وبعد يومين راحت رهف على كليتها وخلصوا محضراتهم واقترحت عليهم ريهام يروحوا اى كافيه يشربوا اى حاجه .
وفعلا راحوا لكافيه حلو اوى على الكورنيش وقعدوا على التربيزة وطلبوا كابتشينو وفضلوا يتكلموا شويه ..
وعلى الطربيزة اللى قصادهم كان قاعد اربع شباب بيتكلموا بصوت عالى وبيهزروا وبيضحكوا وفجاه واحد منهم لفت انتباهه البنات وهما قاعدين وبيضحكوا بس عينه جت على رهف وعلى هدؤها وجمالها الملفت للنظر بس الجمال داخله حزن كبير وغير لبسها الاسود اللى كانت لبساه .
وفضل كل شويه يبص عليها لحد ما هى خدت بالها وقالت لصحابها يالا بينا كده كفايه علشان انا تعبت وعلشان ماما ما تقلقش عليا.
وفعلا قاموا بعد ما حاسبوا على اللى طلبوه.
لكن كان شريف فى عالم تانى خالص وفضل باصص عليهم لحد ما خرجوا من الكافيه . ولاحظ صحابه أنه مش معاهم وفضلوا يضحكوا عليه وعلى منظره اللى اتغير خالص لما شاف رهف.
وفضل يفكر فى البنت اللى خدت عقله فجاه وشكلها كده هاتاخد قلبه كمان.
وروحت رهف ودخلت اوضتها وغيرت هدومها بس كانت دماغها مشغوله بالشاب الوسيم اللى كان بيبصلها فى الكافيه.
وفى فيلا صفوان كان حسام فى اوضته عمال يفكر فى رهف اللى عجبته من اول ما شافها بهدؤها وجمالها وعيونها الخضرا وتعليمها وتربيتها.
وعمال يفكر أنه يروح يكلمها ويعترف لها باعجابه ده بعد ما يحكى لباباه ومامته عليها
وفى اوضه شريف اللى عمال يفكر فى البنت اللى شافها ولفتت نظره بجمالها وهدؤها وسر الحزن اللى باين عليها وعلى عيونها.
لحد ما طلع النهار وصحيوا كل اللى فى الفيلا والشغاله جهزت لهم السفرة وبدؤا يفطروا مع بعض الاب والام وحسام وشريف
حسام… كنت عاوز حضرتك يا بابا بعد الأكل فى موضوع مهم.
الاب… خير يا حسام فى ايه وموضوع ايه ؟؟
حسام … بعد الأكل هاقوله لحضرتك.
الام … مالك يا شريف يا ابنى مش طالعلك صوت ليه ولا لسانك القطه كالته .
شريف… ابدا يا ماما مفيش حاجه بس ما نمتش كويس امبارح .
الاب … اخبار شغلك ايه يا شريف.
شريف …. الحمد لله يا بابا ادينا بنعمل اللى علينا علشان نخلى كل حاجه فى البلد مظبوطه والأمن موستتب .
الام ربنا يحفظك ويخليك يا حبيبى وافرح بيك انت واخوك قريب وآشوف عيالكم .
وراح صفوان على مكتبه وراح وراه حسام وقاله خير يا حسام فى ايه يا ابنى.؟؟؟
حسام…. والله يا بابا انا……
الاب… انت ايه يا حسام ما تتكلم
حسام….انا معجب بواحده وعاوز ارتبط بيها واتجوزها بس لسه ما قولتلهاش وقولت اشوف راي حضرتك الاول.
الاب…. مين دى يا حسام اللى خدت عقلك وعجبتك يا ابنى ده انا جبتلك بنات كتير وبنات ناس صحابى وانت ما كونتش راضى باى واحده فيهم.
حسام …. فاكر يا بابا البنت اللى خبطها بالعربيه وقولت لحضرتك !!
.الاب … اه يا ابنى فاكرها.
حسام …. هى دى يا بابا اسمها رهف.
الاب … ودى بنت مين يا ابنى .
حسام … الصراحه يا بابا انا ما سالتش عنها وعن اهلها بس انا شوفت مامتها واخوها واختها وهى فى المستشفى ساعه الحادثه.
الاب.. ازاى يا ابنى تعجب بواحده وتحبها وعاوز كمان تتجوزها وانت مش عارف هى مين ولا بنت مين يا حسام.
يا ترى حسام هايعمل ايه توقعاتكم ايه الحلقه الجايه ؟؟؟
الحلقه 9
حسام….. يا بابا انا قولت افتح مع حضرتك الاول الموضوع وبعد كده اقابل اخوها واعرفه الموضوع واحاول اشوفها واقولها على الحكايه كلها .
الاب … ماشى يا حسام اللى تشوفه يا ابنى وربنا يقدملك اللى فيه الخير.
حسام … مسك ايد ابوه وباسها وقاله ربنا ما يحرمني منك ابدا يا بابا ويخليك لينا انت وماما.
وفى كليه عمر وهو قاعد مع صحابه وبيهزروا وعمالين ينتقدوا بعض وكل واحد بيقلد التانى وهو بيتكلم رن تليفون عمر وبص للشاشه لقى المتصل المهندس حسام فابتسم ورد عليه .
عمر .. الو .
حسام… ازيك يا عمر اخبارك ايه. ؟؟؟
عمر .. تمام والله يا بشمهندس حسام انت اخبارك ايه.
حسام… الحمد لله يا عمر .
اخبار الحاجه ورهف عاملين ايه ؟
عمر… بخير والله متشكر لسؤالك
حسام … بتشكرنى على ايه يا عمر انت زى اخويا والحاجه زى والدتى
.
عمر ….الله يخليك يا بشمهندس حسام.
حسام …. سكت شويه وبعد لحظات قال لعمر انت فين دلوقتى يا عمر.
عمر… خير يا بشمهندس فى حاجه
حسام… لا ابدا يا عمر بس كنت عاوز اتكلم معاك شويه فى موضوع كده.
عمر… انا فى الكليه واودامى ربع ساعه وامشى.
