبدا ينادي على قمر. نزلت قمر على السلم شافها بدر: “اطلعي فوق يا قمر دلوقتي”.
جعفر بزعيق: لا متطلعيش، إنتي تعرفي بالجوازة دي يا بنت عمي؟
قمر باستغراب: جوازة إيه؟ مش فاهمة حاجة.
