عام

ادهم انا بولد

” برا في الصاله ”

تغريد برعب : والنبي حد يدخل الصنيه بتاعت البيبيس والله لو شلتها هتقع مني وهفضحكم

نجوي بغضــ,,ـب وهي شايله صنية الجاتوه : وانتي كدا مش هتفضحينا شيلي يابت الصنيه وادخلي يلااااا الناس هتقول اتأخرو كدا ليه

تغريد برفض تام : والله العظيم ما هدخل وفي ايدي صنيه

نجوي بصت لنهال : شيلي صنية البيبس يا نهال وتعالي ورايا

نهال بإحراج : يا نجوي معروفه العروسه هي اللي بتدخل بالصنيه هدخل انا ليه

نجوي بغضــ,,ـب : اولع في نفسي منكم ما المتخلفه عامله فيها مكسوفه يلااا واحده تشيل الصنيه اخلصوو

” نهال شالت الصنيه بضيق ودخلت ورا نجوي ووشها في الارض ”

نحوي حذت الصنيه علي الطربيزه وسلمت علي الكل : نورتونا والله العظيم

” نهال حطت الصنيه علي الطربيزه وايدها بتترعش ، ادهم متابع كل تفاصيلها بتركيز ، جسم متناسق بشره بيضه حواجب تقيله عيون واسعه سودا ابتسامه رقيقه وكسوف شديد واضح عليها ”

سلوي مسكتها من ايدها وشدتها جنبها بفرحه : بسم الله مشاء الله تعالي جنبي يا قمر

” نهال بصت لجدها انها تقعد هز راسه فقعدت ببتسامه ”

” نجوي عيونها علي الباب مستنيه بنتها تدخل مبتدخلش ، وزينب قلقانه ليفكرو ان نهال العروسه ”

سالم بهمس : ايه رأيك ؟

ادهم بإحراج واضح عليه : احمم كويسه

سالم : يعني اتكلم ؟

ادهم ابتسم وهو باصص ليها وهي بصه في الارض : اتكل علي الله يا حاج

سالم : طبعا كلنا عارفين احنا موجودين هنا ليه النهارده انا يشرفني اطلب ايدك الانسه ” وشاور علي نهال ” لادهم ابني ردك ايه يا حاج راشد

” كل اللي في القعده الصمت سيطر عليهم بما فيهم نهال ، هل يعتقدو انها العروس ، واين تغريد لما تأخرت ”

نجوي قامت وقفت وهي حاسه ان الدنيا بتدور بيها : استأذنكم ثواني ” وخرجت علي برا ووراها زينب ”

” في اوضة تغريد ”

نجوي بجنون : قلعتي الطرحه لييييه يا همي في الدنيااا وقاعده تعيطي لييه ومدخلتيض ورايا ليه الناس فكرو نهاال بنت عنك العروسه

تغريد بدموع : الف مبروك ليها انا مش عايزه اتجوز مش مرتاحه في العريس دا اكيد مش هتجبريني

نجوي لطمت علي وشها : يخرابي الحقيني يا زينب البت بتقولي مش عايزه العريس

زينب : طب اهدي بس يا نجوي ” وبصت لتغريد ” مش عايزه العريس ليه يا تغريد اطلعي يحبيبتي الله يهديكي شوفيه لو معجبكيش مش هنجبرك يا قلبي انا دلوقتي هقولهم ان نهال مش العروسه وتدخلي معايا يلاا

تغريد بنهيار : لو طلعت والله العظيم لطردهم كلهم انا مش عايزه اتجوز افهموني انا مش جاهزه نفسيااا

راشد دخل عليهم الاوضه : في ايه البت مطلعتش ليه ومين اللي دخل نهال بصنية الكاكولا ” وبص علي نجوي اللي اديها علي دماغها بتعيط وتغريد اللي بتعيط ” في ايه ؟

زينب بقلق : تغريد مش راضيه تطلع ومش عايزه العريس

راشد بستغراب : مش عايزه العريس ازاي وجايا تقول والراجل برا هو لعب عيال ” وبص شويه علي تغريد المنهاره  ” يلا خير تعالو لما نشوف هنعمل ايه في المصيبه دي ما هو دا اخرة الواحد اللي يعتمد علي نسوان في حاجه ” وراحو علي الصالون ”

” في الصالون ”

” الكل قعدو من جديد لكن بدل الفرحه اتحولت لقلق عند الكل واولهم نهال خافت ليخطبوها هي مش تغريد ”

