عام

ادهم انا بولد

” في بيت رامي ”

” نجوي قاعده في الصاله ورابطه راسها بالطرحه من كتر الصداع متغطيه بالبطانيه من البرد  الجرس رن ”

نجوي : احمد تعالي افتح الباب مش قادره اقوم افتح

احمد خرج من اوضته بنرفزه فتح الباب ضحك بسخريه لما شاف نهال : ايه الاحترام دا كله اول مره تيجي عندنا ترني الجرس علطول بتكس.ري الباب من الخبط

نهال بغيظ : ابعد يلا من طريقي امك واخواتك البنات فين ؟

نجوي سمعت صوتها : تعالي يابت يا نهال ادخلي انا هنا والمايله الكبيره مدفونه في اوضتها وضحي في الدرس

نهال دخلت وقعدت جنبها : يسلااام علي الدفي الجو برا متلج والله يا نجوي

نجوي ببتسامه : امال انتي لابسه هدوم خروج كدا وراحه علي فين ؟

نهال بصتلها : راحه انا وامي نجيب باقي الهدوم بتاعت جهازي علشان تقريبا اول ما اخلص العفش بتاعي هيروح العزبه

نجوي : ربنا يتمم عليكم بخير يارب يحبيبتي

نهال بتوتر : نجوي انتي مش زعلانه مني ؟

نجوي بستغراب : وانا هزعل منك ليه

نهال بتوتر اكبر : يعني العريس كان جاي لتغريد وانا اللي اتخطبت ليه ف قولت اكيد انتي وتغريد شايلين مني قولت اجي افهمكم انا والله العظيم موافقه من كتر زن امي علي دماغي وو

نجوي بمقاطعه : اسكتي دك ضر.به انا هزعل لما تتجوزي واشوفك عروسه دا يبقي يوم الهنا والمني انتي وضحي وتغريد معزه واحده التلاته بناتي وبعدين انتي ملكيش ذنب المايل حالها بنتي عي اللي رفضت وقالت مش عيزاه وقالو بدل تغريد تبقي نهال وتغريد ايه ونهال ايه الاتنين عيالي

نهال ابتسمت وباست خدها : ربنا يخليكي ليا يا اغلا نوجاا في الدنيا كلها هقوم انا امشي زمانها نزلت الشارع هتلج

نجوي : وانتي راجعه عدي علياا يابت اشوف الهدوم الجديده

نهال من علي السلم : حااضر يلاا سلام ” ونزلت وهي مبسوطه من عند نجوي راحت تشوف امها اللي كانت وافقه مع جدها ” صباح العسل يا راشد

راشد : صباح الجمال علي عروستنا

زينب : جدك بيقول نجهز العفش علشان بعد ما نمضي القايمه هنودي العزال علطول

نهال بعدم فهم : طيب مش لما نبقي نمضي القايمه هنجهز الحجات من دلوقتي ليه

راشد : ما هما ممكن يجو بكرا ولا بعده بالكتير يمضو القايمه لما عزال ادهم توصل الشقه بس وبعدبن هنبدء نجهز لكتب الكتاب انتو راحين علي فين دلوقتي في التلج دا

زينب وهي بتتاوب: مكنتش عايزه انزل علشان التلج اللي في الجو دا بس لازم اجيب الحجات الناقصه في جهاز نهال

نهال قالت بتردد : وادهم حولي فلوس علشان احجز فستان الفرح والميكب هحجزهم بالمره

راشد ببتسامه : ربنا يتتم علي خير ” وطلع مبلغ من حيبه حطه في ايد زينب ”

زينب برفض : انت بتعمل ايه يا حاج معايا والله العظيم

راشد بصرامه : بعمل ايه في ايه انا كنت طالع عندكم اديكي الفلوس لولا لقيتك واقفه في الشارع بعدين هو انا بدي لحد غريب دا بنتي يوليه امسكي

زينب مسكت الفلوس بإحراج : تعيش وتجبلها يا حاج المهم هنمشي احنا علشان نلحق نيجي قبل بليل مش عايز حاجه اجبهالك وانا جايا

راشد : سلامتكم يلا روحو ولو احتاجتو حاجه اتصلو عليا علطول

” زينب اخدت نهال ومشيت تروح محلات وسط البلد تجيب ليها اللبس اللي ناقص زينب ماشيه عماله تختار كل اللي تشوفه مناسب للعرايس ، ونهال ماشيه جنبها حاسه انها مش فاهمه حاجه امها بتختار كل دا ليه يعني هل هي لازم تلبس الحجات دي طب ما هي ممكن تلبس لبسها العادي وتعود جوزها ان دا نظامها وكانت هتعترض علي كل اللبس اللي امها بتجيبه بس شافت امها مبسوطه وفرحانه سكتت ومردتش تكس.ر فرحتها ”

