
الشباب كلهم ضحكوا بصوت عالي على رائد وشكلو، لأنه خجول ومش بيحب الكلام ده.
رامي بضحك: كده برضو يا رائد؟ تعرفهم اللي ما بينا.
وضحكوا تاني، رائد بضيق: كلمة كمان وحسبهالكم مخضرة.
رامي قال: خلاص يا جماعة. وشريف قال: يا جماعة متكسفوش. رائد قال كده: طب أنا ماشي. مسكوه رامي وهو بيضحك: خلاص والله خلاص.
على زاوية كانت واقفة دنيا مع عبير بنت عمها، أخت شريف. عبير بنت جميلة ومؤدبة، بس لسانها متبري منها شوية، وجريئة شويتين تلاتة.
عبير بمعاكسة: بس إيه ده يا وحش؟ مش تحني علينا وتخفي جمال بقى.
دنيا بضحك: بس يا بت أنتي، أنا بقلق منك.
وفضلوا البنات يضحكوا، ودنيا كانت كل شوية تبص على رامي اللي كان برضو بيبص عليها، لحد ما لقتو جاي عليهم.
رامي: هاي يا بنات.
عبير: هاي ورحمة الله وبركاتو.
رامي بضحك: أنتي لسه زي ما أنتي مجنونة.
عبير: أنا زي ما أنا، بس أنت اللي قلبت على توم كروز كده وبقيت مز في نفسك، إيه يا عم؟ ده هو اللي يسافر يحلو كده؟
رامي ضحك بصوتو كله وقال: والله مجنونة.
عبير مامتها ندهت عليها، جريت تشوفها وسابت رامي ودنيا واقفين سوا.
رامي: هو حد قالك إنك تسحري قبل كده؟
دنيا بكسوف: آه، أنت لسه الصبح قلتلي كده.
رامي: تؤ، في الصبح كنتي جميلة، إنما دلوقتي. قرب جدًا على ودنها ووشوشها.
بعد شوية وبص عليها لقاها حتموت من الكسوف.
واحد من صحاب شريف: إيه يا شبح؟ أنت حتسيبه يلهفها منك ولا إيه؟
شريف مستنهوش يكمل كلامه واتقدم ناحيتهم بغضب.
وقف قدام رامي وقالو: إيه يا وحش؟ مش حتيجي ولا إيه؟ دا حتى الشباب بيسألو عليك.
رامي: احم، أيون، أنا حروح الحمام وجاي على طول. امسكي يا دنيا، خلي الزجاجة دي معاكي.
دنيا بصت للزجاجة باستغراب وقالتلو: ماشي.
وسابهم ودخل الحمام وخرج، وفضلوا يرقصوا ويهزروا ويضحكوا. رامي معاه قزازة صغيرة دايمًا في جيبه بيطلعها كل شوية يشرب منها ويدخلها تاني. رائد خد بالو وقال:
إيه يا رامي حكاية الشرب دي؟ وإيه القزازة اللي معاك دي يا بني؟ حرام عليك صحتك.
رامي شرب شويه وقال: دي يا سيدي مبتسكرنيش، بس تقدر تقول بقت عادة بشربها حتى على الريق وفي الشغل عادي، متعود عليها، وبعدين دي مستوردة، أنا وجاي جبت اللي يكفيني منها، خفت ملقاهاش هنا.
رائد: وتشرب ليه أساسًا؟ أنت شاب ما شاء الله كامل مكمل، تشرب ليه وتضر صحتك؟
رامي كان حيرد، قاطعو شريف اللي قال بخبث: يا بني ده بيشربها من تمن سنين، ميقدرش يبطلها، بيشرب من ساعة يا عيني ما قتل مامتو.
رامي مسك شريف من رقبته بغضب أعمى وقال: أنت قولت إيه؟ ها؟ قولت إيه؟
رامي مسك شريف من رقبتو بيخنقو وبيقول: أنت قولت إيه؟ ها؟ قولت إيه؟
رائد بخوف وهو بيبعد رامي عن شريف وبيقول: سيبو يا رامي، كفاية، حيموت في إيدك.
دنيا وعبير كانوا مع سعاد هانم، مامت شريف، بيضحكوا لحد ما سمعوا الدوشة وصوت رائد.
طلعوا جري لبرا، لقوا رامي ماسك رقبة شريف وشريف وشو احمر وشبه بيطلع في الروح.
كامل أبو شريف جري عليهم وزعق: رامي، سيب ابن عمك، عايز تموتو يعني؟
رامي ساب شريف بنرفزة وعصبية وقال: أنا ماشي.
شريف فضل يكح وأدولو ميه وهو بيقول: وأنا قولت إيه يعني؟ لدا كلو محدش بيقبل الحقيقة.
رامي كان رجع تاني يضربو، بس رائد مسكو: كفاية كده علشان خاطري أنا يا رامي.
شريف باستفزاز: خلاص يا أخويا، متدايقش أوي كده، مكانتش كلمة يغني، دي اللي حتمشي علشانها.
رامي بغضب: حل عني، ملكش دعوة بيا، ماشي يعني ماشي.
شريف: طب أنت مش معاك عربية، استنى حوصلك.
هنا سعاد مامت شريف شدت دنيا على جنب وقالت: روحي أنتي يا دنيا يا حبيبتي وصليه علشان ميتخانقوش تاني.
دنيا بصت لرامي لقتو بيزعق مع شريف، بلعت ريقها بخوف وقالت: أنا… أنا أوصلو يا طنط.
سعاد: أيوه يا حبيبتي، رائد جيه مع شريف ومش معاه عربيتو، وشريف مش حينفع يوصلو، اديكي شايفة.
دنيا اتنهدت وقالت: حاضر يا طنط.
راحت ناحية رامي سمعتو بيقول: حطلب أوبر، ولو حا مشي على رجلي للبيت، مش حتوصلني يا شريف، إيه رأيك بقى؟
شريف لسه حيتكلم، قاطعتو دنيا وقالت: رامي جيه معايا وحيروح معايا، خلاص يا شريف، أنا حوصلو.
شريف: بس.
سعاد: مبسش يا شريف، عدو ليلتكم على خير.
دنيا ورامي طلعوا من غير كلام وركبوا عربية دنيا ومشيوا.
في الطريق رامي كان زعلان جدًا وباين الحزن في عينه، مكانش بيتكلم وباصص من الشباك وساكت.
دنيا حبت تخرجو من اللي هو فيه وقالت: متزعلش من شريف، ده دبش ومش بينقي كلامو، بس قلبو أبيض والله.
رامي بصلها بابتسامة بسيطة وقال: بتحبيه يا دنيا؟
دنيا اتوترت وقالت: احم، أكيد طبعًا، مش ابن عمي؟ وأنت كمان بحبك، امم، بحبكو كلكو يعني.
رامي ضحك ضحكة خفيفة وشرب شويه من الزجاجة اللي في إيده وقال: اممم، بتتهربي، أنتي عارفة أنا قصدي إيه، وهروبك ده ملوش غير تفسير واحد.
دنيا: اللي هو إيه؟
رامي: اللي هو إنك مبتحبهوش، بس أنا نفسي بجد أعرف وافقتي عليه ليه، بعد ما كنتي رافضة، وتتجوزي ليه أصلًا وأنتي صغيرة كده؟ حتي كنتي كملي دراستك الأول.
دنيا: بص، هو بابا نفسو قوي أتجوز، وشريف اتحايل عليا كتير، فقلت أريحهم ووافق، أنا أصلًا مش حخسر حاجة.
رامي شرب شويه وقال: هه، مش حتخسري حاجة؟ أنتي هبلة يا بنتي، دي حياتك كلها، إزاي مش حتخسري؟
دنيا: بابا تعب معايا كتير، وهو مبسوط جدًا بجوازي، فليه أقول لا على حاجة حتبسطو أوي؟ وشريف كمان مش وحش.
رامي: وأنتي حتبقي مبسوطة؟