حسام .. طيب انا ممكن اعدى عليك بالعربيه فى الكليه ونقعد فى اى مكان نتكلم شويه انا وانت ؟
عمر .. ماشى وانا هاستنى حضرتك اودام بابا الكليه.
وبعد حوالى ربع ساعه جه حسام بعريته وخد عمر من اودام بابا الكليه وراحوا على مكان هادى على كورنيش النيل.
وحسام نده على الجارسون وقاله تشرب ايه يا عمر .
عمر… قاله قهوة مظبوطه
حسام للجرسون.. اتنين قهوة مظبوطه لو سمحت.
وبدا حسام بالكلام وحكى لعمر على شعوره اتجاه رهف وأنه معجب بيها ونفسه تكون زوجه ليه وقاله انا قولت اقولك انت الاول علشان الأصول بتقول كده وكنت عاوز اطلب منك أنى أبلغها الكلام ده بنفسى واشوف رأيها ايه اذا سمحت .
عمر…. والله يا بشمهندس مش عارف اقول لحضرتك ايه بس هابلغ والدتى الاول عن الموضوع ده واقول لحضرتك.
لان احنا يعتبر لسه فى حاله حداد على والدى الله يرحمه لسه ميت من فترة قصيره . ولما اقولها هابلغك على طول انشاء الله.
حسام … البقاء لله يا عمر ربنا يرحمه وانا هاستنى منك تليفون فى أقرب وقت .
عمر… وانا انشاء الله هاتصل بيك وابلغك.
ورجع عمر على البيت وقعد فى وسط اخواته واتغدوا مع بعض وسألهم على حالهم فى كلياتهم زى ما الاب الله يرحمه كان بيعمل
وبعد فترة طلب من والدته أنها تكلمه على انفراد.
قامت ام رهف معاه ودخلوا اوضه عمر وقعدت الام على السرير وقالتله خير يا ابنى فيه ايه.
عمر…. خير انشاء الله يا امى كنت عاوز اقولك ان البشمهندس حسام اتصل بيا وجه خدنى من الكليه وقعدنا برة. وأتكلم معايا فى موضوع كده .
الام…خير يا ابنى فى ايه .
عمر .. البشمهندس حسام معجب برهف وعاوز يتكلم معاها ويفتح معاها الموضوع ويشوف رأيها قبل ما يجيب اهله هنا ويتقدم لها رسمى.
الام… انت بتتكلم جد يا عمر .
عمر
.ايه يا حاجه اومال هاهزر يعنى فى موضوع زى ده .
الام .. الصراحه يا ابنى هو الشاب ما يتعيبش ادب واخلاق وشكله ابن ناس ومحترم وكنت واخده بالى من نظراته لرهف واحنا فى المستشفى.
عمر .. يعنى اقوله ايه يا امى.
الام.. هاقول لرهف واشاورها الاول واحكلها على اللى حصل واشوف رأيها ايه واقولك.
عمر .. ماشى يا حاجه اللى تشوفه
وخرجوا هما الاتنين من الاوضه .
رغد .. ايه ده هو فى اسرار من ورانا ولا ايه يا ست ماما.
الام بضحك ولا اسرار ولا حاجه يا بت يا ام لسان انتى.
رهف.. اومال فى ايه يا ماما اعترفى .
عمر … انا نازل شويه يا حاجه مش عاوزة حاجه من تحت اجبهالكم وانا طالع.
الام … كتر خيرك يا حبيبى المهم ما تتاخرش وخلى بالك من نفسك.
عمر
حاضر يا امى يالا سلامو عليكو.
رغد.. عمر ما تنساش تجبلى شيكولاته وانت جاى ماشى
عمر…. ماشى يا نوغه عاوزة حاجه تانى.
رغد .. لا يا باشا شكرا .
الام.. رغد قومى أعمللنا حاجه نشربها .
رغد… ايه يا ماما ما احنا لسه شاربين شاى اهو بعد الغدا .
الام.. غمزت لرغد بعينها فافهمت رغد أن في حاجه امها عاوزة تقولها لرهف وردت عليها وقالت حاضر يا ست الكل انتى تؤمرينى ودخلت على المطبخ وسابتهم لوحدهم.
الام … فى موضوع كده عاوزة اكلمك فيه يا رهف بس قبل ما أقوله لازم تخدى وقتك وتفكرى كويس فى كل كلمه انا هاقولها.
رهف…. خير يا ماما قلقتينى..
يا ترى هيكون رأى رهف ايه فى موضوع حسام وتوقعاتكم ايه .
الحلقه 10
الام…. البشمهندس حسام فكراه طبعا راح لعمر الكليه النهاردة وأتكلم معاه فى موضوع كده.
رهف… خير يا ماما فى ايه قلقتينى
الام .. هو معجب بيكى وعاوز يتجوزك .
رهف …. نعم اللى هو ازاى ده !!!!
الام…. ايه يا بنتى الراجل دخل البيت من بابه وقال لاخوكى الاول وعمر قاله أنه هايقولى ويقولك الراجل ما غلطش فى حاجه.
رهف .. انا ما قولتش غلط يا امى بس ازاى وامتى ده احنا ما شوفناش بعض غير كام مرة لما كان بيجيلى المستشفى يطمن عليا .
الام… اه يا بنتى بس انا من اول مرة شوفته ولاحظت نظراته ليكى واد ايه معجب بيكى .
رهف .. بس يا ماما بابا لسه مكملش شهرين ازاى افكر فى حاجه زى كده دلوقتي .
الام…. هو انتى قايمه تتجوزى يا رهف دلوقتى ولا ايه الراجل كل وما فيه عاوز يصارحك بشعوره ويشوف رايك ايه قبل ما يجيب اهله .
رهف … مش عارفه والله يا امى سبينى كام يوم افكر وارد عليكى .
الام هما يومين يا رهف وتردى عليا علشان يتكلم معاكى هو بنفسه وتحددى على أساسه رايك النهائى
رهف يومين ايه بس يا امى مش هالحق .