سالم ببتسامه : نستأذنك يا راشد بس ادهم يقعد مع العروسه شويه لوحدهم لو ممكن

رامي لسه هيرد ويقول انه هينادي علي العروسه رد راشد بداله : نهال خدي ادهم وروحو البلكونه يحبيبتي اتكلمو شويه مع بعض

نهال بصت لجدها بستغراب : اناا ؟

سلوي بفرحه : قومي يقمر اقعدو شويه مع بعض واتكلمو سوا يلاا يلااا “وبتزقها ”

” نهال مشيت وهي مش فاهمه حاجه ووراها ادهم اللي مش عارف هي وخداه فين ”

ادهم بستفسار : هي فين البلكونه ؟

” نهال شاورت عليها من غير ما تبصله هو راح عليها وهي وراه ، راحو قعدو علي الكنبه الموحوده في البلكونه بينهم مسافه ولا هو بيتكلم ولا هي بتتكلم ”

ادهم بعدم فهم : كانو بيقولو اسم العروسه تغريد مش نهال علي ما اعتقد ؟

نهال وهي بصه علي اديها بتوتر : المفروض بس مش عارفه جدي طلب مني اقعد انا ليه تغريد كانت المفروض تدخل البيبيس بس اتوترت وانا دخلته مع مرات عمي مكانها

ادهم بعدم فهم : مش فاهم مين العروسه دلوقتي انتي ولا هي ؟

” نهال اخيرا رفعت عيونها تبصله اتلجمت ولا عرفت تبررها قعدتها معاه ولا فاهمه هي قاعده ليه ولا عارفه تغريد مطلعتش ليه ، ادهم بصلها يركز في ملامحها شاف توتر وقلق ”

ادهم بنبره حنونه : طب اهدي انتي قلقانه ليه كدا مبعضش والله ؟

دخل راشد عليهم : قطعت عليكم الكلام بس اللي عايز اقوله نهال اللي تستاهلك وانت تستاهلها يا ادهم يابني ” وبص لنهال ” لو شايف فيه غلطه واحده عمري ما كنت هديكي ليه خليكي واثقه في اختيار جدك

” نهال كل تفكيرها في الكليه هتعمل فيها ايه هتروح ازاي هتوفق بين حياتها الزوجيه وحياتها الدراسيه ازاي والسؤال الاهم هتعيش في العزبه ازاي ”

ادهم بصوت عالي نسبياً : انتي سمعاني ولا انا بكلم في نفسي ولا اي ؟

نهال بنتباه : هاا معلش عيد كنت بتقول ايه

ادهم اتنهد بصبر : تمام كنت بقولك عرفيني علي نفسك كل اللي اعرفه عنك انك اسمك نهال عايز اعرف اكتر

نهال بصتله بتوتر : انا نهال عندي ٢٠ سنه رايحه تانيه جامعه في كلية اثار ” استنت منه اعتراض علي كليتها لكن شافته مركز ومستني الباقي اتنهدت وكملت ” انا وحيده مليش اخوات بابا متو.في من سنه و٩ شهور ومن وقتها وانا ماما قاعدين لوحدنا في بيتنا بس معانا جدو والعيله هنا بس الاهم انا عايزه اكمل كليتي

” ادهم مركز مع كلامها وتفاصيلها توترها وخوفها كل حاجه فيها عجباه اوي ”

ادهم ببتسامه : طيب ومين اللي قال انك مش هتكملي كليتك ؟

نهال : اقصد يعني في رجاله مبتحبش تتجوز واحده تكون لسه بتتعلم بيقولو انها اخر اهتماما.تها جوزها وبيتها

ادهم ابتسم : لاء كليتك هتروحيها عادي مفيش حاجه هتتغير بس الاهم انا اكون اول اهتماما.تك ومحسش بتقصير منك وانا عن نفسي اوعدك ان مقصرش معاكي في حاحه ومليش بركه الا انتي انا بسافر ممكن افضل سنه مسافر وباجي اجازه ٣ شهور ف هيكون عندك وقت تذاكري وتروحي كليتك عادي وفي نفس الوقت تكوني واخده بالك من امي وابويا

نهال بصدمه ودهشه : امك وابوك علي عيني وراسي بس بتفضل سنه مسافر طيب وقتها انا هعمل ايه ؟

ادهم رفع حاجبه : هتعملي ايه مش فاهم هتفضلي قاعده مع اهلي وفي بيتك لحد ما ارجع اجازه

