رباب ضحكت بسخرية، وبدأت تقلع نقابها بهدوء وقالت:\
عادي، لقيتها زينة فقلت أجي أشوف جوزي، ليكون محتاج حاجة.
وقالت بابتسامة:\
بس وحياتك، واخدة بالك منه؟ مكنتش رجعت ولا قلقت عليه، بس معلش سؤال لو مفيهوش حرج، هو أبوكي يعرف إنك هنا ولا هيقلق هو كمان؟
البنت قالت برجاء:\
أحب على إيدك يا رباب، أنا والله ما أعرف.
رباب بسخرية قالت:\
وإيه اللي يفضح في كده؟ عادي، إيه يعني جاية دوار ابن العمدة؟
رشاد اتوتر قوي وقال:\
رباب، متصغرنيش، أمال همِّيها تمشي وهنتفاهم أنا وياكي، أنا عارف إن قلبك أبيض.
رباب بصت بشماتة وقالت:\
بس لولا قلبي الطيب ده…
رشاد اتنهد بارتياح، لكن ملامحهم اتغيرت لما رباب قالت:\
بس أنا لا أعرف سامح ولا أعرف كريم!
وصرخت بكل قوتها وقالت:\
يا لهوي! الحقوني يا خلق! انجدوني يا ناس!
في عصمتي بلوة
رشاد والبنت اتوتروا جدًا لما رباب فضلت تصوت.
رشاد جري عليها بانفعال وهو بيقول:\
اكتمي يا بت، هتفضحيني!
رباب بصت له وقالت:\
إنت لسه ما شفتش فضايح يا ابن العمدة!
وبقت تصوت أكتر.
مفيش دقائق وكان العمدة دخل البيت، وطلع فوق وبقى يخبط على أوضة رباب وهو بيقول:\
في إيه يا رباب؟ في إيه؟ افتحي يا بتي!
رشاد بلع ريقه بتوتر شديد، والبنت بقت في حالة ارتباك، وبص لها برجاء وقال:\
رباب، إنتي عارفة إني ماليش أي صلة باللي حصل معاكي من الأول.
ولسه هيكمل كلامه، سمع صوت شيخ البلد بيقول:\
إنت لسه هتتكلم يا وهدان؟ لتكون البنت حصل لها حاجة، نادي الغفر يفتحوا الباب!
البنت حطت إيديها على خدودها بدهشة وهي بتقول:\
أبويا يا مري! أبوي معاه!
رباب بصت لهم بابتسامة وقربت من رشاد وقالت:\
الستر من الله يا ابن العمدة، وليه عندك واحدة.
رشاد قال بسرعة:\
ليكي عشرة وعشرين قد ما عايزة، بس بلاش فضايح.
رباب ضحكت بسخرية وقالت:\
طب خبيها.
رشاد أخد البنت وخباها في الدولاب.
ورباب راحت فتحت الباب وقالت بخوف مصطنع:\
أيوه يا عمي.
العمدة قال:\
في إيه يا بتي؟ كنتي بتصرخي كده ليه؟
رباب قالت:\
ولا حاجة يا عمي، حية كبيرة قوي، اتخضيت وفضلت أصرخ، بس الحمد لله رشاد كان قريب وجيه وأبعدها.
العمدة اتنهد بارتياح وقال:\
هو إنت هنا يا رشاد يا ولدي؟ جيت إمتى؟
رشاد قال بارتباك:\
جيت على صوتها يا أبوي، كنت قريب وسمعتها بتصرخ.
العمدة اتنهد وقال:\
حصل خير، أنا كنت في المجلس قريب مع الرجالة وسمعناها بتصوت. المهم إن محصلش حاجة.
رشاد قال بتوتر:\
متقلقش إنت يا أبوي، حصل خير.
العمدة قال:\
طيب أنا نازل، الرجالة مستنيين تحت في المندرة، جم معايا وهنزل لهم.
رشاد قال بارتباك:\
يعني إنت هتفضل في المندرة؟
العمدة قال:\
أيوه، الناس جم معايا، كتر خيرهم.
رشاد بص لشيخ البلد اللي كان واقف معاه على جنب وقال:\
يعني هتفضلوا كلكم في المندرة؟
العمدة استغرب وقال:\
أيوه يا ولدي، أمال هنروح فين؟
رباب قالت بسرعة:\
لا، هو بس متوتر، الحية كانت كبيرة. روح إنت يا عمي شوف اللي وراك، وما تقلقش.
أبوه نزل هو وشيخ البلد، ورباب ضحكت جامد وقعدت على السرير.
رشاد بص لها بغيظ وقال:\
بتضحكي على إيه؟ دول هيقعدوا في المندرة، هننزلها إزاي دلوك؟
رباب ضحكت تاني وقالت:\
وأنا دخلي إيه بالهباب ده كله؟ زي ما دخلت تطلع!