الام …. مش عاوزين نتأخر على الراجل يا بنتى علشان ما يقولش علينا اننا مش موافقين لا سمح الله
.
رهف …ربنا يسهل يا امى.
وفى فيلا صفوان كان شريف قاعد فى اوضته عمال يفكر فى البنت اللى عجبته وشافها فى الكافيه ومش عاوزه تروحي من باله خالص وده اللى خلاه كل يوم يروح الكافيه على أمل أنه يشوفها تانى ويحاول يتكلم معاها ويعرف هى مين بس للاسف كان بيفضل قاعد كتير وهى ما بتروحش ولا بيشوفها تانى
وفجاه رن موبيله ورد على المتصل لقاه محمود صاحبه اللى كان عاوز ينزل هو وشريف شويه يغيروا جو واتفق هو وشريف ينزلوا يروحوا على الكافيه ففرح شريف من جواه ولبس هدومه ونزل وهو نازل سالته امه
اهلا بحبيب قلبى قاعد لوحدك ليه يا شريف مش تنزل يا ابنى تقعد معايا شويه .
شريف .. ابدا يا ماما مفيش حاجه اصلى رجعت من الشغل تعبان شويه وقولت اريح فى اوضتى .
الام … اومال لابس كده ورايح على فين .
شريف .. هاقابل محمود .
الام .. طيب يا حبيبى روح مع السلامه وما تتاخرش وخلى بالك من نفسك .
فى كليه رهف خلصت محاضرتها هى وزميلاتها وراحوا علشان يقعدوا فى الكافيتريا بس قبل ما يوصلوا ليها ريهام اقترحت عليهم فكرة أنهم يروحوا الكافيه اللى راحوه المرة اللى فاتت .
رهف…. فعلا انا كنت عاوزة اتكلم معاكم فى موضوع يا بنات واخد رايكم وهنا فى الكليه مش هينفع .
شريف دخل الكافيه هو ومحمود وطلبه حاجه يشربوها وهما عمالين بيتكلموا شريف مش هنا خالص ولا واخد باله اصلا من الكلام اللى بيقولوا محمود وعينه عماله تدور فى كل ركن من الكافيه على البنت اللى مطيرة النوم من عينه واللى هايتجنن أنه يشوفها مره تانيه .
محمود … انت يا عم الباشا نحن هنا فى ايه عماله اكلم نفسى من بدرى وانت ولا انت هنا .
شريف … هه فى حاجه يا محمود بتقول حاجه .
محمود .. نعم يا اخويا بتقول ايه.لا لا لا انا مش مطمنلك ياض يا شريف فى ايه حالك مش عاجبني بقالك فترة من ساعه اخر سفريه ليك .
شريف .. ولسه ما كملش كلمته بيبص على باب الكافيه لقى البنت اللى شغلته عن شغله وعن صحابه وعن الدنيا اللى عايش فيها وكأنه بيحلم .
محمود… ايه يا ابنى فى ايه ؟
شريف …. هى. هى يا محمود. هى
محمود…. لا اله الا الله فى ايه يا ابنى انت هى مين انطق .
شريف … لا لا ابدا خلاص
شريف خد نفس كبير وكأن الدنيا فتحت حوليه وبقت حلوة اوى .
قعدوا التلت البنات وطلبوا عصير يشربوه وبدأت رهف وحكت لهم على الموضوع من أوله لاخره .
سلمى… يا لهوى يا رهف ده مووز يا بختك يا رهوف تديهولى لفه .
ريهام … انتى بتتكلمى جد يا رهف ده شاب واااو اى بنت تتمناه اوعى ترفضى .
رهف… انا مش عارفه اعمل ايه فعلشان كده قولت اخد رايكم .
الاتنين فى نفس واحد
. موافقوووون .
الكل ضحك وفضلوا يهزروا
وفيه واحد عينه ما نزلتش من عليهم وبذات من على رهف اللى لاحظ انها اجمل وارق واحلى من اول مره شافها وما كنش متخيل انها بالجمال ده
وقرر أنه يحاول يتكلم معاها المرة دى ويتعرف عليها.
بس رن رقم تليفونه وعرف أنه من الشغل وأنه لازم يروح فورا وما يتاخرش لان وكيل الوزارة نفسه هو اللى عاوزه وللأسف مش هايقدر يتكلم مع البنت ومن جواه زعل اوى على الفرصه اللى ضاعت من ايده.
وخد بعضه هو ومحمود ومشى.
والبنات اقنعوا رهف انها توافق على حسام
وفعلا اقتنعت رهف من جواها بحسام وأنها عمرها ما هاتقابل حد افضل منه .وقررت انها تقول لعمر اخوها للى وصلت له .
ورجعت على بيتها وبلغت عمر بقرارها بس شرط أنها تكلمه هنا فى البيت قبل ما يجيب اهله وأنها رافضه انها تقابله برة البيت وفعلا عمر فرح بيها وبكلامها ده وبلغ حسام بكلام رهف وطلب أنهم يتكلموا فى البيت مش برة البيت زى ما كان هو عاوز…
وحدد مع عمر أنه يروح ليهم تانى يوم بعد المغرب .
حسام بلغ والده باللى حصل وفرح الاب بالخطوة دى ودعى ليه أن ربنا يوفقه ويقدمله كل خير. .
وطلع النهار وحسام راح على شغله وحضر اجتماع مهم مع والده على الطلبيه الجديده اللى طلبنها من برة وبعد ما الاجتماع خلص الساعه كانت اربعه ويدوبك يروح البيت يحضر نفسه علشان يروح البيت عند رهف .
وفعلا روح البيت ودخل خد دش وبعدها فتح الدولاب ونقى طقم حلو علشان يروح بيه ولبس وظبط نفسه ونزل وركب عربيته وراح الاول على محل الورد واشترى بوكيه ورد حلو اوى علشان يخده معاه وبعدها راح على العنوان اللى ادهوله عمر ودخل العمارة وخبط على الباب وفتحله عمر ودخله اوضه الصالون وجت الام وسلمت عليه وقدموله عصير وبعد شويه خرجت الام ورجعت ومعاها رهف اللى اول ما دخلت وشها احمر وكانت باصه فى الارض وسلمت على حسام .
