قصص وروايات

سجينتى الحسناء

صرخ بحدة:
واللي انا فيه بسببها…. انتي مش فاهمة انا حاسس بايه؟ بنتي انا بعد التربية والعلام في الآخر بقت رد سجون ومتهمة في قضية جنائية وكمان مذنبة.

هنا لم تتمالك نفسها فهاجت تبكي بحرقة:
لاااا متقولش كده يا بابا، انا لا عملت حاجة حرام ولا غلطت…. انا اتجوزته على سنة الله ورسوله لكن هو اللي خدعني.

أشاح هشام وجهه عنها فنظر جمال له بمعاتبة وأخذ يهدئه:
صدقني يا بابا….حقها حنجيبه منه وبأي شكل….. لان أي حد ييجي على فرد من عيلة الشامي حيلاقي العيلة كلها وقفاله ومش حرتاح الا لما احطه مكانها في السجن.

ردد هشام بسخرية:
مش لما نعرف نطلعها من هنا الأول، لله الأمر من قبل ومن بعد فوضت أمري إليك يا رب.

خرج صوت السجانة بحدة تأمر جميع المسجونات وذويهم:
الزيارة انتهت.

بلهفة أردفت فدوى:
انا سيبالك اكل وفلوس في الكانتين…. كلي كويس يا دارين عشان تقدري تصلبي طولك يا بنتي.

أومأت لأمها وقادتها السجانات هي وباقي السجينات للعودة للعنابر فأوقفتها سيدة فور أن دلفت ورددت بتساؤل:
هااا…اخدتي فلوس من أبوكي؟

أومأت بلا فغضبت الأخيرة وهتفت بحدة:
امال حتدفعي تمن المحمول منين؟

أجابتها بانكسار:
سبيني دلوقتي يا سيدة انا دماغي مش رايقة.

صرخت بها بحدة:
لاااا فوقي كده واعرفي انتي بتتعامل مع مين، أوعى تفتكري انك لما تخسريني حسمى عليكي….لا ده انا اشرحك وما اخليهومش يعرفو يخيطو فيكي غرزة واحدة.

وقفت مدهوشة من حدتها فهتفت:
انا حاولت ابيع السجاير بس محدش رضي يشتري مني حتى بنص السعر.

قوست فمها بطريقة سوقية وحركت جسدها باستهزاء:
الكل هنا مش بيحبك، واللي تعمل عداوة مع المعلمة لواحظ حتشوف ايام سودة في السجن.

اقتربت منها وأخرجت أداة صغيرة من فمها بطريقة احترافية ووضعت طرفها الصغير على صدغها ولمستها لمسة صغيرة ورددت:
انا غير كل اللي هنا خالص….. يعني المعلمة لواحظ بتحب تستعرض وتعرف المساجين انها اللي علمت عليكي، انما انا ممكن اساعدك في أمر دون ما حد يحس.

سحبت الأداة من على بشرتها المرتجفة ودارين مدهوشة من تغيرها بهذا الشكل بعد أن كانت مثال للطيبة وكانت هي رفيقتها الوحيدة وهتفت بتأكيد:
المحمول على وصول…. يا تدفعي تمنه فلوس يا خدمات ومن الآخر كده حتدفعي يعني حتدفعي واعرفي اني مش حخاف منك يا مستر كراتيه.

اتجهت سيدة ناحية فراشها الحديدي وخبأت الأداة الصغيرة اسفل وسادتها وتدثرت بالغطاء ونامت ودارين لا تزال على حالتها المصدومة مما علمته من أبيها ومن اكتشافها الوجه القبيح لرواد الحبس.

جلست تعض على شفتيها وهي تبكي حالها بعد أن تذكرت آخر ليلة قضاها معها قبيل الإجراء الطبي وإصراره على تركها بمنزل أبيها بحجة خوفه عليها وانتظاره أن تتعافى تمامًا حتى أتت الشرطة للقبض عليها بعدها بأيام قليلة.

فلاش باك

فور القبض عليها أتى محاميه ناصر الصواف ليحضر معها التحقيقات وهتف موضحًا:
اسماعيني كويس….انتو لازم تخبو حكاية جوازكم لان ده حيكون دافع للجنائية.

أجابته دارين بحزن:
بس انا مآذيتش حد.

أومأ بتفهم وهتف بطيبة مصطنعة:
طبعًا طبعًا….بس لو التحقيقات ظهر فيها انكم متجوزين فده مش حيكون في صالحك ابدًا، اسماعي كلامي انا المحامي بتاعك وادري بمصلحتك ولو رئيس النيابة سألك عن علاقتك بالمجني عليها وبأكرم بيه حتقولي متتعداش انه مديري وهي زوجته وبس كده.

ولكنها هتفت بتساؤل:
وفي التحريات مش حيعرفو اننا متجوزين؟ احنا جوازنا شرعي مش عرفي، يعني على ايد مأذون.

ابتسم بمكر وردد بحيطة:
متقلقيش من حاجة…انا حعرف اتصرف في الحكاية دي، المهم دلوقتي تعملي اللي قلتلك عليه.

لتتفاجئ بعدها بتلفيق التهمة والأدلة والأكثر من ذلك هي شهادته ضدها بالمحكمة ليتم حبسها على ذمة التحقيقات وبعدها توضع بالسجن لحين الاطلاع على أي أدلة جديدة تدينها أكثر أو تبرئها.

عودة

تحركت بتمهل على أطراف أصابعها حتى وصلت لفراش سيدة ووضعت يدها اسفل وسادتها تبحث عن شيء حتى وجدته.

سحبت الأداة الصغيرة من اسفل وسادتها وعادت دارين لمضجعها وظلت تنظر أمامها تلعب بالأداة بيدها وهي تستعيد حديث والدها عليها بانها مذنبة وانها السبب بوضعها الحالي فتفقد ايمانها وتمسكها بالحياة فلم تشعر بنفسها إلا بعد أن انهارت قواها وبدأت تفقد الكثير من وعيها حتى خرت مغشى عليها في طريقها للراحة الطويلة.

يتبع

5 من 5التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى