_ يارب خليك معايا يارب .
تجلس فى محل عملها تداعب طفلها الصغير وتطعمه بعض الحلوى، لتجد من يقف أمامها دون أى أستئذان .
_ خطفتيه منى يا خطافة الرجالة.
أنقبــ,,ـــــض قلبها أثر صريخ التى أمامها فوقعت من يدها قطعة الحلوى الخاصة بالطفل فبدأ الطفل ايضاً بالبكاء على حلواه الملقاه على الأرض .
حملته سريعاً لتهدئه لكنه كان يأبى ذلك .
_ من فضلك وطى صوتك شوية الولد أتخض، وأحنا فى الشارع مايصحش اللى بتعمليه ده .
_ مش أنتى اللى تعرفينى إيه يصح وإيه مايصحش، حتة جاهلة زيك ولا تفهم حاجة فى الدنيا لا راحت ولا جات تاخد منى أنا، سمر شاهين، جوزها؟ أنا اللى كانت شركات كبيرة بتعملى ألف حساب وأنا اللى كان مقدمات برامج كبيرة بيتمنوا بس منى كلمة، واحدة زيك محدش يعرفها غير ابنها تاخد منى جوزى ؟
ردت سارة بهدوء عكس ما تحمله من غضب وحزن على حالها .
_كم من مشهور فى الأرض مجهول فى السماء .
_ لا والله، بلاش دور ست الشيخة اللى أنتى عايشاه ده ولمى جناحاتك اللى بتخبط فى السقف، لو مطلبتيش الطلاق من يزيد أنا هعرفك هعمل فيكي إيه، سامعه .
تجمع قليل من الناس خارج المحل، منهم من حزن على سارة وحالها ومنهم من لم يأبه لما يحدث ومنهم من تدخل فور سماع الصريخ .
_ فى إيه يا سارة؟ وانتى مالك يا سمر بتعملى فى البنت كده ليه ؟
_ وأنتى مين كمان علشان تدخلى كده ؟
قالتها سمر ثم وجهت حديثها ل سارة .
_ أنا قولت اللى عندى لو يزيد مجاش بيته وسط ولاده وقالى أنه طلقك يبقي أنتى اللى أختارتى.
خرجت سمر بعاصفة قوية متجهة نحو منزل والدها أما سارة ف جلست بيأس تحتضن ابنها الباكى وتبكى .
_ يلا يا جماعة خلاص خلصت، بعد إذنكم.
أنفض الجمع بحزن على ما أصاب جارتهم .
_ أهدى يا سارة وسيبك منها، كده كده يزيد لو عرف هيبهدلها .
_ أنا غلط يا أم عمر ؟
_ لا والله ما غلطتى ثم أنتى ما أخدتيهوش، أنتوا قربتوا لشهر متجوزين زاركم مرتين وكان هنا فى المحل ومشي بسرعة، هاتى الولد ده أهديه علشان طول ما هو شايفك كده مش هيسكت وأنتى أطلعى ريحى شويه وأنا هقفل المحل .
_ تمام .
صعدت سارة إلى شقتها لتحدث صورة زوجها الراحل ثم جلست لتناجى ربها وتطلب منه العون والرحمة وتصحيح الخطأ إن كان ما فعلته خاطىء .
فى مكان ما يتحدث يزيد مع شخص ما فى هاتفه .
_ تمام هنفذ اللى طلبته إن شاء الله ماتقلقش عليها.
_ ……
_ أيوا نفذت اللى قولتهولك وعارف أن اللى جاى صعب بس ربنا هييسر إن شاء الله.
_ …..
_ وأنت هترجع أمتى إن شاء الله.
_……
_ تمام، وأنا هستناك يا حبيبى .
ليغلق هاتفه مع المتحدث ويفكر فيما هو أت .
الفصل السادس ….
علم ماحدث لزوجته على يد زوجته الأخرى بعد أن حدثه أحد الجيران ف ترك عمله مسرعاً نحو الأخرى .
ظل يهاتفها لكنها لم ترد لإدراكها أنه علم بالأمر ف أخذت طفلتيها وذهبت مسرعة إلى منزل والدها .
