كان الصبح هادي في فيلا الحريري، وأشعة الشمس داخلة من الشبابيك الكبيرة، منورة أوضة اللي كانت حنين واقفة فيها قدام المراية، بتظبط طرحتها وبتحاول تختار بين طقمين محتارة تلبس أنهي واحد فيهم.
رائف كان قاعد على طرف ، قميصه وساعته، وبيتابعها بابتسامة.
رائف: هو أنا ممكن أعرف إيه الحيرة الكبيرة دي من الصبح؟
حنين: مش عارفة ألبس أنهي طقم.
رائف: الاتنين حلوين.
حنين: يعني ألبس أنهي واحد؟
رائف: اللي يخليكي مرتاحة وواثقة من نفسك.
لفت له حنين وقالت:
حنين: إنت كده مش بتساعدني خالص!
ضحك رائف وقام من مكانه، وقرب منها وبص للطقمين.
رائف: ده مناسب أكتر للشغل، وده ممكن تلبسيه لو عندك اجتماع رسمي.
حنين: خلاص، هلبس ده.
اختارت الطقم الكحلي، وبدأت تجهز شنطتها.
رائف كان بيتابع حركتها، وفجأة قال:
رائف: على فكرة، عندي ليكي سؤال.
حنين: اتفضل.
رائف: إنتي مبسوطة في شغلك؟
ابتسمت حنين تلقائيًا.
حنين: جدًا. حاسة إني بعمل حاجة بحبها، وكل يوم بتعلم حاجة جديدة.
رائف: وده أهم حاجة عندي.
حنين: بس ساعات بحس إني محتاجة أتعلم أكتر. يعني أنا مسؤولة عن تنظيم الملفات والتنسيق، لكن نفسي أكون في مكان أكبر، وأشارك في التخطيط للمشروعات مش مجرد تنفيذها.
رائف بص لها باهتمام.
رائف: وده حلمك من زمان؟
حنين: من زمان أوي. كنت دايمًا بتمنى يبقى ليا شغل أقدر أحقق فيه نفسي، وأثبت إني أقدر أنجح حتى لو بدأت من الصفر.
رائف ابتسم بفخر.
رائف: يبقى لازم تكملي ورا حلمك.
حنين: بس الموضوع مش سهل. محتاجة كورسات، وخبرة، ووقت.
رائف: وإنتي عندك كل ده، وأنا هساعدك في اللي تحتاجيه.
حنين بصت له بامتنان.
حنين: أنا عارفة إنك ممكن توفرلي حاجات كتير، لكن نفسي أوصل بنفسي.
رائف مسك إيديها وقال:
رائف: وده اللي أنا عايزه. أنا مش عايزك تنجحي عشان أنا جوزك، أنا عايزك تنجحي عشان إنتي حنين، وعشان تعبك ومجهودك يستاهلوا.
الكلام لمس قلبها، وحست إنه فاهم بالضبط هي محتاجة إيه.
حنين: بحبك يا رائف.
رائف: وأنا بحب الست اللي قدامي دي، اللي عندها أحلام ومش بتستسلم.
بعد الفطار، وصل رائف حنين للمؤسسة، وقبل ما تنزل من العربية قال لها:
رائف: عندي اجتماع طويل النهارده، فممكن أتأخر شوية.
حنين: ولا يهمك، أنا كمان عندي شغل كتير.
رائف: ولو احتجتي أي حاجة كلميني.
حنين: حاضر.
نزلت حنين ودخلت المبنى، وهي حاسة بطاقة جديدة جواها. كان عندها إحساس إن كلام رائف شجعها تاخد خطوة كانت مأجلاها من فترة طويلة.
أول ما دخلت مكتبها، لقت منى زميلتها بتقلب في مجموعة من الأوراق.
منى: صباح الخير يا حنين.
حنين: صباح النور.
منى: عندي ليكي خبر، بس مش عارفة هتفرحي بيه ولا هتخافي منه.
حنين ضحكت.
حنين: خير يا منى، خوفتيني.
منى: الإدارة أعلنت عن برنامج تدريب جديد في إدارة المشروعات وتنظيم الفعاليات الكبرى. مدته تلات شهور، وفي آخره فيه تقييم، والناس المتميزة ممكن تتولى مسؤوليات أكبر.
حنين سابت شنطتها وبصت لها باهتمام.
حنين: بجد؟ والتقديم إمتى؟
منى: من النهارده، وآخر ميعاد بعد أسبوع.
حنين ابتسمت، لكن ابتسامتها اختفت تدريجيًا وهي بتفكر.
منى: مالك؟ مش دي الحاجة اللي كنتي بتتكلمي عنها من يومين؟
حنين: أيوه، بس أنا خايفة ما أقدرش أوفق بين الشغل والتدريب.
منى: يا بنتي جربي! إنتي مش خسرانة حاجة.
حنين أخدت الإعلان وبدأت تقرأ التفاصيل بعناية.
كان التدريب محتاج التزام، وفيه اختبارات ومشروعات عملية، لكن في المقابل ممكن يفتح لها باب جديد في مجال هي بتحبه.
حنين: أنا هقدم.
منى ابتسمت بحماس.
منى: أهو ده الكلام! وأنا كمان هقدم معاكي.
ضحكت حنين.
حنين: خلاص، اتفقنا.
في نفس الوقت، كان رائف في مكتبه، قدامه مجموعة من رجال الأعمال في اجتماع مهم، لكن وسط الكلام، دخلت عليه السكرتيرة وحطت ملف على مكتبه.
فتح الملف، وبدأ يراجع بعض الأوراق، لحد ما عينه وقعت على إعلان المؤسسة اللي كانت حنين بتشتغل فيها، واللي كان ضمن الأوراق الخاصة بالتعاون بين المؤسستين.
قرأ الإعلان، وعرف إن فيه برنامج تدريبي جديد.
ابتسم لنفسه، وقال في سره:
“واضح إن حنين أخيرًا هتبدأ تحقق الحلم اللي كانت بتتكلم عنه.”
قفل الملف ورجع للاجتماع.
وبعد ما انتهى، مسك تليفونه وبعت لها رسالة:
«إيه أخبار يومك يا صاحبة الأحلام الكبيرة؟»
حنين كانت في مكتبها، ولما شافت الرسالة ابتسمت وردت:
«عندي خبر مهم هحكيلك عليه لما ترجع.»
رائف رد بسرعة:
«خير إن شاء الله؟»
«خير، بس مش هقولك دلوقتي.»
رائف ضحك وهو بيقرأ رسالتها.
«طب كده أنا مش هعرف أركز في الشغل.»
حنين كتبت:
«ركز في شغلك يا أستاذ رائف، وأنا هحكيلك بالليل.»
عدى اليوم بسرعة، ولما رجعت حنين الفيلا، لقت رائف سبقها ووصل.
كان قاعد في الصالة، وأول ما شافها قام يستقبلها.
رائف: أخيرًا! أنا مستني الخبر من الصبح.
حنين ضحكت وهي بتحط شنطتها.
حنين: مساء الخير الأول.
رائف: مساء النور يا حبيبتي، يلا بقى احكي.
قعدت جنبه وطلعت الإعلان من شنطتها.
حنين: المؤسسة أعلنت عن تدريب في إدارة المشروعات وتنظيم الفعاليات، وأنا قررت أقدم فيه.
رائف أخد الإعلان وقرأه.
رائف: ممتاز جدًا.
حنين: بس التدريب تلات شهور، وهيحتاج مجهود ووقت، وممكن يكون عندي ضغط كبير في الشغل.
رائف: وإنتي شايفة إنك تقدري؟
حنين: نفسي أجرب. حتى لو تعبت، هكون مبسوطة إني بحاول.
رائف حط الإعلان على الترابيزة وبصلها.
رائف: يبقى مفيش كلام تاني. قدمي، وأنا هكون أول واحد يشجعك.
حنين ابتسمت.
حنين: كنت خايفة تقوللي إن الموضوع هيأثر على وقتنا مع بعض.
رائف قرب منها وقال:
رائف: يا حنين، أنا اتجوزت واحدة ليها شخصية وحلم وطموح، مش عايزك تتخلي عن كل ده عشاني. إحنا ممكن ننظم وقتنا، ونلاقي مساحة لبيتنا وشغلنا وحياتنا.
حنين: يعني مش هتضايق لو رجعت متأخرة يوم؟
رائف: هضايق لو رجعتي مرهقة ومش بتاكلي كويس، وهضايق لو نسيتي نفسك وسط الضغط، لكن مش هضايق من نجاحك.
حنين ضحكت وحضنته.
حنين: إنت أحسن راجل في الدنيا.
رائف باس رأسها.
رائف: عارف.
بعدت عنه وهي بتضحك.
حنين: مغرور!
رائف: مغرور بحبك، ودي حاجة مش هتتغير.
بعد يومين، قدمت حنين أوراقها، وبدأت تستعد لاختبار القبول.
كانت قاعدة في الصالة بالليل، قدامها كتب وملاحظات، وبتحاول تراجع أكبر قدر ممكن من المعلومات.
رائف نزل من مكتبه، ولقاها مركزة جدًا لدرجة إنها ماخدتش بالها من وجوده.
وقف وراها شوية، وبعدين قال:
رائف: هو أنا ينفع أعدي ولا لازم أحجز موعد؟
حنين رفعت راسها وضحكت.
حنين: رائف! خوضتني.
رائف: بقالي خمس دقايق واقف، وإنتي مش حاسة بالدنيا.
حنين: عندي اختبار بكرة، ولازم أراجع.
قعد جنبها، وبص للأوراق.
رائف: طيب، إيه رأيك أساعدك؟
حنين: إنت هتساعدني إزاي؟
رائف: اسأليني، وأنا أجاوب.
حنين ابتسمت بمكر.
حنين: متأكد؟
رائف: طبعًا.
بدأت تسأله أسئلة، ورائف كان بيجاوب بثقة، لكن لما وصلوا لسؤال محتاج تفاصيل دقيقة، سكت شوية.
حنين ضحكت.
حنين: إيه يا أستاذ رائف؟ وقفت ليه؟
رائف: السؤال ده مش من اختصاصي.
حنين: أمال كنت بتقول إيه؟
