
“متخافيش.. أنا جنبك.”
زهرة بخوف واندفاع:
“فارس مش هيسكت لو شافنا سوا! أصلاً هما فاكرين اللي بشتغل عنده راجل كبير مش شاب زيك…”
ضحك يونس بتلقائية، وزهرة حست وقتها باللي قالته فاتكسفت وبصت بعيد بخجل، بس انتبهت لصوت يونس من جديد:
“متقلقيش أنا هتصرف في الموضوع ده يا زهرة.. انتي بس اضحكي.”
حركت زهرة راسها بتلقائية واتنهدت براحة نسبية بعد كلام يونس ليها، وسكتت وهي بتتمنى إن اليوم يعدي بسرعة.
كانت فاتحة نبيلة الباب وبتسلم على زهرة بحرارة، وزهرة كمان كانت فرحانة أوي إنها شافت مرات أبوها لحد ما انتبهت لياسر أبوها اللي خارج من أوضته، فجريت عليه بلهفة وسلمت عليه وهو كمان.
ووقتها نبيلة أخدت بالها من يونس فبصتله باستغراب وهي بتقوله:
“لمؤاخذة يا ابني مخدناش بالنا، اتفضل اقعد.”
سلم يونس على ياسر أبو زهرة وعرّفه بنفسه وهو بيقوله:
“أهلاً بحضرتك يا عمي، أنا أبقى يونس الشيمي صاحب الشغل اللي الآنسة زهرة فيه.”
ياسر كشر واتكلم باندفاع:
“أهلاً بيك يا ابني، بس اسمحلي يعني.. إزاي زهرة قالتلي إن صاحب الشغل راجل كبير وإنها هتقعد تراعي ولاده؟! مش كده يا زهرة؟”
زهرة اتكلمت بلهفة وهي بتقرب من أبوها:
“أيوه يا بابا أنا كنت فاكرة كده، بس طلع الأستاذ يونس يعني هو صاحب الشغل، بس شخص محترم خالص يا بابا!”
ياسر بتردد وهو بيبص ليونس:
“شاب محترم على عيني ورأسي، بس الأصول محدش يزعل منها يا ابني متؤخذنيش!”
رد يونس بهدوء على ياسر خلاه بدأ يهدا:
“أكيد طبعاً يا عمي، بس الفكرة إني مش عايش لوحدي زي ما حضرتك فاكر.. أنا عايش مع دادة رسمية ودي اللي مربياني، ده غير العاملين وكمان الأولاد يعني مش لوحدينا.”
هدي ياسر شوية واتكلم بهدوء وهو بيشاور ليونس:
“كلام على راسي يا ابني، بس الأصول بتقول إن مفيش بنت تشتغل عند واحد عازب وتعيش معاه، عشان كده كل حي يروح لحاله والشغل بنتي مستغنية عنه.”
زهرة اتصدمت وزعلت وبصت ليونس اللي طمنها بعينيه وبص لياسر وقاله بجدية:
“طيب إيه رأيك لما زهرة تعيش معايا بصفتها مراتي؟! أنا بطلب منك إيديها يا عم ياسر وأتمنى توافق.”
اتصدمت زهرة وتنحت وهي باصة ليونس اللي كان ملاحظ تأثير الخبر عليها وكتم ضحكته وبص لياسر اللي ابتسم بفرحة:
“طبعاً إذا كان كده ماشي! ده يوم المنى، يوم ما أفرح ببنتي.. بس الرأي الأول والأخير لـ…”
فارس من وراهم بغضب بعد ما سمع كل حاجة:
“ليا أنا يا بابا! الرأي الأخير ليا ولا خلاص مبقاش ليا لازمة?!”
زهرة خافت وبصت ليونس بسرعة وخوف، فكمل ياسر باستغراب:
“أنت رأيك مهم طبعاً يا فارس يا ابني، بس زهرة هي اللي هتتجوز والرأي رأيها.”
فارس بغموض وهو بيبص ليونس:
“ممكن اعرف بقى من إمتى جه موضوع الجواز ده فجأة كده؟! ده أنت لحد من خمس دقائق كنت بتقول إنها بتشتغل عندك!”
