ابتسمت خجلاً من غزله لها وأومأت بخفوت:
_ ايه بقي هو انت كل كلامك كدة ، ماتهدى عليا براحة على قلبي .
اتكأ علي يديها وجعل وجهه مقابلاً لوجهها مرددا بنفس نبرة عشقه لها :
_ مابراحة إنتي ياقطتي ، مين فينا اللى بالراحة على التانى ده إنتي سحرتينى ودوبتينى وجننتينى .
ثم أخذها في جولة عشقه لها وسحرا في عالمهما الخاص وهو يسقيها من أنهار حبه .
_____________________________
بعد مرور شهران على تلك الأحداث في الفيلا التى تمكث بها عبير حيث استمعت إلي تقيؤات ابنتها هيام والتى تكررت لمرات عديدة ، ذهبت اليها مسرعة وهي تردد خلفها :
_ يابنتي دي رابع مرة وحالتك دي صعبة ، ده غير علامات الحساسية اللى باينة على وشك وجسمك وانتى عمرك ماكنتى كدة خالص .
انتهت من تقيؤها ونظرت إلي المرآه وهي تتحسس جسمها وترى علامات الطفح الجلدي عليه ورددت بقلق:
_ فعلاً الموضوع كدة بقى مش مطمن أنا هروح للدكتورة النهاردة وأشوف في ايه بالظبط مش مفهوم .
شجعتها والدتها قائلة:
_ تمام البسي يالا وأنا هاجى معاكى .
وبالفعل بعد ساعة كانتا تجلسان أمام الطبيبة تفحصها بعناية ، وعلامات وجهها لاتبشر بالخير ، وبعد فحصها سألتها الطبيبة:
_ هى أعراض الطفح الجلدي ظهرت عليكى من امته بالظبط ؟
أجابتها هيام وهى تهندم ملابسها :
_ تقريباً من أزيد من سنة بدأت تظهر واحدة واحدة لكن من شهرين بالظبط بدأت تتطور بزيادة ، زي ما حضرتك شايفة .
سألتها الطبيبة بعملية:
_ طيب ملاحظتيش إن عندك ورم تحت الإبط وحوالين الثدى لأنه ظاهر جدا وأنا بفحصك دلوقتي؟
حركت رأسها بنفي وأجابتها:
_ لا محستش ومكنتش باخد بالي من الحاجات دي .
باندهاش تحدثت الطبيبة:
_ إزاي يعنى مبتفحصيش منطقة تحت الإبط باستمرار ومنطقة الثدى ، وخاصة إن في حملات توعية كتييير عن الموضوع ده.
مطت شفتيها بعدم فهم :
_ مكنتش باخد بالى من الحاجات دي خالص ، ومتابعتش أي حملات عن كدة ،
وتابعت باستفسار مغلف بالقلق:
_ هو فيه حاجة حضرتك شاكة فيها يادكتورة ؟