قصص وروايات

رواية عشق من قلب الألم كاملة بقلم زهرة الربيع

اتقدم رامي وقف جمبها وقال بابتسامة تسحر: هو الجمال ده أصلي ولا صنع في الصين؟

دنيا بصت ليه بقرف ورجعت عيونها تبص على الطيارة.

رامي استغرب إنها معبرتهوش، قالها:

رامي بابتسامة: بتدوري على حد؟

دنيا بملل: لا إله إلا الله، وأنت مالك؟ نطع أنت، أما شيء بارد يا أخينا.

رامي بزهول بيتمتم مع نفسه: نطع بارد أنا؟

وقال لنفسه: معقول معرفتنيش؟ ابتسم لنفيه، وحتعرفني إزاي؟ دي كانت طفلة لما سافرت من تسع سنين، وأنت كمان اتغيرت، حتعرفك إزاي؟

رامي: احم، بعيدًا عن الدبش اللي بترميه، بس أنا قولت يمكن أقدر أساعد.

بصتلو وابتسمت بتأفف وغيظ: وحتساعدني إزاي بقى؟ اطربني.

رامي مش قادر يمسك نفسه من الضحك على شكلها: يعني لو تقوليلي بتدوري على مين يمكن أقدر أساعدك.

دنيا سرحت ونسيت نفسها، اتنهدت وقالت: بدور على ابن عمي من زمان مشفتهوش، وأكيد شكله اتغير، نفسي أشوفه أوي. فاقت لنفسها وقالت بعصبية: وأنت مالك أصلًا وأنا بحكيلك ليه أصلًا؟

رامي: امممم، طب مش يمكن نزل وأنتي مشفتيهوش أو معرفتهوش؟

دنيا بنفاد صبر: يا رب صبرني على الغباء، طب أنا معرفتوش، هو بقى يا ذكي مشافش اسمو اللي على اليافطة ده؟ مش تشغل مخك ده بدل ما يركن منك.

رامي برق بعنيه: يركن؟ احم، ما علينا، يمكن يكون شافو.

دنيا: مستحيل برضو، لأنو لو شافو كان زمانو جيه يتكلم معايا، وكان زمانو مكانككك.

وهنا دنيا برقت بعينيها وعضة على شفتها لما اكتشفت أخيرًا غباءها، وإن هو ده ابن عمها اللي مستنياه.

بلعت ريقها بتوتر وقالت: احم، هو، هو، إن أنت رامي؟

رامي ماسك ضحكته بالعافية، ابتسم وقال: أيوه، رامي النطع البارد، وإيه قولتي إيه كمان؟ آه، مبيفهمش ودماغي راكنة.

دنيا بضحكة خفيفة: لا لا طبعًا، أنا مقلتش كده، يا خبر، دانت قمر والله، نورت مصر يا رامي.

رامي بغرور: من ناحية إني قمر، عارف.

دنيا: يا سلام على التواضع.

رامي بضحكة عالية: بس حفضل طول عمري افتكر الاستقبال العظيم ده.

دنيا بحرج: خلاص بقى، ميبقاش قلبك أسود، أنا حعوضك وحعزمك تشرب معايا قهوة، إيه رأيك؟

رامي: وأنا موافق، بس مش حنتأخر على عمي.

ركبوا العربية وطلعوا بيها وهي بتقول:

دنيا: لا مش حنطول، علشان أنا أصلًا غيرانة منك، عمك من ساعة ما قولت إنك جاي وهو حيطير من الفرحة، وأنا بصراحة مش متعودة يحب حد غيري.

رامي بضحكة خفيفة: عمي ده حبيبي، بس الظاهر كده إني ححبو أكتر. وغمزلها.

دنيا عارفة إنو بيهزر، بس كلمتو كسفتها موت، رجعت شعرها ورا ودنها بكسوف ووشها احمر.

رامي بابتسامة: إيه ده يا بنتي؟ أنتي لسه بتحمري زي ما أنتي.

دنيا بتغير الموضوع: آه وصلنا خلاص، الكافيه ده بيقدم أطعم وأحلى قهوة حتدوقها في حياتك.

رامي قال بصوت مش واضح: والله مظنش بعد حلاوتك أشوف حاجة حلوة.

دنيا بتركيز بتقول: حاجة؟

رامي فاق لنفسه: أنا؟ لا أبدًا.

دنيا: امم، طب يلا نشرب القهوة.

فضلوا يتكلموا ويهزروا، ودنيا كانت مبسوطة وبتضحك من قلبها، ورامي كمان فرحان جدًا وكل شوية يسرح في جمالها، وفضلوا كلام وضحك لحد ما وصلوا القصر.

عمه كان في القصر كل شوية يبص للساعة ومستني على نار لحد ما وصلوا.

وأول ما دخلوا اتقدم رامي على عمه اللي كان شبه جري عليه وفضل كتير بحب شديد.

دنيا: احم، احم، نحن هنا، أنا كده حعيط.

رامي بضحك: فرحة ولا غيره؟

دنيا: غيره طبعًا.

مروان بتنهيدة: ياااه، أخيرًا. يا رامي، أخيرًا يا بني، تسع سنين مشوفكش يا رامي، هنت عليك يا بني.

رامي باس إيد عمه بحب: غصب عني والله يا عمي، أنت عارف ظروف شغلي كانت عاملة إزاي، بس خلاص الفرع اللي هنا بقى شغلو كويس ونقلت أغلب الشغل حتابعو من هنا، وكل فترة أسافر بقى لو فيه حاجة، يلا ابسط يا عم.

مروان: الحمد لله يا بني، ربنا أكرمك، أنت تستاهل يا رامي. يبقى خلاص دنيا حتتجوز وتسبني، وأنت تفضل معايا هنا، ها، قلت إيه؟

رامي: أفضل معاك أوكي، بس هنا لا يا عم، أنت عارف أنا مشتاق لشقتنا قد إيه.

مروان: طيب يا بني، اللي يريحك، نتغدى وتريح عندنا شوية، وتبقى تروح تاخد راحتك في شقتك.

دنيا: آه، على فكرة يا رامي، أنكل كمال وشريف عاملين حفلة جميلة على شرف استقبالك، حعدي عليك بالليل آخذك ونروح، دول عازمين كل صحابنا بتوع الدراسة.

رامي باستغراب: الحفلة دي ليا أنا؟ امم، غريبة.

دنيا: إيه الغريب في كده؟

رامي: لا أبدًا، بس من امتى الحب ده كلو يعني؟

مروان: يا بني انسى القديم، احنا عيلة، وعمك ومراته بيحبوك، وأكيد وحشتهم.

رامي: آه طبعًا يا عمي، وأكيد حروح.

دنيا: يلا بقى، الغدا جهز، وأنا حموت من الجوع.

بالليل كانت دنيا جهزت، لبست فستان يجنن عليها وبقت قمر كالعادة، بسيطة وجميلة جدًا.

نزلت دنيا بسرعة وهي بتقول: أنا جهزة يا بابا، متأكد إنك مش جاي معايا؟ تعالى والله حتنبسط.

مروان: لا يا حبيبتي، روحي أنتي وانبسطي.

دنيا راحت شقة رامي وهي بتخبط، فتح رامي وهو بيقول: أنا جاهز على معاد.

وسكت لما رفع عينه وشافها، كانت حورية تجنن، كل شيء فيها يسحر.

قال بلا وعي: إيه ده؟ يخربيتك.

دنيا بقلق: إيه فيا حاجة غلط؟

رامي بهيام: كلك على بعضك غلط على البشرية، الجمال ده غلط على الكوكب كلو.

دنيا اتكسفت وقالت: بطل غلبة ويلا بينا.

ركبوا العربية وراحوا الحفلة، سلموا على الكل، ورامي حضن عمه ومرات عمه اللي باين عليها عدم الرضا.

في الحفلة كان رامي قاعد مع شريف وصحابه من أيام الثانوية، ورائد صاحبه الأنتيم. رائد شاب من سن رامي، بس طباعو مختلفة تمامًا، هادي وطيب لأبعد الحدود، خجول ووسيم جدًا. رائد منقطعش عن رامي حتى بعد ما سافر، كان كل يوم بيكلمه.

رائد بطيبة: مع إني كل يوم بشوفك، ومع ذلك واحشني لدرجة إني مش مصدق إني شايفك قدامي.

واحد من صحابهم اسمه أحمد: كل يوم بتشوفو؟ اللي هو إزاي بقى؟

رائد بطيبة: أصل احنا كل يوم بنتكلم صوت وصورة على الموبايل.

شريف: هو احنا اللي اسمنا عيلتو عمره ما كلمنا صوت وصورة؟ وقال بخبث: ولا أنتم فيه حاجة خصوصي ما بينكم؟ وغمز.

رائد بضيق: بس يا شريف، بلاش هزار بايخ.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى