شريف …. انتى بتعيطى ليه دلوقتى.
رهف تزيد فى العياط .
وجت الأم بعد ما خلصت الصلى على صوت شريف وهو بيزعق لرهف.
الام… خير يا ابنى بتزعق كده ليه لرهف .
شريف … أسألى الهانم انا بزعق لها ليه.
الام… فى ايه يا بنتى شريف بيزعق ليه؟؟؟
رهف … بصت لشريف وعيطت اكتر.
الام… حد يفهمني فى ايه.
شريف .. يرضيكى يا امى اجى الاقى رهف قاعده هى وفارس لوحدهم وعمالين يتكلموا وبيضحكوا كمان ومفيش حد منكم قاعد معاهم.
الام…. اخص عليك اخص يا شريف ده انا اللى اتصلت بفارس علشان حسام كان تعبان و سخن اوى وما كوناش عارفين نعمل ايه ولا انا ولا رهف والجدع كتر خيره جه وكشف عليه ونزلنا بعدها احنا التلاته تحت هنا وانا استاذنت وروحت اصلى.
شريف … حط أيده على وشه وفضل ساكت شويه .
رهف قامت وهى بتعيط وجريت على اوضتها وجرى وراها شريف علشان يعتذر لها وفضل ينادى عليها بس هى مش عاوزة ترد عليه ودخلت اوضتها وفضلت تعيط بحرقه وهو فضل يخبط على باب اوضتها وكان سامع صوت عياطها وكان قلبه بيتقطع عليها..
يا ترى شريف هايعمل ايه ؟؟؟
تواقعتكم ايه
الحلقه 23
وفضلت رهف على ده الحال كذا يوم زعلانه وحزينه من جواها وكل ما شريف يقرب منها ويحاول يتأسف لها تسيبه وتهرب على اوضتها لحد ما زهق من جواه وبدأ يبات فى شغله ويبعد عن الفيلا خالص علشان ما يضيقهاش ولا يحسسها انه تقيل عليها.
وبدأت رهف تلاحظ أنه مش موجود وبيتعمد يبعد عن الفيلا علشان خاطرها .
وبعد كام يوم من تعب حسام جه الدكتور فارس علشان يطمن عليه
.
جرس الفيلا رن وراحت الشغاله علشان تفتح الباب ولقيته الدكتور فارس فرحبت بيه ودخلته لحد ما تنده الحاجه من فوق .
الحاجه …. وهى نازله على السلم بعد ما بلغتها الشغاله بوجود الدكتور فارس نزلت علشان تقابله وقالت للشغاله انها تنادى ستها رهف من اوضتها وتجيب حسام معاها .
الام… اهلا.اهلا.يا ابنى عامل ايه يا فارس.
فارس… الحمد لله يا امى بخير والله ده انا كنت فى مشوار قريب من هنا وقولت اعدى اشوف حسام عامل ايه دلوقتي واطمن عليه.
الام …. الحمد لله يا فارس هو احسن دلوقتى بعد العلاج اللى انت كتبتهوله.
ونزلت رهف ومعاها حسام وسلمت على الدكتور فارس ورحبت بيه وخده فارس منها واطمن عليه وقالها لا . لا الحمد لله احنا بقينا كويسين اوى دلوقتى.
رهف… الحمد لله الفضل يرجع لك يا دكتور فارس.
واستاذنت رهف وخرجت فى جنينه الفيلا شويه.
وسابت حسام مع جدته والدكتور فارس.
فلاحظ فارس اد ايه باين عليها الحزن واستغرب لحالها .
وبعد ربع ساعه استأذن ومشى بحجه أنه وراه شغل فى المستشفى