يونس بجدية وهو بيبص لفارس بتقييم:
“متقولش إني مستحملتش إنها تبعد عني وأن مشاعري غلبتني واتأكدت إني بحبها، وعشان كده طلبت إيديها دلوقتي.. ها إيه رأيك يا عم ياسر؟”
فارس باندفاع وهو بيقرب من زهرة:
“متأسفين يا أستاذ يونس، بس زهرة مخطوبة ليا وهنتجوز.. ولا إيه يا زهرتي؟”
زهرة اتصدمت وبصت لفارس بصدمة وهي مش مستوعبة اللي هو قاله! ويونس كان بينقل عينيه بينهم وبقول بجدية:
“بس أنا يهمني أسمع منها هي الكلام ده يا أستاذ فارس.. انتي رأيك إيه في الكلام ده يا زهرة؟”
زهرة بصت ليونس بحيرة وحزن، وهي عارفة إنه طلب إيديها عشان ميسيبهاش هنا، بس كفاية إنها هتبقى مراته وإنها فهمت مشاعرها صح وإنها حبته.
بس عينيها راحت لنبيلة اللي كانت فرحانة بطلب فارس وإنه عاوز يتجوزها ومش رافض زي الأول، وكانت بتترجاها بعينيها إنها توافق عليه. وهنا انتبهت لصوت فارس اللي اتكلم بسخرية:
“أعتقد السكوت علامة الرضا ولا إيه؟ متقلقش هنبقى نعزمك على الفرح!”
يونس كان سامع كلام فارس وعيونه متركزة على زهرة، وكان عنده أمل إنها ترفضه وتجري عليه هو..
ياسر بحنية وهو بيبص لزهرة بتشجيع:
“قولي يا زهرة يا بنتي واللي انتي عاوزاه أنا هعملهولك، بس انتي قرري.”
زهرة غمضت عينها بتعب من كثر الضغط اللي هي فيه، وفجأة استسلمت للإغماء من التعب! ووقتها يونس قلبه اتقبض وجري عليها بلهفة، بس كان سبقه فارس وشالها هو بخوف.. ويونس وقتها قبض على إيديه جامد وبعدين انسحب بهدوء.
فتحت زهرة عينها بتعب وشوية واستوعبت هي فين وأخر حاجة حصلت إيه، فاتكلمت بلهفة:
“يونس فين؟! فين يونس?!”
طبطبت نبيلة على ضهر زهرة وقالتلها بشفقة:
“يونس مشي يا زهرة.. خلاص يا بنتي انسيه بقى! أديكي شوفتي فارس الحمد لله رجع لعقله إزاي!”
زهرة كشرت بغضب وقامت وهي بترد بانفعال:
“انتي بتقولي إيه؟! يعني إيه أنسى يونس وعشان مين؟! فارس ابنك اللي مبيعملش أي حاجة غير إنه بيجرحني بكلامه.. فارس أنا محيته من حياتي أول ما قال كده.. عمري ما هضعف ولا أكمل في علاقة مش بعمل حاجة غير إنها تكسرني وتقلل مني! انتي عارفة يونس ده عمل عشاني إيه وهو ميعرفنيش؟! يونس حسسني إني إنسانة يا ماما نبيلة، خلاني بتصرفاته مش بس أحبه، لا أعشقه كمان! لو بتحبيني بجد متجبرنيش أكمل في العلاقة دي.. خليني أعيش مع الإنسان اللي اختاره قلبي وعقلي!”
ابتسمت نبيلة بحب وحركت راسها برضا، وفي نفس الوقت كان واقف فارس على الباب وسمع كل اللي قالته زهرة قبل ما يفتح الباب ويدخل. ووقتها اتأكد إن زهرة خلاص راحت منه بسبب غبائه وتصرفاته، فدخل وعلى وشه ابتسامة مكسورة.
زهرة كشرت أول ما شافته، وقبل ما تتكلم سبقها هو وقالها بحزن:
“أنا عارف وسمعت كل اللي قولتيه، وعندك حق يا زهرة ومش هقدر ألومك؛ لأني أنا السبب في إنك تضيعي مني.. للأسف أنا عرفت قيمتك بس متأخر أوي. تقدري ترتاحي شوية وأنا بنفسي هاخدك ليونس.”
ابتسمت زهرة بفرحة وقامت وهي بتقول بتلقائية:
“لا، أنا بقيت كويسة.. لو سمحت يا فارس وديني ليونس، وأنت إن شاء الله تلاقي البنت اللي بتحلم بيها.”
ابتسم فارس بكسرة ومن جواه بيتمنى لو يرجع بيه الزمن وميقولش اللي قاله لزهرة.
كان رايح جاي يونس بغضب في مكتبه، كان بيلوم نفسه إنه مشي.. كان بيقول لنفسه إنه مكنش سابها بالبساطة دي. هو اتأكد دلوقتي إنه حبها، مش بس حبها.. ده عشقها! بس للأسف راحت من إيديه بمنتهى البساطة.
انتبه يونس لخبط الباب وصوت رسمية اللي دخلت وقالتله بابتسامة:
“يونس.. هتفضل قاعد لوحدك يا حبيبي؟ أنا مرضيتش أضغط عليك ولا أكلمك في حاجة بس قلقت، فقولت أجي أسألك.”
يونس بحزن الدنيا كله في صوته:
“خلاص يا دادة.. زهرة مش هتيجي تاني، هتتجوز.”
كشرت رسمية باستغراب وبعدين فهمت حاجة فقالتله بخبث:
“وأنت بقى زعلان عشان هي مش هتيجي تاني، ولا عشان هتتجوز؟!”
يونس باندفاع وهو بيبص بعيد بغضب:
“عشان مقدرتش أمنعها! مقدرتش أعترفلها بأني حبيتها فعلاً يا دادة رسمية.. أنا بجد مش متخيل إني كان ممكن أحب في يوم من الأيام، وحبيت زهرة بكل جوارحي!”
ابتسمت رسمية بتلقائية وردت بجدية مصطنعة وهي بتشاور ليونس:
“طب ومستني إيه؟! ما تقولها الكلام ده بنفسك!”
استغرب يونس ولف وشه، وقبل ما يتكلم اتفاجئ بزهرة واقفة جنب رسمية وسمعت كلامه عنها، وعلى وشها ابتسامة جميلة وقلبها اللي كان بيدق بسرعة من فرحته باللي سمعته!
يونس بصدمة وهو بيقرب بلهفة من زهرة:
“زهرة! انتي جيتي هنا إزاي وليه و…؟”
زهرة باندفاع:
“عشان بحبك يا يونس! وعشان أنا مش هقدر أعيش بعيد عنك.. واوعى تفتكر سكوتی هناك كان ضعف ولا حيرة، اختيارك كان شيء مفروغ منه، أنا بس خوفت على ماما نبيلة وبابا.. لكن لو رجع بيا الزمن هختارك ألف مرة يا يونس!”
ابتسمت زهرة بتلقائية بطريقة جميلة وهي بتقوله بتوهان:
“بحبك يا يونس.. وانتي أول حب وآخر حب في حياتي.”
زهرة بتلقائية وهي بتبص ليونس:
“طب وأم أولادك يا يونس؟ كنت بتحبها أكيد برضه، مش كده؟ صدقني مش هزعل.”
ضحك يونس بصوت عالي ورد بهيام وهو بيهمس بتلقائية:
“ما هو أنا مقولتلكيش إن آدم وحوا يبقوا أولاد أخويا يا زهرة، وهما توفوا في حادثة وسابوهم ليا وأنا اللي بربيهم لأنهم خلاص بقوا أولادي.. صدقتيني بقى لما قولتلك إنك أول حب وآخر حب يا زهرتي؟”
ابتسمت زهرة بتلقائية، وده كان أقوى رد منها على كلام يونس اللي دخل قلبها من غير استئذان، وهو من جواه أسعد راجل في الكون كله.
(تمت)
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