رشاد اتنهد وقال:\
هي دخلت لما كان الدار فاضي، دلوك أبوي والرجالة تحت وهيشوفوها.
رباب بصت له بضيق وقالت:\
اتصرف زي ما فالح تعك افلح واتصرف!
رشاد اتنهد وطلع البنت من الدولاب وقال بانفعال:\
البسي إنتي كمان هدومك، خلينا نخلص في يومك اللي مش معدي ده.
البنت بقت تلبس بتوتر وخوف.
ورباب طلعت نقاب من بتوعها وعباية من الدولاب وحدفتهم عليها وقالت:\
البسي دول واطلعي كأنك واحدة من الخدم، محدش هيسألك أصلًا.
البنت ابتسمت بسعادة ولبست بسرعة.
رشاد فضل باصص من البلكونة لحد ما اتأكد إنها طلعت من الجنينة كلها، واتنهد بارتياح وقعد على السرير وهو حاسس إن رجليه مش شايلاه.
رباب ضحكت على منظره وقالت:\
أحلى حاجة في اللي حصلت دي إنك هتتربى، وهتتحرم تجيبها هنا تاني.
رشاد اتنهد بتعب وقال:\
لا ما تقلقيش، لا هي ولا غيرها، مبقاش فيا أعصاب أصلًا.
رباب ضحكت وأخدت هدوم من الدولاب وقالت:\
هدخل أستحمى، عايزة أطلع ألاقيك نظفت السرير وغيرت المفرش والمخدات وعطرتهم كمان، لأني زي ما قلت لك مش مرتاحة.
وأخدت الهدوم ودخلت الحمام.
رشاد بص لطيفها بضيق وقال:\
يا صبر أيوب من عندك يا رب!
وبدأ فعلًا يعمل السرير زي ما قالت له.
رباب دخلت الحمام، وأول ما دخلت وقفلت الباب اتكأت عليه وحطت إيدها على بقها علشان محدش يسمع صوت بكاها.
وبقت تبكي بانهيار، وهي مش قادرة تنسى المنظر اللي شافته، وحاسة بوجع شديد قوي في قلبها.
رباب قامت ومسحت دموعها واستحمت ولبست، ووقفت قدام المراية وهي بتحاول تصطنع الابتسامة والبرود، وبعدها خرجت من الحمام.
رشاد كان متابعها بعيونه، وهي وقفت قدام المراية بتظبط شعرها بمنتهى الهدوء وبتدندن مع نفسها.
رشاد اتنهد بضيق وقال:\
ما شاء الله عليكي، آخر رواق!
رباب بصت له بطرف عينها وقالت:\
وإيه اللي هيعكرني بقى؟
رباب كانت متضايقة من جواها، بس ضحكت وبصت له وقالت:\
مش لما تكون جوزي الأول!
ولسه هتمشي، مسكها من ذراعها وقال بانفعال:\
أنا جوزك يا رباب، ومش هسكت على عمايلك دي كتير.
رباب بعدت إيده عنها وقالت:\
مين اللي يسكت لمين؟ شكلك نسيت اللي حصل من شوية. أوعى تنسى إنك من دقايق كنت بتترجاني، ولولا إنك صعبت عليا إنت والسنيورة، كان زماني عرّفت البلد كلها اللي حصل بينكم!
رشاد ابتسم بسخرية وقال:\
لازم تفهمي إنها متهمنيش، لأنها لو كانت متربية مكانتش جات هنا ولا عملت كده. واللي بتعمله معايا ده بتعمله مع غيري، هي بس مش عايزة تتكشف، مش أكتر. وبالنسبة ليا أنا راجل، ومش هيضرني في حاجة لو كنتي اتكلمتي.
وقرب منها وبصلها بقوة وقال:\
أكتر واحدة كانت هتتضر هي إنتي.
رباب ضحكت بسخرية وقالت:\
لا متقلقش، أنا كده كده ما بمشيش خطوة في الكفر إلا لما بيشاوروا عليا، وبيقولوا: أهي دي مرت ولد العمدة اللي اتجوزها غصب علشان ياخد أرض أبوها الغلبان.
رشاد اتنهد بضيق وقال:\
أنا قلت لك قبل سابق موضوع الأرض ده ماليش صالح فيه. كان بين أبوي وأبوكي، وإحنا كنا كده كده هناخد الأرض بالمحكمة وبالعرف، بس عمك اللي قال إنه مش هيرفع محاكم ولا هياخد حاجة، مقابل إن رشاد يتجوز البنت؛ لأنها يتيمة وكانت عايشة من خير الأرض دي. كانت فكرته هو، وأنا قلت لك الحكاية دي قبل كده.