حسام…. ازيك يا انسه رهف.
رهف … الحمد لله كويسه .
حسام .. واخبار ايدك ايه دلوقتى بعد ما فكيتى الجبس .
رهف … الحمد لله احسن بكتير .
الام بصت لعمر بعينيها ففهم عمر واستاذن أنه هايتكلم فى التليفون وخرجت الام بحجه انها هاتصلى المغرب..
احمر وش رهف اكتر لما أمها خرجت هى وعمر وسابوها مع حسام.
رايكم وتواقعتكم ايه ويا ترى رهف هاتعمل ايه.
الحلقه 11
من
حسام…. لاحظ توتر رهف وبدأ يتكلم معاها ويعرفها هو اد ايه معجب بيها من ساعه الحادثه وانه شايفها الانسانه اللى ممكن تكون مراته وام اولادى وبصراحه كده كنت عاوز اتقدملك رسمى وادخل البيت من بابه .
رهف .. بكل هدوء وخجل بس احنا لسه ما نعرفش حاجه عن بعض ولا عن حياتى وعن ظروفى وعن بابا الله يرحمه
وبدأت تحكيله عن كل حاجه علشان يبقى عارف عنها كل حاجه وان ظروفها متوسطه بالنسبه ليه هو والعيشه اللى هو عايش فيها .
حسام…. كل الكلام ده مالوش لازمه يا رهف كل اللى انا عاوزه انتى وقلبك وحبك ليا واوعدك أنى هاعوضك عن باباكى الله يرحمه .المهم انك تكونى موافقة على جوازى منك .
رهف جواز ايه يا حسام لسه بدرى على الكلام ده لما اخلص كليتى الاول.
حسام …. كلها كام شهر وتخلصى السنه دى ونكتب الكتاب ونتجوز وبعدها ابقى كملى براحتك وعلى العموم مالوش لازمه الكلام فى الموضوع ده دلوقتى المهم عندى دلوقتى انتى .
وبعد حوالى ساعه مشى حسام واتفق مع عمر أنه هايتكلم مع باباه ويشوف رأيه ايه ويحدد معاد معاه علشان يجى هو وأبوه وأمه واخوه
.
ورجع حسام على البيت وقعد مع أمه وأبوه وبدأ يحكلهم على اللى حصل بينه وبين رهف كله.
الام.. بس يا ابنى دول مش من وسطنا خالص .
الاب … وسط ايه يا حاجه اللى بتتكلمى عليه انتى مش عارفه أنى بدأت من الصفر ويا دوبك كنا موظف صغير فى الشركه.
الام… مش قصدى والله يا حاج .
الاب.. الفقر مش عيب يا ام حسام المهم الادب والاخلاق والتربيه الصالحه .
حسام وطى على ايد ابوه وباسها وراح بأس راس امه.
الاب شوف اليوم اللى يناسبك يا ابنى واحنا نروح نطلبها من والدتها واخوها.
وفعلا حدد حسام يوم الخميس مع عمر أنه هايجى هو وأهله وبدأت الام تجهز البيت لاستقبال الضيوف
وصباح يوم الخميس الكل صحى بدرى عند رهف فى البيت وبدؤا يجهزوا نفسهم لاستقبال حسام وأهله وعمر نزل يشترى شويه حلويات وحاجات لزوم الضيوف ورهف بدأت تجهز هاتلبس ايه ورغد كانت بتساعدها والام كانت ملخومه فى المطبخ علشان تجهز الحاجات اللى هاتقدمها للضيوف وخلت عمر يتصل بعمه احمد علشان يحضر معاهم ويستقبل حسام هو و اهله .
وفى فيلا صفوان كان الكل بدأ يلبس وجه يومها شريف بدرى من شغله علشان يروح مع اخوه لبيت رهف وبدؤا ينزلوا ويركبوا عربيتهم
وفعلا راحوا كلهم على بيت رهف ونزلوا اودام العمارة وطلعوا مع بعض ووصلوا لشقه رهف .
مد حسام أيده ورن الجرس وفتح لهم عمر ورحب بيهم هو وعمه احمد ودخلهم اوضه الصالون وجت الام ورحبت بيهم وبدؤوا يتكلموا فى الموضوع وبعد شويه دخلت رهف من باب الاوضه فى منتهى الجمال والرقه وكانت لابسه فستان اسود فى ابيض ورقيق جدا وطرحه بيضه مع مكياج خفيف جدا ودخلت وسلمت على حسام وعلى والده ووالدته ومدت اديها لشريف اللى كان ملخوم بالموبايل اللى اول لما شاف ايديها وبصلها برق بعنيه ومكنش متخيل انها البنت اللى معجب بيها واللى شقلبت حاله باقلها فترة وكان بيتمنى أنه يكلمها
يا ترى شريف هايكون رد فعله ايه وهايعمل ايه ؟؟؟؟؟ .
رايكم يهمنى
الحلقه 🌹 12 🌹
روايه 🌹
بعد ما فاق شريف من صدمته سمع صوت والده وهو بيقوله ايه يا حضرة الضابط صرحت فى ايه العروسه ماده ايديها ليك .
شريف… وقف ومد أيده للعروسه رهف وسلم عليها وبص فى عينيها اللى لاقاها اجمل عيون شافها فى حياته بس فى ثوانى فاق وقالها مبروك يا عروسه .
وبالنسبه لرهف حست انها شافته قبل كده بس فين مش فاكرة .
رحب بيهم عمهم احمد هو وعمر وبدأوا يتكلموا فى موضوع الجواز وفعلا حددوا ميعاد الخطوبه اللى هايكون يوم الخميس الجاى واتفقوا على الجواز والفرح بعد ما رهف تخلص كليتها السنه دى.
وخلص اليوم وروح حسام ووالده ووالدته وشريف ركب عربيته واستاذن أنه وراه شغل مهم وهايروح عليه.