نهال : ماما انا عايزه اجيب شربات تقيله اوعي تنسي

زينب بستغراب : شربات تقيله ليه هتلبسي لجوزك اللي هيقعد معاكي اقل من شهرين شربات تقيله

نهال بعصبيه : لا اله الا الله الموضوع زايد عن حده اقسم بالله احنا في عز الشتا والدنيا برد وعايزه شربات علشان ادفي رجلي وانتي تقوليلي جوزك هو ايه دخله في الشراب وخلتيه جوزي امتي ؟

زينب بصت علشان الناس تشوف حد سمعها ولا لاء وبصت لبنتها : انتي عايشه في الحياه تعملي كل حاجه بتضايقني الله يكون في عون الراجل قسما بالله تعالي يا بلوه نجيب جوز شربات

………………………..

” بعد اذان المغرب كل بيت في العزبه اتقفل ونامو مستحيل في الوقت دا وخصوصا في فصل الشتاء تلاقي حد في الشارع ”

” ادهم واقف في البنرده لابس هيكول اسود وبنطالون بيتي رصاصي ماسك فونه بيتكلم فيه ”

ادهم : بالظبط بدأت تفهمني الشقه كلها مودرن ف عايز حاجه تكون عمليه ونضيفه بعتلك صور عايز حاجه شبيهه ليهم

صاحب معرض الخشب : بكرا العصر بالكتير اوي العربيه بالعزال هتكون قدام بيتك

ادهم : خلاص بإذن الله هستناهم ” وقفل معاه ”

سالم جيه وقف جنبه : انت يابني مش سقعان ايه اللي موقفك برا كدا

ادهم : الجو دا حلو بنسبالي بس متخيلتش ان مصر برد اوي كدا في الشتا انا هناك في الشتا بلبس بنص كم عادي الجو بيقي حر

سالم : كنت بتكلم مين كدا في المحمول ؟

ادهم بتنهيده : كنت بكلم المعرض بتاع العفش بأكد عليهم في العفش اللي انا طالبه بدل ما يبعتو حاجه تانيه يدبسوني فيها

سالم طبطب علي كتفه : ربنا يقويك هنعمل الفرش بتاع الفرح في الشارع هنا ولا ليك تخطيط تاني

ادهم : والله يبا لسه محددتش بس بنسبه كبيره هنعمل خيمة لطباخ في الشارع هنا والفرح في قاعه علشان كتب الكتاب هيتكتب في قلب القاعه

سالم : خلاص ماشي ربنا يسهل وطرقه وهتعدي بكرا هخلي امك ونوال يطلعو يكنسو الشقه ويمسحوها علشان العزال تيجي تطلع علي نضافه

ادهم : طيب جهز نفسك بقا بكرا بليل نروح نمضي القايمه هتعرف عمي رجب ولا لاء ؟

سالم بتنهيده قويه : والله انا من الواجب هعرفه وهعرف الشيخ عطيه واللي يجي يجي واللي ميجيش ميجيش

ادهم : خلاص ماشي المهم عرف عمي وتبقي عملت اللي عليك

سالم : هعمل كدا الصبح يلا تصبح علي خير انت بقا لأن دماغي تقلت وعايز اخدلي تعسيله لصبح كدا

ادهم ضحك بخفه : طيب ادخل خدلك تعسيله لصبح يا حاج سالم اصحيك في صلاة الفجر ؟

سالم وهو بيتاوب : ايوا صحيني ننزل نصلي في الجامع

” سالم دخل ينام بدري كالعاده وادهم فضل واقف في البرنده شويه لحد ما حس بالبرد دخل علي اوضته ، حط فونه علي الشاحن ولسه هينام علي السرير الفون بعت رساله ”

الرساله كانت من نهال : انا لسه داخله البيت حالا

ادهم بص علي الرساله وكتب : مش راجعه متأخر شويه ؟

نهال بعتت : كنت بحجز الفستان والميكب وكنت بجيب باقي جهازي ولما خلصنا

ادهم بص علي الرساله ورن عليها ردت برقه : الوو

ادهم نام علي السرير وحط الفون علي ودنه : حمدالله علي السلامه

نهال وهي بتسرح شعرها والسماعه في ودنها : الله يسلمك

ادهم بستفسار : اشرحي الفستان اللي حجزتيه كدا

نهال سكتت شويه بعدين اتكلمت : هو عادي مفيش في تفاصيل كتيره منفوش شويه وديله طويل من ورا بس