نهال بستفسار : يعني انت لسه جاي امبارح علي حسب كلام جدي يعني لو اتخطبنا هنفضل مخطوبين لحد ما تنزل اجازه ونتجوز ؟

ادهم بصراحه : مش عايز خطوبه هنتجوز علطول انا شقتي خلصانه يدوب هنختار العفش ونجيبه وخلاص خلصت

نهال بستنكار : انت جاهز افرض انا مش جاهزه ؟

ادهم اتنهد بقوه : انا حالي ميسور الحمدالله هساعد في العفش الناقص اول عن اخر الحجات دي جايا بيتي مش رايحه لحد يعني ثم ان بعدين مفيش انا وانتي بعد كدا

” نهال مش هتنكر اعجابها بشخصيته ولا بكلامه واسلوبه لكن برضو هي مش فاهمه هي مكان تغريد ليه وتغريد فين ”

ادهم قام وقف : تمام لو خلصنا كلام تسمحيلي انا اطلع لجمـ,,ــــاعه

نهال وقفت وبصتله بتوتر  : اه تمام اتفضل ” خرج ادهم وراح قعد معاهم في الصالون ووراه كانت نهال اللي حسه بتوهان ”

رامي اول ما شاف ادهم دخل الصالون ابتسم : تعالي يغالي اقعد

ادهم ابتسم لتقديره وقعد : حبيبي يعم رامي اتفضل اقعد

سالم ببتسامه : هاا نقول مبروك ؟

ادهم ابتسم بإحراج : بإذن الله خير محدش يقدر يرفض الانسه نهال

راشد بص لنهال المكسوفه وفي نفس الوقت تايهه هو حاسس بيها : وانتي يا نهال ايه رأيك ؟

نهال وشها احمر وضر.بات قلبها زادت وبصت لجدها : كويس في الاول والاخر الكلمه كلمتك يجدي

سلوي ظغرطت بفرحه وقامت حض.نت نهال : الف مليون مبروك يحبيبتي

نهال حض.نتها وهي بصه علي امها : الله يبارك فيكي

ادهم بهدوء : طيب انا حابب اعرفكم دا بعد اذنكم طبعا انا جاي اجازه ٣ شهور ومسافر تاني ف عايز يعني الفرح في خلال ال ٣ شهور دول مقدر ان انا اللي مستعجل علشان كدا بإذن الله اي حاجه ناقصه في جهاز نهال هتحمل بيها انا قولتو ايه ؟

راشد ببتسامه : نهال حاجتها كامله مكمله من كله وانا مقدر استعجالك وبإذن الله بكرا هعرفكم الرد ان شاء الله

ادهم ببتسامه : ان شاء الله.

” نهال اندمجت في الكلام مع ام ادهم لكن جواها مش مرتاحه للخطوه دي وفي نفس الوقت مش عارفه تصغر جدها ، زينب زعلانه علي زعل نجوي هي عارفه ان مهما بينت انها فرحانه جواها زعل ان بنتها عملت فيها الفصل دا وفي نفس الوقت هي مبسوطه بأدهم لبنتها ”

” ادهم بيتكلم مع الرجاله لكن عينه كل فتره بتروح علي نهال بيتابع ابتسامتها وتركيزها وكلامها ورقتها بيبتسم تلقائي ، لحد ما ادهم اخد اهله ومشيو ، ونهال روحت مع امها بيتهم ”

” في بيت زينب ”

زينب عملت كوبايتين شاي وطلعت البلكونه لزينب اللي سانده علي السور سرحانه ”

زينب بمرح : لاء مش متعوده عليكي ساكته وهاديه كدا بركاتك يا ادهم

نهال بصت ليها ورجعت بصت لشارع : عقلي مش قادر يستوعبها في اي عريس جاي لبنت عمي وفي ايه انا اللي اتخطبت بدالها ؟

زينب بهدوء : نصيب محدش عارف الخير فين بس بيني وبينك انا مرتاحه لادهم دا هتكلم معاكي بصراحه انا عايزه اطمن عليكي من راجل يقدر يعيشك مرتاحه ومبسوطه

نهال بقلق : يا ماما ماشي انا مقدره كل دا بس معقول هروح اعيش في العزبه ؟

زينب : انتي مالك بالعزبه ادهم باين عليه واد ابن مدينه شيك يعني هيبسطك ولا عيزاني اروح اجوزك لواحد فقير تخدي بخت امك ابوكي مكنش شايل عني حاجه بس برضو العيشه كانت علي القد يا نهال وانا مرتاحه لادهم دا

نهال : ماشي بس برضو مش عايزه اتجوز واحد لمجرد انكم شايفينه مناسب ليا انا عايزه اتجوز واحد احبه

زينب بهدوء : الحب حب افعال واحد دخل البيت من بابه طالبك في الحلال الحب هيجي بالعشره وبالموده فكري في كلامي وانتي حره بس من رأيي باب ميترفضش

” نهال عارفه ان امها معاها حق الحب افعال وهي اول عن اخر هتتجوز ف تتجوز لواحد يعتمد عليه احسن ما تتجوز واحد مستهتر يبهدلها متنكرش انها اعجبت بشخصية ادهم وكلامه واسلوبه ”

نهال بصت لامها : بلغي موافقتي لجدي واللي هو شايفه صح يعمله ” واخدت كوباية الشاي تشرب منها ”

زينب ببتسامه : ربنا يسعد قلبك ويتمملك علي خير يقلبي بكرا اخدك ونروح نجيب باقي هدومك الناقصه

نهال بستغراب : هدوم ايه اللي ناقصه دي ؟

زينب بغمزه : هدوم العروسه بقا اشي عريان واشي بشراشيب واشي مشخلع والحجات السافله دي

نهال ضحكت بسخريه : دا انا لو متجوزه واحد دايبه فيه مش هلبسه المشخلع والعريان علشان البسه لسي  ادهم دا

زينب بتأكيد : هتلبسي وارهنك انك بعد الجواز اللي هتطلبي مني اجيبلك منهم

نهال شربت من الشاي بسخريه : انا البسه عريان وبشراشيب ليه بجما.تي قصرت معايا في ايه اسكتي والنبي ومتكلفيش نفسك علي الفاضي الهدوم اللي جبتيها تكفي وتفيض اللي هتجبيه دا هيتركن في الدولاب وخلاص

زينب : مش مشكله نجيب واركني احسن ما يقولو مجابتش هروح اكلم جدك اعرفه انك موافقه والصباح رباح ” وسابتها ومشيت ونهال دخلت دوامه من الافكار هتعيش مع واحد من غير ما تعرفه ازاي لاء والانيل انه هيكون جوزها بيه حقوق وعليها واجبات ودا اجباري ومفروض عليها هتتعامل معاه ازاي وهل هتعرف تتعامل مع اهله ولا الوضع هيبقي ازاي ”

………………………………

” في العزبه ادهم قاعد في البرنده علي الكنبه سرحان ومبتسم ، رقتها وخجلها محببين اوي لقلبه شغلت باله من اول يوم رغم انه كان عايز يتجوز وخلاص مكنش في باله انه يفكر فيها حتي لكن الوضع مختلف ”

سلوي جت جنبه ببتسامه : اللي واخد عقلك يتنهي بيه

ادهم ضحك بخفه : اللهم امين يا ست الكُل

سلوي بفرحه : نهال عجبتك يا ادهم ؟

ادهم بجديه : فيها الحلو وفيها الوحش بس الحلو اللي فيها لحد الان مغطي علي الوحش اللي فيها وبارب تفضل كدا علطول

سلوي : بإذن الله هتبقي زي العسل وربنا يتمم علي خير وتكون من نصيبك يا قادر يكريم

ادهم لسه هيتكلم كان رقم راشد بيرن علي فونه استغرب وقال : جدي راشد بيرن

سلوي بلهفه : طب رد شوف هيقولك ايه

ادهم فتح : الو السلام عليكم

الفصل الثالث 3

ادهم بهدوء : السلام عليكم ازيك يا جدي راشد

راشد ببتسامه : وعليكم السلام يغالي انا عارف ان اتصالي في اخر الليل دا عملك قلق س والله من فرحتي معرفتش استني لصبح

ادهم ببتسامه : ترن في اي وقت ومن غير ما تفكر بس ايه الموضوع اللي فرحك دا بقا

راسد بستنكار : يوااد يعني انت مفهمتش خالص علي العموم مش هكسفك انا اتصلت اقولك ان نهال موافقه

ادهم ابتسم اوي : علي بركة الله ربنا يقدم اللي فيه الخير ان شاء الله وانا بوعدك ان اخليها ملكه متوجه والله العظيم

راشد ببتسامه : عارف ومتأكد من كدا والله انا بديلك نهال يعني الوحيده اللي اخدت الدلع كله اديتك اجمل بناتي قلبا وقالبا وبإذن الله هستناك تيجي نحدد معاد كتب الكتاب

ادهم : خلاص اتفقنا بس عندي طلب ومحرج جدا والله وانا بطلبه

راشد : انت دلوقتي زي احمد ابن رامي ابني مفيش ولا احراج ولا كسوف وانا لو اقدر والله ما هتأخر

ادهم بشكر : الله يخليك يا جد والله معزتك غاليه في قلبي بس كنت عايز رقم نهال

راشد ببتسامه : كنت مستنيك تطلبه بصراحه المهم اكتب ورايا ” ادهم سجل الرقم وقفل مع راشد وهو حاسس براحه نفسه رهيبه حاسس بنبساط ”

سلوي بفرحه : عارف لولا العزبه كلها نايمه والدنيا ليل كنت رقعتلك زغروطه وصلت لدكرنس من شدة فرحتي ربنا يتمملك علي خير يكبدي

ادهم باس راس امه بحب : ويخليكي ليا يا ست الكُل السؤال الاهم انتي سايبه ابويا نايم لوحده في الاوضه ليه بقا

سلوي بعدم فهم : ما هو نايم شخيره موصل لودنك اهو اقف جنبه احرسه علي ما يصحي ولا اي

ادهم ضحك وحض.ن امه : هتفضلي مش فاهمه حاجه برضو مهما كبرتي انا اقصد يعني سايبه الراجل وجايا تقفي معايا انا يغير برضوو

سلوي ضحكت : اااه مش تقول كدا لاء يا اخويا اطمن ابوك اذان العشاء بيجي عليه بيقولك النهار طلع شقطني بدري وضيع شبابي

” ادهم وامه فضلو صاحيين يضحكو لحد اذان الفجر هي صلت في البيت وادهم نزل يصلي في المسجد اللي جنب البيت علطول ، خلص صلاة وفضل قاعد يبص علي الاراضي شويه بعدين طلع غير هدومه ونام في اوضته علي سريره يتقلب في السرير ”

ادهم بزهق : استغفر الله العظيم طب انا مبنمش ليه ايه اللي مصحيني لحد دلوقتي ” ومسك فونه وفضل يقلب فيه بعدين قفله ورماه علي السرير وقام فتح الشباك بتاع الاوضه يشم هوا ، لكن الوضع كان ابشع مما تخيل اول ما فتح الشباك دبان كتير جدا دخل الاوضه وريحه الزريبه اللي جنب بيتهم ماليه المكان قفل الشباك بسرعه وقرف ” يخريب كدااا دا الريحه تسطل وايه الدبان دا كله

” رجع تاني نام علي السرير وسند راسه علي مخده وراه ومسك الفون تلقائي ايده جت علي رقمها ”

ادهم بستغراب : انا عامل زي المراهق اللي بيحب جديد ايه اللي انا بعمله دا ” وغمض عينه وفكر طب ما انا من حقي اكلمها ليه لاء فتح عينه ورن علي الرقم ” حلو الساعه داخله علي ٧ اهي يعني تكون صحت اكيد

نهال كانت نايمه بعمق والفون تحت المخده فتحت عينها بضيق من صوت الفون وردت بنوم : الوو

ادهم بنبره رجوليه : صباح الخير يا نهال

نهال شالت الفون من علي ودنها وبصت فيه تتأكد انه بيكلمها في الوقت دا وقالت بهدوء : صباح النور

ادهم ببتسامه خفيفه : صحيتك من النوم ولا ايه ؟

نهال قعدت علي السرير وقالت بصوت مبحوح اصر النوم : لاء ولا يهمك مفيش حاجه تتصل في اي وقو ميهمكش

ادهم ابتسم علي رقتها واسلوبها الراقي في الكلام : والله شاورت عقلي اكتر من مره قبل ما اتصل لكن مقدرتش متصلش عارف انك مستغربه الوضع حوازه في يومين خصوصا منعرفش بعض ف بحاول علي قد ما اقدر اخلق فرصه تعرفنا ببعض اكتر

نهال ببتسامه : الموضوع غريب بنسبالي عريس بنت عمي انا اللي اخدته متضايقش من توتري وقلقي انا مكنش عندي اي علاقات او تجارب قبل كدا ف تلاقيني بلخبط في الكلام ومعرفش بقول ايه

ادهم ابتسم بخفه لما عرف انه اول حد في حياتها : هستحمل وواحده واحده هتتعلمي كل حاجه وتبقي زي العسل وكمان لما تيجي هنا هتتبسطي هنا جميله ونوال هيسلوكي

نهال بستغراب : مين جميله ومين نوال ؟

ادهم : جميله بنت خالتي ونوال مرات صلاح اخويا الصغير عندها بنوته اسمها غزل ٤ سنين

نهال ببتسامه : ما شاء الله ربنا يخليها يارب طب كويس ان فيه بنات من سني

ادهم ضحك ضحكه خفيفه ولسه هيرد الباب خبط : ثواني خليكي معايا ” وقال بصوت عالي نسيا ” ادخل

صلاح فتح الباب ووقف بغمزه : صاحي بدري يعني

ادهم برفع حاجب : حرام اصحي بدري يعني ولا ايه مش فاهم

صلاح بضحك : ولا حرام ولا حلال مدام صاحي يلا تعالي افطر معانا لقمه امك حطت الاكل علي الطبليه متتأخرش

ادهم : تمام ٥ دقايق وهتلاقيني وراك خد الباب في ايدك يا ابو غزل الله يصلح حالك ” واتكلم بهدوء ” كنا بنقول ايه ؟

نهال بضحكه بسيطه : كنا بنقول انت تروح تفطر وانا هلبس علشان هروح مع ماما اجيب شوية حجات نقصاني

ادهم بجديه : تمام رقمك دا عليه فدافون كاش ؟

نهال بستغراب : ايوا بس اشمعنا

ادهم : بصي كدا كدا العريس عليه فستان الفرح والمكياج والحجات بتاعتك دي كلها وانا حقيقي مبعرفش اختار ولا فاهم حاجه فيهم ف هبعتلك فلوس وانتي اعملي اللي يريحك

نهال بدهشه : طيب بس لسه بدري علي فستان الفرح

ادهم حط السماعه وهو بيغير هدومه وبكلمها : ولا بدري ولا حاجه علي ما تحجزي الفستان وشوفي بتعملي ايه تاني هنزل ابعتهوملك دلوقتي ابقي اسحبيهم بقا هقفل افطر وانتي لما ترجعي ابعتيلي رساله علي الواتس ارنلك

نهال برقه : خلاص ماشي يلا مع السلامه

ادهم ببتسامه علي رقتها : يسلم قلبك ” وقفل معاها وهو مبتسم اوي ” حتت البسكوته دي هتيجي تعيش في العزبه وتشوف المناظر اللي هنا دي ازاي

سلوي بصوت عالي من الصاله : الفطار برد يا ادهم يلااا تعالي

غزل قامت من علي رجل نوال راحت خبطت علي الباب بتاع اوضة ادهم : يا عموو البيض قرب يخلص تعالي يلا

ادهم فتح الباب ببتسامه وشال غزل علي ضهره : اوباا غزل هانم بنفسها جايا تصحيني علشان افطر

صلاح بغمزه : قال يعني الباشا مش صاحي يكلم في العروسه من النجمه

” نوال برقت لصلاح انه يسكت ”

سلوي : ما يكلم ويتبسط امال احنا جيبنها ليه علشان تبسطه واشوف وشه منور ببتسامته كدا

ادهم قعد جنب ابوه علي الطبليه وبدء ياكل : الحاج راشد كلمني امبارح بليل وقالي العروسه موافقه ومستني معاد نروح نتكلم في تفاصيل كتب الكتاب

سالم وهو بياكل : امم طب وانت شايف ايه لو جاهز نروح بكرا نتفق وكتب الكتاب والدخله مع بعض

صلاح : الاول انت ناوي تكتب قايمه بقد ايه وكام جرام دهب ؟

سلوي : هو ايه اللي قايمه بكام وكام جرام دهب احنا هنجيبلها ٦٠ جرام زي مراتك وقايمه بالحاجه اللي هتجيبها وفي الاخر دا حبر علي ورق

ادهم : اهو الحبر علي ورق دا بعدين بيخرب البيوت انا ربنا شاهد عليا ناوي عمار للأبد بس الله اعلم الدنيا مخبيه ايه وحوار الدهب والقايمه دي نتفق عليه لما نقعد مع الرجاله هناك

سالم : صح كدا كلام سليم لما نروح ونتفق معاهم الاول ونشوف هنعمل ايه هاتي رغيف عيش يا سلوي

……………………………….

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى