
رائف لف ببطء ناحية عم حنين وبص في عينيه مباشرة، وقال بصوت قوي وثابت: “مفيش فضيحة. لأن أنا بطلب منك إيد حنين دلوقتي.”
كل الأصوات في الغرفة وقفت.
عم حنين رمش مرتين. “إنت… إيه؟”
رائف بثبات: “بطلب إيد بنت أخوك على سنة الله ورسوله. دلوقتي. في الدقيقة دي.”
رائف كمل بنفس النبرة. “ولو انت موافق، هنكتب الكتاب حالاً. وأنا هعلن قدام الدنيا كلها إنها مراتي، وهدافع عنها بروحي. وأي حد هيقول عليها كلمة، هيقولها على مرات رائف الحريري.”
حنين سمعت الجملة وحست إن الدنيا بتلف بيها. حطت إيدها على صدرها وهي مش قادرة تتنفس. بسمة وقفت قدام الباب وفمها مفتوح، وعينيها بتجري بين رائف وحنين و أبوها.
عم حنين كان واقف متجمد. عمره ما تخيل إن بنت أخوها يجيلها عرض زواج زي ده. راجل زي رائف ، من عيلة كبيرة ، غني وصاحب شركة كبيرة بالملايين ، يطلب إيد بنت أخوه؟ بنت أخوه اللي ما عندهاش من الدنيا غير الشهادة اللي بتشتغل بيها موظفه في شركته.
عم حنين “إنت… إنت بتتكلم جد؟”
رائف بصدق: “يشرفني اطلب أيد بنت أخوك.. وأنا مش بطلب حاجة غير إنك توافق. المهر والشبكة وكل حاجة هتكون زي ما تحب وزيادة. وصدقني حنين هتبقى في بيت يحترمها وفي حماية اسمي.”
عم حنين وقف ثواني بيبص لرائف وبعدين لحنين. حنين كانت واقفة بتترعش، ودموعها لسه على خدودها. شافها بعيون عمها إللي بيحبها فعلاً، بنت أخوه اللي اتيتمت صغيرة وتحمّل مسؤوليتها كل السنين. وجواه حاجة اتغيرت. مش مجرد خوف من الفضيحة. خوف عليها هي. قال بصوت متحشرج: “موافق. بس… بس لازم تحافظ عليها. لازم تصونها يا ابني. دي أمانة أخويا الله يرحمه.”
“أنا هصونها بحياتي.” رائف قالها من غير تردد.
حنين فضلت واقفة مكانها كأنها حجر. الكلمات بتتردد في ودنها: مراتي. زوجتي. هي، حنين محمود، موظفة الأرشيف، هتبقى مرات رائف الحريري؟ هو ده حلم؟ ولا لسه مغمى عليها في الأرشيف؟
لكن في وسط الدوامة دي، جت فكرة تانية. فكرة هادية وباردة ووجعتها. هو مش بيتجوزها عشان بيحبها. هو بيتجوزها عشان الفضيحة. عشان يلم الأخبار. عشان ينقذ سمعته وسمعتها. جوازة تنقذ الموقف.
كسرت قلبها الفكرة. لكنها ما قالتش حاجة. ابتسمت ابتسامة صغيرة حزينة، ومسحت دمعة تانية، وفضلت واقفة.
رواية الكاتبة ملك إبراهيم.
اتأكدوا إنكم بتتابعوا الرواية من على صفحة الكاتبة ملك إبراهيم malak Ibrahim لأن في صفحات بتسرق الرواية وتكملها بالذكاء الاصطناعي وبتكون أحداث مختلفه عن الرواية الأصلية.
رائف أخرج موبايله بسرعة وكلم مراد: “مراد. تجيب لي مأذون حالاً. من غير ما حد يلاحظ. ومعاه الأوراق كلها. يدخل معاك عادي ومش عايز حد يعرف انه مأذون.”
مراد “حاضر يا باشا.”
بعد أربعين دقيقة، كان المأذون في مكتب رائف، راجل لابس بادلة وشكله محترم.
حنين كانت قاعدة على كرسي جلد، ووشها شاحب وعيونها حمرا من العياط. عمها قاعد جنبها. ورائف قاعد قدام عمها وجنبه المٱذون، وقدامهم مراد وحارس تاني كشهود. وبسمة واقفة في الركن بتمسح دموعها بمنديل.
المأذون فتح الدفتر، وسأل عن الأسماء، وكتب البيانات، وبعدين رفع عينيه لحنين وقال بصوت رسمي: “يا بنتي، موافقة على الزواج من السيد رائف الحريري على سنة الله ورسوله، وبالمهر المسمى؟”
حنين رفعت عينيها لرائف.
كان بيبص لها بتركيز وصمت. ما كانش في عينيه ضغط ولا إجبار. كان في نظرته حاجة شبيهة بالانتظار، وربما بشيء من الخوف.
حنين أخدت نفس عميق ورجعت بصت للمأذون: “موافقة.”