رباب بصت له بضيق وقالت:\
أيوه ما أنا عارفة، مالكش دخل، وأبوك قالك لازم تتجوزها، وإنت رفضت في الأول، لكن في الآخر وافقت، صح كده؟
رشاد ابتسم على عصبيتها وقرب منها قوي وقال:\
لا، محصلش كده. أنا أبوي قالي اتجوزها، قلت يا سعدي ويا هناي! مين ما يسمعش عن جمالك يا بنت الضواري؟ أنا شوفتك مرة مع أبوكي عند الدوار قبل ما تتنقبي، من بعدها عيني ما عرفت تشوف حريم واصل.
رباب فضلت تبص له بدهشة شديدة.
البارت الثاني – في عصمتي بلوة 3
أنا شوفتك مرة قبل ما تتنقبي مع أبوكي عند الدوار، من بعدها عيني ما عرفت تشوف حريم واصل.
رباب فضلت تبص له بدهشة شديدة.
رشاد قرب منها أكتر وقال:\
يمكن إنتي غصبوكي على الجوازة دي، بس أنا محدش غصبني واصل، أنا رايدك ورايدك قوي كمان.
رباب ارتبكت جامد وبلعت ريقها وبعدت عنه وقالت:\
آه، ما هو باين بأمارة الستات!
رشاد اتنهد وقعد على السرير وقال:\
إنتي عارفة إن إنتي السبب في ده كله؟ تقيلة قوي على قلبي إنك ترفضيني. أنا راجل وليا احتياجاتي، وألف حرمة تتمناني، ولولا إني مش عايز أقلل من نفسي كان هيبقى ليا تصرف تاني. بقالنا أكتر من شهر متجوزين، وإنتي مش مدياني فرصة أقرب منك.
رباب اتنهدت وقالت:\
أنا ممنعتكش من حقوقك، أنا قلت لك من أول يوم اللي عايزاه خده ومش همنعك، بس مش هيكون برضايا.
رشاد بصلها بضيق وقال:\
وعلى إيه إن شاء الله؟ أنا لو قلت يا حريم ألاقيهم بالدور، مش ناقص عليكي علشان أقرب منك من غير رضاكي.
رباب قالت بضعف:\
سيبني يا رشاد، قلت لك مش عاوزة.
رشاد بعد عنها واتنهد بضيق وقال:\
حاضر، مش هضغط عليكي.
رباب قالت بانفعال:\
ليه إن شاء الله؟ ولا هتطمع؟
رشاد بص لها بدهشة وقال:\
هو ده آخر حاجة ممكن نعملها سوا؟
رباب نزلت عينيها بكسوف وقالت:\
لا يعني، بس واحدة واحدة، كل يوم أعمل حاجة يعني.
رشاد ضحك وقال:\
كل يوم أعمل حاجة؟ ده على بال ما أوصل للي عايزه مش هقدر أعمله!
رباب قالت باستفهام:\
ومش هتقدر تعمله ليه؟
رشاد ابتسم بسخرية وقال:\
هكون عديت الـ80 وخلص البنزين.
رباب ضحكت جامد لما قال كده وقالت:\
لا إن شاء الله مش هتكون عديت الـ80، يلا نام وعدي ليلتك، أنا لسه ما نسيتش اللي إنت عملته من شوية.
رشاد قال بضيق:\
على أساس فرقت معاكي؟
رباب حست بضيق جواها من مجرد كلامه وقالت:\
لا، بحس يا رشاد، بحس، بس اللي ما يقدرش إحساسي ما يستاهلش أبينهوله.
ونامت وبصت بعيد عنه بضيق.
رشاد اتفاجئ من اللي قالته واستغرب جدًا، معقولة بتغير عليه؟
من وقت ما اتجوزها محسش بكده أبدًا، رغم إنه حاول كتير يخليها تغير، بس ما كانش بيلاحظ منها أي رد فعل.
قرب منها وقال بهمس:\
هو إنتي بتغيري عليا ولا أنا فهمت غلط؟
رباب قالت بضيق:\
لا، فهمت غلط.
رشاد ابتسم وقال:\
أمال إيه الصح؟
رباب قالت بانفعال:\
الصح إنك مينفعش تعمل اللي عملته ده مهما كانت علاقتنا مع بعض مش كويسة، مينفعش تعمل حركة زي دي.
رشاد اتنهد وقال:\
أيوه فهمتك، معاكي حق وحقك عليا، مش هعملها تاني أبدًا والله.
وكمل بخبث:\
هطلع أقابلها بره، عمري ما أجيبها هنا في بيتنا تاني.
رباب بصت له بدهشة وقالت:\
إيه يا أخويا؟
رشاد كان عايز يضحك على شكلها وقال:\
زي ما بقولك كده، مدام إنتي مبتغيريش وكل المشكلة في منظرك، خلاص أروحلها أنا ومش هجيبها هنا تاني واصل، مرضية؟
رباب حست بضيق شديد وكانت هتتجنن من كلامه، بس ما بينتلوش. ابتسمت بالعافية وقالت:\
آه كده أحسن.