وركبوا عربياتهم ورجعوا على الفيلا وشريف ركب عربيته وكان عاوز يروح على اى مكان هادى يقعد فيه وملقاش غير المكان اللى شاف فيه رهف اول مرة وفعلا وقف بالعربيه اودامه ونزل ودخل على الكافيه واقعد على التربيزة اللى رهف كانت بتقعد عليها هى وصحابها .
طلع علبه السجاير وطلب من الجارسون يجبله فنجان قهوة.
وفى فيلا صفوان الاب… الف مبروك يا حسام يا ابنى ونعم البنات ادب وجمال وتربيته واخلاق واهلها باين عليهم ناس طيبين.
الام….. ما شاء الله يا حاج فعلا زى ما انت بتقول عروسه زى القمر وجميله ومؤدبه ووالدتها ست محترمه واخوتها زى العسل ربنا يتمملك على خير يا حبيب قلبى وافرح بيك انت واخوك واشوف احفادك
حسام… متشكر ليكم اوى وكلامك كله صح وهما فعلا ناس محترمه ورهف بنت مؤدبه وعلى خلق وهو ده اللى شدنى ليها وحبيت انها تكون مراتى. الحمد لله يا ابنى وعقبال ما نفرح باخوك شريف هو كمان انشاء الله. . رايكم !!
الحلقه🌹 13 🌹
فى بيت رهف قعدت الام هى واولادها التلاته رهف وعمر ورغد بعد ما عمهم احمد روح على بيته وقالت الحمد لله والف مبروك يا حبيبتى كنت اتمنى الحاج يكون موجود معانا دلوقتي كان بيتمنى أنه يفرح بيكى يا رهف .
اتخنقت الام بالعياط وفضلت تعيط ورهف هى كمان عيطت لما أمها قالت كده لانها فعلا كانت تتمنى أن ابوها يكون موجود ويفرح بيها زى ما كان بيتمنى يشوفها احلى واجمل عروسه.
عمر… خلاص يا امى اهدى ربنا يرحمه ويغفر له هو دلوقتى فى مكان احسن من هنا وزمانه حاسس بينا دلوقتى وفرحان علشان رهف اكيد ومسك راس امه وباسها ومسك رهف وحضنها وقالها الف مبروك يا حبيبتى ربنا يتمملك على خير.
وجربت رغد فى حضن امها وفضلت تعيط لما أفتكرت باباها اللى وحشها اوى واتحرمت منه ومن حنينه عليها.
وكل واحد دخل على اوضته علشان ينام بعد.ما طلبت رغد انها تنام فى حضن امها وامها وافقت وفعلا دخلوا ناموا مع بعض وعمر دخل هو كمان علشان ينام.
رهف دخلت وقفلت باب الاوضه وراها.
وبدات تغير هدومها وبعدها راحت على السرير علشان تنام ويادوبك لقت الموبيل بيرن وبصت فى الشاشه لقت حسام هو اللى بيرن اللى كان طلب منها رقم موبيلها قبل ما ينزل من عندهم وهى وافقت وادتهوله وردت عليه وقالت
رهف … الو..
حسام… الو…. ازيك يا رهف.
رهف…. تمام الحمد لله وانت عامل ايه.
حسام …انا اسعد انسان فى الكون بعد ما وافقتى وبقيتى جزء منى.
رهف… سكتت شويه وبعد كده انت مش هتنام ولا ايه.
حسام… انتى اتكسفتى يا رهف .
رهف…. لا ابدا بس…..!!!!!
حسام… انا انشاء الله هاخليكى اسعد واحده فى الدنيا لانك حبيبتى وقلبى وحياتى كلها.
رهف…. احم احم يا بشمهندس ايه الكلام ده كله.
حسام .. مش كلام والله يا رهف ده احساسى وشعورى نحيتك من اول مرة شوفتك فيها.
الحلقه 🌹. 14. 🌹
😢
رهف…. مش عارفه اقولك ايه يا حسام انا معجبه بيك وعاوزة اتعرف عليك اكتر .
حسام … طيب ايه رايك اعدى عليكى بكرة فى الكليه بعد ما تخلصى محاضراتك ونروح نقعد فى اى حته نتكلم شويه.
رهف … هاقول لماما الاول وابقى ارد عليك الصبح.
حسام .. ماشى يا رهف وانا هاستنى منك تليفون بكرة انشاء الله.
رهف … انشاء الله. عاوز حاجه.
حسام… عاوز سلامتك .
رهف … طيب تصبح على خير .
حسام .. وانتى من اهل الخير يا حبيبتى
رهف…😱 روح نام يا حسام.
حسام… بيضحك وبيقول حاضر يا عيون وقلب حسام. ❤❤❤
وقفلت رهف معاه وحست أن قلبها وجسمها كله بيرجف من كلام حسام ليها وان قلبها وعقلها بدأ يعجب بيه فعلا وحطت راسها على المخده وحاولت تنام وفضلت تتقلب كل شويه لحد ما راحت فى النوم ونامت.
وطلع النهار وصحيت الام كعادتها وصحت عيالها وبدؤا يلبسوا علشان كل واحد يروح على كليته وقعدوا فطروا وشربوا الشاى باللبن .
رهف … كنت عاوزة حضرتك يا ماما .
الام .. خير يا رهف فى ايه.؟
رهف… اصل حسام كلمنى وطلب أنه يجى عندى الكليه بعد ما اخلص محاضراتى ونقعد فى اى مكان ونتكلم شويه انا وهو.
الام… ماشى يا حبيبتى شوفى انتى هاتخلصى امتى وقوليله يجى وياخدك هو خلاص مبقاش غريب وكلها كام شهر وهايكون جوزك انشاء الله.
رهف.. باست مامتها وراحت مسكت الموبيل واتصلت على حسام اللى كان لسه صاحى من النوم علشان ينزل على الشركه واول ما لقى رهف هى اللى بتتصل قام من على السرير رد. عليها
. حسام … صباح الفل والورد والياسمين .