وصل إلى منزل والد زوجته والغضب يملىء كيانه .
_ إيه اللى عملتيه ده ؟ إيه الفضايح اللى حصلت دى ؟
رد شاهين :
_أستهدى بالله يا باشمهندس بس، من حبها فيك وغيرتها عليك .
_ تقوم تلم الشارع على الست وتفضحها كده .
كانت فى غرفة والدتها ف خرجت ترد عليه ببرود كأن تلك العاصفة لا تعنيها .
_ طيب إهدى يا حبيبي، أنت مش عارف إنى بحبك وعارف أنى مش هقبل واحده تاخدك منى .
_ تقومى عامله فضيحة وتقلبي الدنيا عليها .
_ جرا إيه يا باشمهندس، هى الست السنيورة ملت دماغك ناحية سمر ولا إيه؟ ما الحاج قالك أن سمر غيرانه عليك.
نظر إلى والدة زوجته كأن ينقصه حديثها، فهو ووالدة زوجته لا يتفقان بتاتاً، سحب نفساً عميقه وزفره ببطىء يحاول تهدئة أعصابه كى لا تنفلت أكثر من ذلك .
_ معلم شاهين، أنا مش محتاج أبررلك أنا عملت كده ليه ولا أتجوزت مرات أخويا ليه مع أنك أكيد ممكن تكون فاهم، بس اللى هقوله إنى بلغت سمر وفهمتها الموضوع وقولتلها إن جوازى من سارة عمره ما هيأثر على جوازنا، وماهو إلا حفظ لابن أخويا وسند لمراته بس، تقوم هى عامله كل اللى عملته ده .
رمقها والدها بغضب ثم ألتفت إلى يزيد يحاول تهدئته.
_ عداك العيب يا باشمهندس، لكن معلش نديها العذر بس علشان بتحبك وغيرانه عليك وأنا عارف أنك راجل وقد كلمتك .
_ قد كلمته إيه يا بابا؟ أنا متأكده أن كان فى حاجة بينه وبين السوسة مرات أخوه .
كان يضغط على كف يده يحاول السيطرة على غضبه الذى يصل إلى ذروته .
_ سامع يا حاج ؟
_ بقولك إيه يا باشمهندس أنا بنتى ما يبقلهاش ضرة، وإلا …
صرخ المعلم شاهين بعد أن سمع حديث ابنته وزوجته ورأى حالة يزيد .
_ أخرسي بقي أنتى وبنتك وخدوا بعض وأدخلوا جوا .
_ مش داخله يا بابا، دا هو اللى غلطان، ولعلمه بقي أنا مش هرجعله غير لما يطلق الهانم .
_ معلم شاهين أنا همشي علشان ما تحصلش كارثة دلوقت، وعرف بنتك أنى لو رجعت فى ميعاد رجوعى البيت وملقتهاش يبقي كده هى بتخرب بيتها فعلاً، بعد إذنك .
بعد خروج يزيد من المنزل أقترب منها والدها وجذبها من شعرها.
_ أنتى عايزه إيه مش فاهم ؟ بعد ما لقيتلك راجل محترم ندارى فيه عملتك السودا ويتجوزك، راجل ماتحلميش بس أنه يفكر فيكي جايه تتنمردى عليه ؟
ظلت مهجة زوجة شاهين تحاول فك أصابعه الممسكة بشعر ابنتها التى تصرخ بألم .
_ يا حاج حرام عليك البنت.
_ حرمت عليها عيشتها، يكشي الكلمتين اللى كل شوية تقوليهم أنا كنت مديرة مش عارف إيه وسبت ده كله عشانه يريحوا قلبك، أنتى بتكدبى الكدبة وتصدقيها، أقسم بالله لو ما أتعدلتى ل هعمل فيكي اللى خوفت أعمله زمان .
قال جملته وألقاها على الأرض وخرج أيضاً من المنزل، لتظل تصرخ بألم مما حدث لها، دخل سعيد على صوتها الصارخ بصحبة زوجته دليلة .