وبقت تحاول تنام وهي متضايقة جدًا.
رشاد ابتسم بسعادة، مش مصدق لأول مرة يحس إنها غيرانة عليه، وبعد شوية شدها وضمها بحنان لحد ما راح هو كمان في النوم.
في صباح يوم جديد، كانت رباب مع الخدامات في المطبخ بتديهم التوجيهات وبيحضروا الفطار.
دخلت ست في الخمسين وقالت بضيق شديد:\
صباح الخير يا مرت الولد، أنا يا حبيبتي مش قايلة لك مية مرة تريحي نفسك وما تديش الأوامر مدام أنا موجودة؟ أنا ست الدار ده ومرت العمدة، وأنا اللي آمر وأنهي هنا، ولا إيه؟
رباب اتنهدت بضيق وقالت:\
أبدًا يا مرت عمي، مش ناسية، بس كلهم صحيوا وجعانين، وإنتي كنتي لسه نايمة، فقلت أشرف على المطبخ مش أكتر.
مرات العمدة قالت بانفعال:\
أنا نايمة، بس بتي موجودة وصاحية، وهي أولى بدار أمها.
رباب لسه هترد، رشاد دخل وقال:\
رباب زيها زي بنتك بهانة وأكتر. رباب مرت العمدة الصغيرة والوريثة لكل الدار ده باللي فيه. إنتي صح مرت أبوي وليكي مكانتك في الدار، بس بنتك مجرد ضيفة فيه. مش معنى إن إحنا قابلين إنها تفضل معاكي علشان ما تبعدش عنك، تفكري إنها بقت ست الدار وليها الأولوية على مراتي.
مرات أبوه اتوترت قوي وقالت بارتباك:\
أنا مقصديش يا رشاد يا ولدي، أنا قصدت أريحها، البنية تعبانة طول اليوم.
رشاد قال بضيق:\
لا، ريحي نفسك إنتي، هي مرتاحة ومش اشتكت. ده غير إني بحب أكل من عمايل مراتي وبستريح لأكلها.
مرات أبوه اتضايقت قوي وبصت لهم وطلعت من المطبخ وهي متضايقة.
رباب بصت له بابتسامة وهي سعيدة جدًا لأنه دافع عنها بالشكل ده.
رشاد بص للخدامات وقال:\
الفطار جهز؟
قالوا بسرعة:\
جهز يا جنابك، وهنحضر السفرة على طول.
رشاد قال:\
طيب يلا، كل واحدة تروح تشوف لها شغل، إحنا هنودي الفطار.
الخدامات استغربوا قوي لأنه أصلًا مش بيدخل المطبخ، وطلعوا بسرعة وهما بيتهامسوا.
رشاد قرب على رباب بابتسامة وقال:\
صباح الورد، كده تقومي من غير ما تخليني أشوف عيونك؟ صحيت ما لقيتكيش جنبي.
رباب ابتسمت وقالت:\
عمي كان جعان، سمعته بينادي للخدم يجهزوا، طلعت أساعد.
رشاد قرب منها قوي وحاوطها عند المطبخ وقال:\
بس أنا مش عايزك تتعبي نفسك واصل، الخدم يعملوا كل حاجة.
رباب بصت لعيونه اللي كانت قريبة قوي وتاهت فيهم وقالت:\
أنا مش تعبانة من حاجة.
رشاد شدها وقال بهمس:\
بس أنا تعبان، تعبان قوي.
رباب نزلت عيونها بكسوف وقالت:\
وإيه اللي تعبك؟ سخن إياك؟
رشاد قال:\
قوي، مولع يا بت! بقول لك إيه، ما تطلعي معايا نتفاهم فوق بدل ما نتفاهم هنا ونتحرج.
رباب ضحكت جامد ودفعته وقالت:\
إحنا لا هنتفاهم فوق ولا هنتفاهم هنا.
وبقت تقطع السلطة، ورشاد وقف وراها ومسك السكينة معاها وبقى يقطع الخضار وقال:\
بس أنا تعبت من قلة التفاهم.
رباب قالت بسخرية:\
ليه؟ ما إنت امبارح كنت بتتفاهم.
رشاد ضحك جامد وقال:\
وحياة عيونك ما لحقت أتفاهم ولا أتكلم حتى، إنتي جيتي قبل ما نعمل أي حاجة أصلًا، يا دوب كنا بنسخن.
رباب بصت له بلهفة وقالت:\
بجد والله؟ مقربتلهاش؟
رشاد ابتسم وهو بيبص لعيونها وقال:\
هتفرق معاكي يعني؟
رباب قربت منه أكتر وقالت:\
قوي، هتفرق قوي.