رهف… صباح الخير يا بشمهندس.
حسام…احلى صباح من احلى رهف فى الدنيا.
رهف.. احم. احم على العموم انا قولت لماما وماما وافقت وانا هاخلص انشاء الله على الساعه تلاته.
حسام …انشاء الله من الساعه واحده هاكون اودام الكليه. رهف … ضحكت وقالتله اللى تشوفه ويالا بقى سلام علشان هاتاخر على الكليه وزمان ريهام وسلمى هايضربونى.
حسام… ماشى يا حبيبتى سلام.
وخدت شنتطها ونزلت بس كانت بترجف من الخجل والكسوف اللى حست بيه لمجرد أنها كلمت حسام .
تواقعتكم ايه. اللى جاى رايكم يهمني
الحلقه 15
روايه
راحت على كليتها واول ما دخلت ووصلت لمكان ريهام وسلمى استلموها هما الاتنين وكانوا عاوزين يعرفوا منها كل اللى حصل امبارح من ساعه ما حسام راح هو وأهله عندهم لحد ما نزلوا .
وفعلا حكت لهم رهف على كل حاجه حصلت بس وهى بتحكى افتكرت حاجه مهمه بس مش متاكده منها اوى.
رهف … فاكرين يا بنات لما روحنا اول مرة الكافيه وقعدنا فيه شويه كان قاعد على التربيزة اللى قصادنا شويه شباب لاحظت ساعتها أن فيه واحد منهم عمال يبص علينا جامد وحاسه ان هو ده اخو حسام اللى جه امبارح معاه.
سلمى….. اووووووبا يعنى حسام ده ليه اخ تانى الله حلو اوى ظبطينى معاه بقى يا رهف.
ريهام… اشمعنى يا اختى انتى ما انا موجوده اهو واكيد انا هاعجبه اكتر يا رخمه انتى …
رهف…. هههههههه ويا سلام بقى لو عرفتوا بيشتغل ايه هاتتجننوا اكتر.!!!!!
البنات فى نفس واحد ايه يا رهف انطقى اتكلمى احسنلك ؟؟؟
رهف… ضابط شرطه بس ايه احلى. من عمر الشريف نفسه وفضلوا يضحكوا ويهزروا وراحوا على محاضرتهم .
وعلى الساعه تلاته الا عشرة كده كانت رهف خلصت المحاضره الاخيرة ليها واستأذنت من زميلاتها ريهام وسلمى ولقيت موبيلها بيرن وعرفت أنه اكيد حسام وفعلا زى ما توقعت ردت عليه وقالتله انها دقيقتين وهاتكون عند الباب وفعلا لما وصلت لقت حسام واقف جنب العربيه واول لما شافها راح وسلم عليها وقالها ازيك يا رهف .
وحشتينى اوى يا حبيبتى ده انا هنا من بدرى واقف مستنيكى.
رهف وشها احمر من الخجل وبصت فى الارض ولما حسام حس بكده فرح من جواه من خجلها ده وراح فتح لها باب العربيه وركبت ولف حسام الناحيه التانيه وركب ومشيوا بالعربيه وراحوا قعدوا فى مكان هادى اوى على الكورنيش وفضلوا يتكلموا اكتر من ساعتين وحكوا لبعض حاجات كتيرة عن حياتهم ووعدها حسام أنه هايعمل كل اللى يقدر عليه علشان يسعدها ويخليها اسعد واحده فى الدنيا.
وجه يوم الخميس ولبسوا الدبل والشبكه اللى حسام جبهلها وراح هو وأبوه وأمه لكن شريف اعتزر أنه يروح بحجه أنه عنده ماموريه مهمه وما يقدرش يعتزر عنها لكن هو اكيد مش قادر يشوف البنت اللى كانت شغلت باله وعقله وقلبه لما شافها واكتشف انها هى حبيبه وخطيبه اخوه ووعد نفسه أنه ينساها علشان ما ينفعش خلاص لأنها هاتكون مرات اخوه .
وعدى اكتر من شهرين تلاته وخلصت الامتحانات وبدؤا يجهزوا للفرح اللى حجزوه فى أكبر الفنادق وكان على مستوى عالى اوى ونزلوا اشتروا كل حاجه هما عايزنها لزوم اليوم ده وحجزت رهف وحسام البيوتى سنتر اللى هاتروحه وجه يوم الفرح .
فى بيت رهف كان الكل مشغول فى تحضير نفسه واستقبال الاهل اللى بدؤا يجوا ويهنوا ام رهف على الجواز ورهف ورغد لبسوا وراحوا على البيوتى سنتر وعمر كان بيستعد وبيكمل باقى اللى نقصه من لبسه.
وعلى اخر النهار راحوا على القاعه كلهم فى انتظار العروسه والعريس
.
وفى فيلا صفوان الكل ركب عربيته بعد ما جهزوا كل حاجه وبعد ما اطمنت الام على اوضه العروسه والعريس اللى كانت فى الدور التانى للفيلا .
وراحوا على القاعه وكان شريف مع الوقت بدأ ينسى موضوع رهف وحاول أنه يلغيه من زاكرته نهائى علشان مش عاوز فى يوم من الايام يندم على حاجه ممكن يعملها وتزعل اخوه منه لأنه اخوه الوحيد اللى بيحبه ويحترمه وبيتمناله كل خير.
تواقعتكم ايه!!
ورايكم يهمنى
الحلقه 16
روايه
فى البيوتى سنتر خلصت رهف مكياچها الهادى وكانت زى القمر بفستانها الابيض وطرحتها البيضه والتاج اللى كان على رأسها اللى خلاها عامله زى الاميرات فى الحواديت وكان معاها رغد اختها وريهام وسلمى اصدقاءها وجت العربيات وكان حسام واخوه شريف وصاحبه فارس ونزل حسام من العربيه وهو لابس بدلته السودا اللى كان طالع فيها زى القمر بطوله وجسمه الطويل وشعره الاسود الناعم الكثيف.ودخل على البيوتى سنتر وخرجت رغد وخدته لحد رهف اللى اول ما شافها ما كنش مصدق عنيه من جمالها ورقتها وحلاوتها وهى لابسه الفستان الابيض وقرب منها وباس راسها وهو بيبوسها قالها انتى اميرتى يا رهف اللى اتمنيتها فاحمر وش رهف من الكسوف ومسك ايديها وراحوا يركبوا عربياتهم وركب حسام ورهف مع شريف اخوه فى العربيه ورغد والبنات ريهام وسلمى مع فارس صديق حسام وراحوا على القاعه .
وفى القاعه كانت الناس كتير من اهل حسام واصدقاؤه ومعارف باباه واهل رهف واصحابها وأصحاب رغد وعمر وبدأ الفرح وبدأوا يرقصوا على نغمات الموسيقى الهاديه والكل كان فرحان باحلى عريس وعروسه .
وانتهى الفرح وروحوا العرسان على الفيلا علشان يغيروا هدومهم ويجهزوا شنطهم علشان مسافرين يقضوا شهر العسل .
واول ما وصلوا الفيلا شالها حسام وطلع على فوق عند اوضتهم وكانت رهف مكسوفه جدا من اللى عمله حسام وفتح باب الاوضه ونزل رهف وقفل الباب
وقرب من رهف ومسك اديها وباسها وقالها انا مش مصدق انك بقيتى معايا وان احنا بقينا خلاص مع بعض فى اوضه واحده وباس رأسها وقربها من حضنه لما لاقاها مكسوفه و باصه فى الارض .
رهف …. دقات قلبها كانت سريعه جدا من الكسوف والخجل لكن اول ما حست بحضن حسام ليها حسسها بالراحه والأمان .
وهمس لها حسام وقالها ايه رايك نلغى موضوع السفر ده ونخليه لبكرة اصلى مشتاق ليكى اوى اوى يا اميرتى.
رهف … بكسوف احم احم يا بشمهندس من اولها كده هانرجع فى كلامنا لا طبعا يالا بينا نغير هدومنا علشان نلحق ميعاد الطيارة وبعدت عنه وفتحت الدولاب علشان تجهز نفسها للسفر.
حسام … ماشى يا ست رهف احنا هانروح من بعض فين
وفعلا بدأوا يغيروا هدومهم ونزلوا على تحت وسلم على والده ووالدته واخوه شريف اللى خد منهم الشنط وراح حطها فى العربيه علشان يروح يوصلهم للمطار .
وفعلا ركبوا العربيه مع شريف وافتكروا حاجات حصلت فى الفرح وفضلوا يضحكوا ويهزروا طول الطريق لحد ما وصلوا للمطار وسلموا على شريف وحسام خده فى حضنه وقاله عقبالك يا شريف انشاء الله لما نفرح فيك انت كمان .
ضحك شريف وقاله لسه بدرى يا عم حسام لما اشوفك انت الاول واشوف رهف هاتعمل فيك ايه .
وضحكوا كلهم وسلموا عليه ودخلوا على المطار من جوه وركبوا الطياره وبعد فترة وصلوا لمطار الغردقه وركبوا عربيه ووصلوا للفندق اللى كانوا حاجزين فيه.
يا ترى هايحصل ايه ؟؟؟
رايكم ايه يا حلوين
الحلقه 17
دخلوا اوضتهم وحطوا الشنط وقرب حسام من رهف وقالها اخيرا وصلنا يا حبيبتى حمد الله على السلامه .
رهف … الله يسلمك يا حسام.
حسام…!!!!! نعم حسام ايه فين حبيبى .
رهف…. ابتسمت بكسوف وقالتله . بصوت واطى حبيبى.
فاحضنها حسام وبص فى عنيها الخضرا اللى كانت عامله زى السحر من جمالها وبتجذبه ليها ورهف وشها احمر ودقات قلبها بقت سريعه وقرب حسام من شفايفها اللى زى الكريز وباسها بشويش وبكل رقه لفترة طويله وبعد بعد لما حس انها عاوزة للهواء.
وبدأ يبوس رقبتها فى كل حته وأيده بتلمس كل حته فى جسمها بكل شوق وبكل حب ورقه وقضوا احلى ليله فى حياتهم.
(ملناش دعوة بقى بيهم عيب كده )
( بلاش قله ادب )
وطلع النهار على احلى عرسان وكان حسام هو اللى صحى الاول واول ما فتح عنيه لقى رهف اللى كانت عامله زى الملاك وهى نايمه جمبه وشعرها الطويل اللى كان مغطى معظم وشها وهى نايمه فبدأ يشيله عن عنيها وقعد يبص عليها وبيحمد ربنا على النعمه اللى ربنا إدهاله دى ويدعى ربنا أنه يقدر يسعدها ويخليها احسن واحده فى الدنيا ولمس وشها بايده ولمس شفايفها وحست رهف بيه وفتحت عنيها لاقته جمبها وقريب منها اوى اوى.
رهف ….. صباح الخير يا حسام.
حسام…… صباح الفل والورد والياسمين يا قلب وعيون حسام يا احلى عروسه.
رهف …. وبعدين بقى فى الكلام الحلو ده يا حبيبى.
حسام…. ايه بتقولى ايه عيدى كلامك كده تانى.
رهف … ضحكت وقالت حبيبى وجوزى وكل حاجه حلوة فى حياتى.
قرب منها حسام وخدها فى حضنه وقالها يالا بينا؟؟؟
رهف… هانروح فين يا حسام ؟
حسام… بضحكه كلها مكر !!!
لا ابدا احنا بس هانكمل اللى ما كملنهوش امبارح.
رهف … نعم
وقبل ما تكمل كلامها باسها حسام بسرعه قبل لما تكمل كلامها وخدها فى حضنه وراحوا يكملوا اللى قالها عليه.
وباليل جهزوا نفسهم ولبسوا ونزلوا على تحت وبدؤا يقضوا شهر العسل بتاعهم .
وفى فيلا صفوان بعد شهر العسل ما خلص بدوا يستعدوا لاستقبال العروسه والعريس اللى باقلهم شهر فى الغردقه .