المأذون ابتسم وبص للعريس وقال:” قول ورايا يا سيد رائف”
وبعد دقايق من التوقيعات والشهادات والدعاء، قال المأذون الجملة الأخيرة: “بارك الله لكما وبارك عليكما وجمع بينكما في خير.”وانتهى الأمر.
عم حنين سلم على رائف وهو بيوصيه على بنت أخوه. وبسمة حضنت حنين وهي بتبكي وبتضحك. ومراد بارك لرائف بصدق. ورائف كان ساكت، بيبص ل حنين وهو فرحان انها بقت على اسمه.
رواية الكاتبة ملك إبراهيم.
في مكتب السكرتارية.
كانت سلوى واقفة وراء الباب نص المفتوح، سمعت كل حاجة. شافت المأذون داخل. شافت الورق. سمعت التوقيعات. رجلها اتخبطت في حرف الكرسي، ورجعت لمكتبها بسرعة وإيديها بتترعش من الغضب. مسكت الموبايل ودخلت الحمام وقفلت الباب وضغطت على رقم ميرهان.
“ألو؟” ميرهان ردت بصوت ناعس.
“ميرهان هانم.” سلوى قالتها بصوت مخنوق.
سلوى بصدمة : “اتجوزها.”
ميرهان اتخضت : “إيه؟”
سلوى : “رائف بيه اتجوز حنين. دلوقتي. في المكتب. المأذون كان هنا دلوقتي . كتبوا الكتاب.”
السكوت على الخط كان طويل ومخيف. وبعدين سمعت سلوى صوت حاجة بتتكسر على الناحية التانية، وبعدها صرخة مكتومة: “ده مستحيل! يسيبني انا ويتجوز بنت فقيرة زي دي!”
ميرهان قفلت الخط في وشها.. وقامت بسرعة تلبس عشان تروح مكتب أحمد الصياد وهي هتتجنن ان رائف اللي كان متردد في خطوة الجواز وهما مخطوبين.. وكان دايما بيأجل اي كلام عن تجهيزات جوازهم.. يتجوز فجأة كدا بنت زي دي!
رواية الكاتبة ملك إبراهيم.
بعد نص ساعة.
في مكتب أحمد الصياد.
اتفتح عليه الباب مرة واحدة بدون استئذان. ميرهان دخلت بعصبية ، وعيونها بتطلع نار.
“اتجوزها!” صرخت وهي بتضرب بإيدها على المكتب. “رائف اتجوز البنت اللي بتشتغل عنده! اتجوزها يا أحمد! اتجوزها النهاردة!”
أحمد كان بيقرا ملف، فرفع عينيه ببطء. “إتجوز موظفة عنده ازاي؟؟”
ميرهان كانت هتتجنن: “سلوى كلمتني من شوية. رائف جاب مأذون وكتب كتابه عليها في مكتبه.”
أحمد قفل الملف وسند ضهره. للمرة الأولى، الابتسامة اللي على شفايفه اتحولت بشماته وقال كأنه بيقرأ عناوين الاخبار الجديدة . “رائف الحريري. اتجوز موظفة فقيرة بتشتغل عنده. بعد أسبوع واحد من فسخ خطوبته من ميرهان شوكت.”
“انت عايز تجنني اكتر!” ميرهان صرخت في وشه وهي بتقعد قدامه.
أحمد قالها ببطء: “إنتي ما فهمتيش قصدي. عارفة يعني إيه خبر زي دا ينزل. دي فضيحة أكبر له”موبايله رن في اللحظة دي بصوت رسالة.
الخبر نزل.
بيان رسمي من مكتب رائف الحريري: “يعلن السيد رائف الحريري، رئيس مجلس إدارة مجموعة الحريري، عن زواجه من السيدة حنين محمود في مراسم خاصة. ويؤكد أن ما نُشر مؤخراً من شائعات مغرضة ومفبركة لا أساس له من الصحة، وسيتم اتخاذ كافة الإجراءات القانونية ضد كل من يسيء للسيدة حرمه.”.. اتأكدوا انكم بتتابعوا الرواية الأصلية على صفحة الكاتبة ملك إبراهيم لأن في صفحات بتسرق الرواية وتغير الاحداث بالذكاء الاصطناعي.. أحمد اتصدم ان رائف نزل بيان رسمي بالخبر وقفل عليهم كل الطرق اللي ممكن يبتزوه بيها.
ميرهان خدت الموبايل من ايد أحمد وقرأت الخبر بصدمة.
“حرمه.” ميرهان رددتها بصوت مخنوق.
أحمد قال بتفكير بارد. “الصحافة اللي كانت بتهاجمه، الكل هينزل اعتذار بعد البيان دا.. يعني كل اللي عملناه راح في الأرض”
ميرهان وقفت تتنفس بصعوبة. قالت بصوت واطي ومسموم: “لازم نخرب حياته. هو والبنت دي. الاتنين. لازم أشوفهم بيتدمروا.”
أحمد بص لها بتأمل. وبعدين ابتسم، والمرة دي كانت ابتسامة فيها قسوة حقيقية: “أنتي غيرانه عليه ولا ايه؟ لتكوني بتحبيه بجد..”
ميرهان بصت له بتوتر وقالت: “انا مش بحب غير الفلوس وانت عارف كدا كويس.. ومينفعش أخسر قصاد بنت زي دي ”
أحمد بص لها بسخرية وقال: “هحاول أصدقك.. خلينا نفكر ونشوف هنعمل ايه”
رواية الكاتبة ملك إبراهيم.
في شركة الحريري.
الخبر وصل الشركة قبل ما البيان يتنشر رسمياً. الموظفين كانوا بيتحركوا في الطرقات بسرعة، والهمس اتحول لصدمة. الكلام اللي كان من ساعتين بيقول “عشيقة” بقى بيقول “الهانم”. وكل واحد كان حاسس بالحرج، وبعضهم بالندم.
في مكتب رائف، الأوضة كانت اتفضت شوية. المأذون مشي، ومراد نزل يستنا قدام الشركة ، وعم حنين وقف عند الباب وقال لحنين بصوت متأثر: “يا بنتي، من النهاردة بيتك بيت جوزك. هتروحي معاه. وأنا هجيب حاجاتك بكرة ونيجي انا وامك نطمن عليكي في بيتك.”
حنين هزت راسها وما قدرتش تتكلم. عمها باس راسها بحنان ومشي، وبسمة معاه تلتفت لحنين كل خطوتين بوش مليان أمل وقلق.وبقت الغرفة فاضية على حنين ورائف.
رائف وقف قدام حنين. كان فاهم صدمتها. شايف ارتعاش إيديها، وحيرة عيونها، والحزن الصغير اللي اتخبى في ابتسامتها. قرب منها خطوة وقال بصوت هادي: “حنين. أنا عارف إن كل ده حصل بسرعة.”
حنين بصت له. “يا فندم… أنا…”
“ما تقوليش يا فندم.” ابتسم ابتسامة صغيرة. “إنتي مراتي دلوقتي.. عمرك سمعتي واحدة بتقول لجوزها يا فندم .”
الكلمة خلت وشها يحمر آكتر . وهو كان لسه هيكمل كلامه، لكن الباب اتفتح بعنف مرة واحدة.
المرة دي كان الصوت مختلف. صوت راجل في الستينات، قوي وآمر ومفعم بالغضب، صوت اتعود إن الكل يسكت لما يتكلم.
“رائف! إيه الأخبار دي اللي سمعتها؟”
دخل عمه الكبير، الحاج منصور الحريري، لابس بدلة رمادية فاخرة وبيمشي بعصاه الأبنوس، ووراه سكرتيره الخاص بيحاول يلحقه. وقف في نص المكتب وعيونه جت على حنين ثم رجعت لرائف: “إنت اتجننت؟ إزاي تتجوز بنت بتشتغل عندك؟ بنت موظفة صغيرة؟ بعد أسبوع واحد من فسخ خطوبتك من ميرهان شوكت؟ بنت شوكت اللي العيلة كلها كانت فرحانة بيها؟”
رائف: “عمي، اسمعني…”
“أسمع إيه؟” عصاه ضربت الأرض ضربة قوية. “عيلة الحريري اللي عمرها ما حصل فيها فضيحة، ودلوقتي تتجوز بنت من الشارع عشان تغطي على صور؟ تشيل اسمنا لواحدة ما نعرفش أصلها؟ ما تعرفش إن مش اي واحدة ينفع تشيل اسم عيلتنا؟”
حنين خطت خطوة لورا. وشها كان شاحب تاني، وإيديها اتشنجت على بعض. كلمات عمه نزلت عليها زي أحجار. “بنت من الشارع”. “ما نعرفش أصلها”.
رائف شاف حركتها. وفي لحظة، ما بقاش في الدنيا أي حاجة غير حاجة واحدة. تحرك بسرعة وخطا خطوة لقدام، ووقف بينها وبين عمه، ظهره ليها ووشه ليه، كتفين مفرودين ونظرة هادية ومظلمة.
“عمي.” قالها بصوت حاد. “حنين مراتي. مش بنت من الشارع. واسمها من النهاردة بقى قبل اسمي . حرم رائف الحريري. ومش هسمح لأي حد يجرحها بكلمة واحدة.”
عمه : “إنت بتتحداني يا رائف؟”
رائف بصوت اهدى: “أنا بدافع عن مراتي. وأي كلمة هتتقال عنها، من أي حد، من القريب قبل الغريب، حسابه هيكون معايا انا.”
الصمت كان تقيل. الحاج منصور وقف بيبص لابن أخوه بعيون ضيقة وصدره بيطلع وينزل. وللمرة الأولى من سنين طويلة، ما لقاش الرد.ومن ورا ضهر رائف، حنين رفعت عينيها بهدوء، وبصت لضهره العريض اللي واقف حاجز بينها وبين العالم كله، وحسّت إن قلبها بيدق دقة واحدة تقيلة ما عرفتش تفسرها. لكنها عرفت إنها خلاص، مهما حصل، مش قادرة ترجع زي ما كانت الأول.. هي دلوقتي مرات رائف الحريري ودي الحقيقه اللي لازم تصدقها