رشاد شدها عليه وقال:\
عيونك ما قربت لها أصلًا، كنت همشيها، مش عارف ليه حسيت إني مش عايزها فجأة كده، مكنتش مرتاح.
رباب بصت لعيونه وقالت:\
إنت بتكذب عليا على فكرة.
رشاد رفع لها النقاب وقال بهمس:\
مبقتش أعرف أكذب خلاص.
رباب اتوترت قوي وبقت تقول:\
رشاد، مش هينفع، إحنا في المطبخ. رشاد، بس كفاية، بلاش إحراج.
في الوقت ده دخل أبو رشاد ومراته وهي بتقول له:\
تعالى اتصرف معاه، ولدك بهدلني و…
بس قطعت جملتها لما شافت المنظر واتصدمت.
البارت الثالث – في عصمتي بلوة 4
رباب داست على رجل رشاد بسرعة، وهو كان مشغول معاها ومش حاسس.
اتصدم وبقى يبص لأبوه بتوتر شديد.
رباب نزلت عيونها في الأرض بكسوف، ومرات أبوه قالت:\
الله الله! هي الحكاية كده؟ مشيتني من المطبخ وقللت أدبك عليا علشان تاخد راحتك إنت والهانم؟ طب ما إنتوا عندكم أوضتكم!
رشاد بلع ريقه بارتباك وقال:\
الحكاية مش كده يا أبوي، أنا هفهمك اللي حصل.
أبوه ضحك وقال:\
اللي حصل واضح، على العموم البيت بيتكم، بس خدوا بالكم عشان فيه خدم طالعة داخلة.
وشد مراته من إيدها اللي كانت بتتكلم معاه، لكنه ما ردش عليها وأخدها ومشي.
رشاد بص لرباب عايز يكلمها، بس دفعته وقالت بضيق:\
أنا قلت لك إحنا في المطبخ، لكن ما بتفهمش! لازم تحرجنا، عاجبك كده؟
وطلعت على الأوضة وهي في قمة كسوفها.
رشاد اتنهد وطلع وراها.
وأول ما دخل لقاها قاعدة على السرير بكسوف، قرب منها وقال بضحك:\
إنتي زعلانة ليه دلوقتي؟ هما شافوكي مع واحد غريب؟ أنا جوزك، سواء هنا أو في المطبخ أو في الحمام أو في الشارع حتى، جوزك يا هبلة!
رباب قالت بارتباك:\
إنت سهل عليك المواضيع دي ومتعود عليها، ياما اتفاجئوا بيك كده، لكن أنا لأ، وقلت لك خلينا في أوضتنا.
رشاد ضحك وقال:\
أصل ساعة الحظ ما بتتعوضش، وبعدين هو إنتي راضية بحاجة في أوضتنا؟
رباب ضحكت بخفة وقالت:\
إنت مش طبيعي أصلًا وهتجيب لي بلوة!
رشاد قرب منها قوي وقال:\
ما تخلينا نكمل اللي كنا بنعمله تحت.
رباب بعدت بسرعة وقالت:\
لا، مش هنعمل حاجة، واتلم بقى، روح افطر مع أبوك وكفاية إحراج.
رشاد قال:\
يا بنت أبويا، مين ده وقته؟ وبعدين ما تلبسيش العباية السمراء دي وتنزلي بيها تحت تاني.
رباب قالت بدلال:\
ليه؟ مش عاجباك؟
شدها عليه وقال:\
لا، عاجباني وتعجب أي حد، بس ضيقة قوي بتشعلل حماسي، لا هو باين ولا متداري.
رباب ضحكت جامد وقالت:\
حاضر، مش هلبسها تاني.
رشاد قال:\
تسلملي كلمة حاضر من شفايفك.
رباب اتوترت قوي من كلامه وقربه، ورشاد حس بتوترها وقال:\
أنا عارف إنك خايفة مني يا رباب، وفاكرة إني بتسلى، لكن أنا بحبك ومش في بالي غيرك. بفكر فيكي ليل ونهار، يعني لو ممكن ناخد فرصة مع بعض وتبقي عيلتي وكل دنيتي، نفسي أجيب منك عيل يشبهك وأرتاح من التعب ده كله.
رباب كانت بتبص لعيونه اللي واضح فيها صدق كلامه، بس حاسة بارتباك شديد وقالت:\
أنا…
رشاد قاطعها وحط صباعه على شفايفها وقال:\
أنا عارف إنك لسه خايفة ومش هتطمنيلي بسهولة، وحقك، ومش هضغط عليكي ولا هضايقك.
وسابها وبعد، ولسه هيمشي مسكت إيده وقربت منه وقالت بكسوف:\
بس أنا مطمنالك يا رشاد، معرفش ليه، بس حاسة إن عيونك ما كدبتش عليا، وحاسة إنك عايزني فعلًا وبتحبني زي ما أنا.
ونزلت عيونها في الأرض بكسوف.
رشاد اندهش وكان في قمة السعادة، رفع وشها ليه وبص لعيونها بشوق وقال:\
قوليها، قولي اللي في قلبك يا رباب، نفسي أسمع.
رباب عضت على شفتها بكسوف وقالت:\
حالي من حالك يا ابن العمدة.
رشاد مصدقش نفسه لما قالت كده، وشالها من وسطها وبقى يلف بيها بسعادة وقال:\
يبقى نتفاهم عاد!
رباب ضحكت جامد وقالت بكسوف:\
نتفاهم.
قرب منها وانسجموا مع بعض، واستسلموا لمشاعر كانت أقوى منهم بكثير.
تحت كانت مرات أبوه متضايقة من اللي حصل، وشدت بنت في العشرينات على أوضة مقفولة، دي بهانة بنتها، وقالت بانفعال:\
وإنتي يا خيبتها، هتفضلي كده لامتى؟ الأول راح اتجوز غيرك، ودلوقتي مستنية لما يخليها هانم علينا!
بهانة قالت بارتباك:\
وأنا هعمل إيه ياما؟ ما إنتي عارفة إن رشاد مش شايفني واصل، قال أنا زي أخته. ده على أساس معتبرك أمه علشان يعتبرني أخته؟ ده مش بيطيقك أصلًا.
أمها قالت بانفعال:\
طب خلاص يا أختي، إنتي بتقطميني ولا إيه؟ اسمعي، أنا مش هسيب الهانم دي تبقى ست الدار وإحنا قاعدين، لازم تنفصل عنه النهارده قبل بكرة.
بهانة قالت باستغراب:\
وإحنا نقدر نعمل إيه ياما؟
أمها ابتسمت بمكر وقالت:\
نقدر نعمل كتير، اسمعي بقى هنعمل إيه واحفظي كويس.
وبدأت تحكيلها خطتها.
عند رباب كانت نايمة ورشاد بيضمها بسعادة وقال:\
أخيرًا يا بت! والله مش مصدق، أخيرًا دخلنا القلعة وشوفتك!
رباب شهقت بدهشة من كلامه وقالت:\
إيه الكلام ده؟ يخرب بيتك، ده كلام؟
رشاد ضحك من قلبه وقال:\
بتتكسفي ولا إيه؟ بتتكسفي بعد اللي حصل؟ إزاي؟
رباب نزلت عيونها بكسوف وقالت:\
اتلم بقى.
رشاد ابتسم وضمها لقلبه وقال:\
ربنا يخليكي ليا، أنا مبسوط بيكي قوي، مش مصدق السعادة اللي أنا فيها.
رباب بصت لعيونه وقالت:\
إن شاء الله بس تكفيني يا رشاد، لأن لو عملت حركة كده ولا كده، هيبقى آخر يوم بينا.
رشاد ضحك وقال:\
وحياة عيونك ما عايز غيرك من الدنيا خلاص، بس خليكي جاهزة بقى، لأن مش هيبقى فيه غيرك.
رباب قالت بدلال:\
أنا دايمًا جاهزة.
رشاد ابتسم وقال:\
وأنا كمان جاهز.
ولسه هيقرب منها، قامت بسرعة وجريت على الحمام وقالت:\
آخد دش وأرجع لك.
رشاد قال بضيق:\
كده يا رباب؟ لا واضح من أولها!
رباب ضحكت ودخلت الحمام، وهو فضل مستنيها لحد ما تطلع.
شوية طلعت وبقت تلبس هدومها وعبايتها ونقابها.
رشاد بص لها باستغراب وقال:\
هتلبسي ليه؟
رباب ضحكت وقالت:\
هروح أشوف أمي، ما إنت عارف إني كل يوم لازم بروح لها ساعة.
رشاد قال:\
بس أنا النهارده فكرت نفضل سوا.
رباب ابتسمت له وقالت:\
معلش ساعة بس، يمكن تكون تعبانة.
رشاد اتنهد وقال:\
ماشي، الأمر لله، بس ما تتأخريش، هتوحشيني.
رباب قالت بابتسامة:\
ساعة واحدة وهرجع على طول.
رشاد قرب منها وقال:\
خليها ساعة إلا ربع ولا ساعة إلا نص.
رباب ضحكت وقالت:\
ساعة إلا نص حاضر، هحاول.
سند جبينه على جبينها وقال:\
هو مينفعش أمك هي اللي تيجي؟
رباب ضحكت وقالت:\
وبعدين بقى؟
رشاد اتنهد وقال:\
طب خلاص، هستناكي هنا لحد ما تيجي.
رباب قالت بغمزة:\
على الله تستناني لوحدك.
رشاد ضحك وباسها برقة وقال:\
لا، خلاص مبقاش ينفع للقلب غيرك.
رباب بصت له بابتسامة وحضنته بقوة ومشيت، وهو دخل ياخد دش هو كمان.
تحت كانت مرات أبوه واقفة عند الشباك من إطلالة البيت، مستنية رباب لما تخرج من البيت.
بعد شوية شافتها طالعة من البيت وخرجت من الجنينة كلها.
ابتسمت بسعادة وجريت على بنتها وقالت:\
شوفي، هتطلعي على أوضتك دلوقتي وتعملي زي ما قلت لك بالحرف.
البنت قالت بارتباك:\
أنا خايفة قوي ياما.
أمها قالت بانفعال:\
يا بنت اسمعي الكلام، أنا معاكي، يلا ما تخافيش.
وفعلًا بهانة طلعت على أوضتها، ومرات أبوها مسكت التليفون وبعتت رسالة لرباب كانت بهانة مجهزاها؛ لأنها مش بتعرف تكتب، ومحتواها:
جوزك استنى يطلعك من البيت وبيلعب بديله، ارجعي بسرعة.
البارت الرابع – في عصمتي بلوة 5 الأخير
بعد دقائق كان رشاد طلع من الحمام، وكان لابس بنطلون وبس وبينشف شعره وهو بيصفر بروقان وسعادة.
لقى تليفونه بيرن، مسكه بسرعة واتصدم برقم بهانة.
استغرب جدًا وقال:\
عايزة إيه دي؟ من إمتى بترن عليا؟
ورد وقال بضيق:\
نعم يا بهانة، فيه حاجة؟
بهانة قالت ببكاء:\
الحقني يا رشاد، الحقني!
واتقفل التليفون بسرعة ومفهمش أي حاجة.
رشاد استغرب وطلع بسرعة على أوضتها من غير حتى ما يلبس جلابيته.
ولسه هيخبط على الباب لقاه مفتوح، وهي على الأرض عند السرير وبتصرخ.
قرب عليها وقال:\
في إيه يا بت؟ مالك؟ إيه اللي حصل؟
بهانة قالت بدموع:\
رجلي يا رشاد، الحقني! حاجة قرصتني ومش عارفة إيه هي.
رشاد بقى يبص للأوضة وشالها بسرعة وحطها على السرير.
رشاد قال بحرج:\
هروح أنادي أمك وأطلب دكتورة.
ولسه هيمشي، مسكت إيده وشدته عليها وقالت:\
لا، خليك جنبي، ما تمشيش، أنا خايفة ومتوترة.
رشاد بصلها باستغراب وهو مش فاهم في إيه.
وفي الوقت ده الباب اتفتح ودخلت والدتها وهي بتقول:\
يا مصيبتي! إنتوا بتعملوا إيه؟
ومسكت في بنتها وبقت تلومها وتقول:\
بتعملي إيه يا مقصوفة الرقبة؟
رشاد حاول يهديها ويسكتها علشان ما حدش يسمع، وبقى يقول:\
يا ست افهمي، اهدي، بنتك في حاجة قرصتها في رجلها وأنا جيت أساعدها.
بس فاجأته بهانة لما قالت ببكاء:\
إنت بتكتب ليه يا رشاد؟ عايز تشيلني مسؤولية لوحدي؟
رشاد بص لها بدهشة من اللي بتقوله، ووقف باستغراب وقال:\
بت إنتي اتعدلي، إحنا ناقصين مواقف صعبة؟
مرات أبوه قالت بانفعال:\
لازم تشوف الحكاية دي بقى! البنية تروح تشوف أمها، تقوم تعمل كده؟ يا ترى فينك يا رباب؟ تعالي يا فضيحتنا!
في الوقت ده باب الدولاب اتفتح وطلعت منه رباب وقالت بابتسامة مستفزة:\
أنا أهو يا مرات عمي، كنتي بتنادي عليا؟
بهانة وأمها كانوا هيتفاجئوا جدًا، واتصدموا ورجعوا لورا بدهشة شديدة، مش مصدقين إنها طلعت من الدولاب، لأنهم شافوها بعينيهم وهي خارجة من البيت كله.
حتى رشاد اتصدم بشدة وبقى يبص لها باستغراب.
رباب ضحكت من منظرهم وقالت:\
ما تخافيش يا مرت عمي، بنتك بخير وبشهادتي. هي بس الغندورة كانت بتشوف حلم مش مريح إن حاجة قرصتها في رجلها، ورنت على جوزي، والراجل كتر خيره جالها بسرعة. أنا هاخد جوزي وأمشي بقى، وإنتي جيبيلها دكتور، أو رأيي تهتمي بتربيتها أحسن.
مرات عمها قالت بدهشة:\
إنتي كيف؟ كيف؟
قاطعتها رباب وقالت بسرعة:\
لا، متسأليش، مش من حقك لا تسألي ولا تفهمي. إنتي وبنتك الحلوة تحفظوا الكلمتين دول: جوزي خط أحمر، عشرة خطوط كمان. ولا تحبي أنادي لعمي وأحكي له اللي عملتوه كله على بعضه؟ إنتي وبنتك اللي بتحاول تقرب من راجل متجوز وعايزة تخرب بيته؟ أظن عمي مش هيقبل بالكلام ده كله، ويمكن يطلب منها تسيب الدار، وده مهما كان ولده.
مرات عمها هزت راسها بالموافقة وقالت بسرعة:\
مش هتتكرر، محدش هيتعرض لكم تاني، بس أحب على إيدك بلاش فضايح.
رباب ضحكت جامد وقالت:\
هو أنا ليه كل ما حد يشوفني يقول لي استر عليا وبلاش فضايح؟ يلا الستر من الله.
وبصت لها بضيق شديد وقالت:\
إنتي وخططك وبنتك خليكم بعيد من جوزي، سامعاني؟
مرات أبوها هزت راسها بالموافقة بسرعة.
رباب شدت رشاد من إيده، وهو مش فاهم أي حاجة، ومشي معاها على أوضتهم.
وأول ما دخل وقفلت الباب، بصت له بغيظ وقالت:\
هو أي حد يرن عليك تروح له؟ جاي في أي حاجة؟
رشاد بصلها بدهشة وهو مش فاهم حاجة وقال:\
أنا فكرت حصل لها حاجة ولا حد دخل عندها، بس إنتي كيف عملتي كده؟ إزاي ده حصل؟ كنتي بتعملي إيه في الدولاب؟
رباب بصت له وابتسمت وقالت:\
في واحدة من الخدامات حبيبتي وبتعزني جدًا. كنت طالعة علشان أروح أشوف أمي، قالت لي إنها سمعتها هي وبنتها بيتفقوا يورطوك ويخلونا أنا وعمي نشوفك علشان تجوزك بنتها. كنت هرجع أدخل الأوضة تاني، بس خطرتلي فكرة ذكية. اديت البنت الخدامة العباية والنقاب وقلتلها تطلع من الدار على أساس إنها أنا، وأخدت بعضي ودخلت أوضة بهانة استنيتها هناك في الدولاب. وفعلاً مفيش شوية وبعتتلي رسالة إن جوزي بيخوني، وبعد كده دخلت بهانة ورنتلك، وشفت اللي حصل كله.
رشاد قرب منها وابتسم وقال:\
يا بنت اللذينة، إبليس نفسه ما يعملش كده!
رباب قربت منه وحطت إيديها على كتفه وقالت:\
إبليس مش عشقان زيي.
رشاد بص لعيونها وقال:\
عشقانة؟
رباب هزت راسها بالموافقة وقالت بابتسامة:\
وبموت فيك كمان يا ولد العمدة.
رشاد ابتسم بسعادة من جواه وقال:\
قلبي كان هيقف، خفت ترجعي وتشوفينا، خفت تشكي فيا وقلبك يتكسر وتبعدي عني.
رباب بصت لعيونه وقالت:\
مبقتش أقدر أعملها، لو عملت كده وبعدت عنك أعيش كيف من بعدك؟
رشاد شدها لحضنه بقوة وقال:\
أنا بحبك قوي يا رباب، معايزش غيرك من الدنيا، بس قلقان يرجعوا يعملوا حاجة تاني تفرقنا.
رباب قالت بسرعة:\
متقلقش، بعد اللي حصل لهم النهارده مش هيجربوا تاني، خلاص بقيت ماسكة عليهم موقف يخلّيهم يبعدوا.
رشاد ضحك وقال:\
بس إنتي طلعتي جامدة يا بنت، ده أنا في عصمتي بلوة!
رباب قالت بحب:\
البلوة دي بتحبك إنت، وحقك يا رشاد ومش هفرط فيك.
رشاد قال بهمس:\
ولا أنا هفرط فيكي، وأختارك وأسيب الدنيا كلها يا رباب.
بعد عنها وقال بحب:\
سامحيني على أي حاجة يا رباب، أوعي تزعلي مني.
رباب قالت بابتسامة:\
أجمل حاجة حصلت في حياتي إني اتجوزتك، ومش ندمانة عليها، مكنتش هسامح نفسي لو بقيت لغيري يا رشاد.
رشاد ضمها لقلبه وهي بين إيديه وقال:\
وأنا عمري ما أكون غير ليكي، ربنا ما يبعدنا عن بعض أبدًا يا بلوتي اللي أخدت القلب من أول يوم.