خلاص راح شريف يستقبلهم فى المطار وبعد فترة وصلوا الفيلا والكل بدأ يرحب بيهم الام والاب وغيروا هدومهم ونزلوا على تحت علشان يتغدوا مع بعضهم ويحكولهم على اللى حصل معاهم فى الشهر ده كله.
وبعد شويه اتصلت رهف بامها علشان تطمن عليهم وطمنها أنهم وصلوا على خير.
وبعد ما خلصت مع امها كلمت ريهام وسلمى واطمنت عليهم اللى فضلوا يرخموا عليها وكانوا عاوزين يعرفوا كل حاجه حصلت مع رهف وفضلوا يضحكوا ويهزروا مع بعضهم.
وعدى كذا يوم وبدا حسام ينزل الشركه تانى مع باباه علشان كانت الطلبيه اللى كانوا طلبوها من فترة قربت تيجى من برة
يا ترى ايه اللى مستنى حسام ورهف
تواقعتكم ايه.
الحلقه 18
وفى مكتب صفوان… طلب صفوان من مدير مكتبه أنه يطلب البشمهندس حسام فى مكتبه فورا.
حسام دخل لباباه المكتب وقاله خير يا حاج فى ايه ؟؟
الاب.. الطلبيه هاتوصل بكرة الفجر يا حسام وعاوزك تجهز نفسك يا ابنى علشان تروح تستلمها بنفسك انت عارف الطلبيه دى مهمه اد ايه ولو كنت قادر كنت جيت معاك.
حسام .. انا تحت امرك يا حاج انشاء الله هاروح واستلمها انا بنفسى ولا تشغل بالك وعلى الصبح اكون وصلت بأذن الله.
الاب…. ربنا يخليك يا حسام يا ابنى ريحتنى ده انا كنت شايل هم الطلبيه دى اوى مش عارف ليه.
حسام…. انت تؤمر يا حاج وانا انفذ .
الاب… يالا خد بعضك وارجع على الفيلا وجهز نفسك للسفر .
حسام … ماشى يا بابا مش عاوز حاجه منى تانى قبل ما انزل.
الاب … عاوز سلامتك يا ابنى ربنا يرضى عليك.
ومشى حسام ونزل من الشركه وركب عربيته وراح على محل ورد كبير ونقى بوكيه ورد خده لرهف وهو مروح.
ووصل الفيلا وخد البوكيه فى أيده واول ما دخل لقى رهف قاعده على الكنبه فى الريسبشن بتتفرج على فيلم ابيض واسود فمشى براحه وجه من ضهرها وحط أيده على عيونها فحست رهف بايده ولفت وشها لقت حسام فلف نفسه ليها واداها بوكيه الورد وباسها وقالها وحشتينى يا حبيبتى اوى اوى اوى.
الام…. احم. احم نحن هنا يا عم حسام مفيش وحشتينى يا ماما.
حسام راح لمامته وباسها وباس ايديها وقالها انت الخير والبركه يا حبيبتى وراحت رهف وحضنت حماتها وقالت لها انتى الخير والبركه يا ست
الكل.
الام…. خدتهم هما الاتنين فى حضنها وقالت لهم ربنا يخليكم لبعض يا حبايب قلبي.
حسام .. انا هاطلع اجهز نفسى علشان انا مسافر على الساعه واحده باليل علشان استلم الطلبيه للشركه
الام… تروح وتيجى بالسلامه يا ابنى.
رهف … تروح وتيجى بالسلامه انشاء الله يا حبيبى.
وطلعوا وجهزوا شنطه السفر اللى هايخدها معاه حسام ونام شويه وصحى على العشاء واتجمعوا كلهم على السفرة الاب والام وحسام وشريف ورهف.
وفضلوا يتكلموا وبيضحكوا واصتادوا شريف فى الكلام علشان يبدأ يدور على عروسه علشان يفرحوا بيه هو كمان وخلصوا العشاء وطلعوا على فوق
بعد فترة بدأ حسام يلبس هدومه علشان الساعه قربت على واحده ومسك رهف وقربها منه وبدأ يلمس وشها وشفايفها وباسها بوسه طويله اوى اوى لحد ما حس انها عاوزة تتنفس وحضنها وقالها هاتوحشينى اوى اوى يا حبيبتى.
رهف … وانت كمان يا قلبى هاتوحشنى اوى .
ضمها حسام ليه اوى وباسها وخد الچاكيت بتاعه ولبسه ونزلوا على تحت وسلم على امه وعلى ابوه .
للاسف شريف كان راح على مأموريه ومشى بعد العشاء على طول وسلم عليهم حسام وخد بعضه وركب عربيته ومشى وطلعت رهف على اوضتها.
طلع الاب والام هما كمان على اوضتهم وناموا.
وبدأ يطلع النهار وفعلا كان وصل حسام على المينا واستلم الطلبيه وخلى الموظف بتاع الشركه يركب مع العربيات بتاعه البضاعه .
وركب حسام عربيته وبدأ يمشى بيها وكان فى شبورة كبيرة اوى خلت الرؤيه منعدمه وفى ثوانى كانت العربيه انقلبت بيه وانقلبت كذا عربيه كمان وكانت حادثه كبيرة جدا .
وفى الفيلا صحى الاب على صوت جرس التليفون وقام بالرد على المتصل.
وقال الو…..
المتصل … حضرتك صفوان والد حسام.
الاب … بدأت ضربات قلبه تزيد ورد وقال ايوا يا ابنى خير فى ايه ؟؟؟
المتصل… ابن حضرتك عمل حادثه كبيرة وحالته خطيرة وراح على المستشفى.
الاب رمى التليفون وجرى على اوضه شريف اللى لقاه لسه خارج من الحمام وكان بيلبس هدومه علشان يروح على شغله .
الاب… الحقنى يا شريف الحقنى يا ابنى.
شريف….. بخضه من منظر ابوه خير يا بابا فيه ايه.؟؟؟؟