ادهم حاول يتخيل صورة الفستان بس معرفش : عاجبك يعني ومبسوطه بيه ؟

نهال : اه حلو .. انا سمعت ان بعد ما نمضي القايمه العفش بتاعي هيجي عندك

ادهم بستغراب : طيب ما دا الطبيعي العفش هيجي علشان يتفرش في الشقه ولسه عايزين ننزل ندور علي قاعه بس الكلام دا بعد بكرا لما نحدد معاد الفرح

نهال بتتاوب : خلاص ماشي اتفقنا ” ونامت علي السرير واتغطت كويس ” الجو برد اووي

ادهم : دي حقيقي الجو برد في مصر في الوقت دا في السعوديه بنام بلبس صيفي الجو هناك مش برد كدا خالص

نهال بنوم : وكمان تعبت من المشي النهارده مشينا كتير اوي

ادهم حس بصوتها انها عايزه تنام : طيب لو عايزه تنامي نامي بكرا اليوم هيبقي اطول عليكي

” ادهم بيتكلم ونهال اصلا مش سامعه هو بيقول ايه من شدة تعبها وارهاقها محستش بنفسها غير وهي غرقانه في النوم ، ادهم عارف انه بيتكلم وهي بتنام بس فضل يتكلم بحيث انها تنام خالص ولما حس انها نامت قفل وهو مبتسم ”

ادهم بتفكير : مصيبه لو كانت من النوع اللي بينام من المغرب بس لاء اكيد لاء يمكن نامت من التعب والارهاق ” غمض عينه وراح في النوم هو كمان من غير ما يحس ”

من ٤__٦

الفصل الرابع 4

” صباح يوم جديد ادهم صحي من النوم بدري جدا بص علي الشباك كان النهار طلع ”

ادهم بضيق : نايم بعد المغرب علشان صلاة الفجر متفوتنيش وبرضو فاتتني ” وسمع خبط علي الباب ”

غزل وهي بتخبط جامد : يا عمو افتح الاوكره طويله مش عارفه اطولها

ادهم ضحك وقام فتح الباب وشالها : دا ايه الصباح العسل دا

غزل ضحكت : بابا مش راضي يديني فلوس بيقولي مش معايا وجدو نايم مش راضي يرد عليا

ادهم بصلها بحب : طيب وغزالتي عايزه كام ؟

غزل بتفكير : انت معاك كام

ادهم باس خدها وهو فرحان انها ناصحه : طيب ايه رأيك اخدك الدكان وتختاري اللي انتي عيزاه

غزل سقفت : ماشي موافقه يلا هروح اقول لماما انا جايا معاك واجي ” ونزلت جري علي المطبخ تعرف امها ”

ادهم لسه مبتسم من كلام غزل سمع صوت زمارة عربيه وحد بيرن الجرس : اكيد الراجل بتاع المعرض بعت عربية العفش بس ابن النصــ,,ـابه كان بيقول العصر ” وبص في فونه ” باعتهم الساعه ٨ الصبح

سلوي لقت باب اوضة ادهم مفتوح دخلت : ادهم عربية العزال وصلت تحت

ادهم اخد محفظته وفونه وباس دماع امه : طالعلهم اهو يغاليه بس معلش هتعبك اعملي دور شاي ” وطلع من البيت ووراه سالم وصلاح ”

نوال طلعت وهي شايله غزل : في ايه يا ماما مين الناس اللي برا دي

سلوي : دا عربيه جايبه عزال ادهم من دمياط ادخلي اعملي دور شاي وتعالي ومتحطيش سكر هاتي برطمان السكر والمعلقه هما يحطو براحتهم ” وسابتها وطلعت تبص علي العزال من البرنده ”

نوال بصت عليه وهي رافعه حاجبها وقالت بهمس : رضينا بالهم والهم مش راضي بينا لا جوز بيريح ويقول كلمه حلوه وحما محسساني ان الخدامه اللي شغاله عند اهلها ” ودخلت علي المطبخ تعمل الشاي وهي حاسه انها هتتفجر ”

ادهم سلم علي الرجاله : طيب العزال دي هتدخل منين

صلاح بصله : هطلع افتح البوابه اللي بتطلع علي الشقق فوق وافتح شقتك علي ما الرجاله تطلع العزال

” ادهم هز راسه وصلاح طلع فتح البوابه والشقه والرجاله طلعو العزال علي الشقه برفقة ادهم اللي معاهم خطوه خطوه ، وسلوي اللي بتزغرط بفرحه ، والجيران كلهم طلعو يتفرجو وهما مستغربين امتي ادهم خطب علشان يجيب العزال ”

سالم جاب عصير وشاي ووزع علي الكل : عقبال عندكم جميعا

” نوال وقفت في البرنده وجنبها جميله وبيزغرطو بفرحه ”

جميله : انتي شوفتي العروسه ولا لسه يا نوال ؟

نوال بصتلها : لاء لسه بس امي سلوي بتقول العروسه زي فلقة القمر وبعدين بكرا نشوفها

” جميله بصت قدامها وفضلت ساكته وهي كلها حماس تشوف مرات ادهم شكلها ايه ، تقريبا كل البلد عندها نفس الحماس يشوفو مرات ادهم ”

…………………………………..

” الساعه اصبحت ٥ المغرب نهال قاعده في اوضتها قدام المرايا بتفكر هل دي خطوه صح في حياتها ولا هي استعجلت ، هي شايفه ادهم كويس ومتفهم بس هل بعد الجواز هيبقي كدا ولا هيتغير ، قطع تفكيرها دخول تغريد وضحي اللي بيزغرطتو ”

تغريد ببتسامه : هشووفك عروسه اخيرا يا نوووله

” نهال بصتلها وهي مش فاهمه حاجه مش المفروض تكون زعلانه انها هتتجوز عريسها لكن هي العكس دي مبسوطه وداخله بتزغرط ”

نهال بصتلها بشك : تغريد انتي كويسه ؟

تغريد ببتسامه : كويسه اوي كمان انتي مالك حساكي مش مبسوطه كدا ليه

نهال اتنهدت وبصت للمرايا تاني : انا كويسه بس علشان صاحيه بدري حسه بدوخه شويه

ضحي فتحت دولاب نهال وقالت بحماس : هتلبسي ايه النهارده ؟

نهال : مش عارفه في اكتر من حاجه في بالي بسه محددتش بفكر البس البدله السودا والهيلز الوردي والطرحه الوردي

تغريد بتفكير : هي حلوه بس اسود ليه ؟

نهال بلا مبالاه : النهارده مش كتب الكتاب يا تغريد علشان البس ابيض النهارده مجرد هيتفقو لسه علي القايمه يعني عادي بعدين مش عايزه البس الوان

زينب دخلت عليهم الاوضه وفي ايدها صنيه عليها كوباية ينسون كبيره : خدي اشربي الينسون هيريح بطنك امك فين يا تغريد

تغريد : جايا ورانا قولنا نسبقها نسقف شويه لنهال بس الظاهر انها معدومه العافيه مالها كدا ؟

زينب : عندها مغص وتعبانه من الصبح بتعيط من وجع بطنها

تغريد : اوبس طيب خدت مسكن يريحها شويه

زينب : هي تشرب الينسون وهترتاح علطول هطلع انا اخلص اللي ورايا الوقت بيجري مني ” وطلعت برا الاوضه ”

تغريد بصت لنهال بشك : تغريد انتي تعبانه من المغص ولا في حاجه شغله تفكيرك ؟

نهال بصتلها وهي بتشرب الينسون : مش واخده بالك ان في حاجه غلط المفروض انتي اللي تكوني العروسه مش انا ازاي بقيت مكانك وازاي انتي مش زعلانه اصلا ؟

تغريد ببتسامه : ببساطه انا مكنتش موافقه عليه من الاول لكن انتي عارفه امي وتحكما.تها انا مش جاهزه نفسيا لخطوة الجواز يا نهال ممكن محدش منهم يفهمني بس افهميني انتي انا حسه ان مش جاهزه بمعني الكلمه

نهال بصتلها بتركيز : ماشي انا فهماكي بس انتي مش جاهزه ليه قوليلي يمكن الخوف اللي عندك هو نفسه اللي عندي

تغريد اخدت نفس عميق : بصي يا ستي اولا انا معرفش اروح اعيش في عزبه ثانيا مش عايزه اتجوز في بيت عيله عايزه بيت بعيد عن حما.تي اكون مستقله بنفسي بالعربي محدش يتحكم عليا ثالثا مش عايزه جوزي يكون بيسافر لو لقيت كل الحجات دي في حد انا هوافق لكن كل اللي جم مفيش منهم حاجه من اللي انا عيزاها فهمتي

نهال بصتلها كتير وشربت من الينسون : مخاوفك نفس مخاوفي بس ادهم عنده شقه لوحده يعني مش هعيش في بيت العيله لو عايزه اتقسم واقعد في شقتي منزلش براحتي يعني محلوله

” تغريد لسه هترد عليها دخلت عليهم زينب ”

زينب : نهال جدك لسه قافل معايا الجمـ,,ــــاعه كلها نص ساعه ويكونو عندنا قومي اجهزي يلا

نهال شربت اخر شويه في كوباية الينسون : حاضر هقوم البس اهو بس هاتيلي الطرحه الوردي من علي المنشر بالله

زينب : طيب يلا ” وبصت لتغريد ” تغريد رني علي امك تجيلي ” وطلعت من الاوضه ونهال بدأت تلبس وتفكيرها كله مشتت ، وتغريد كلمت امها تيجي ”

………………………………

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى