_ وبعدين بقى فيك بطل طريقة كلامك دي ، هعمل لك حظر على فكرة علىشان أنت مستغل أووي .
كان يستدير بالكرسي حول نفسه بسعادة عارمة لكونه يتحدث معها فقط، فما تكون حالته عند لقائها الأول بين يديه ، يحلم كثيراً بذالك اللقاء وردد بحالمية:
_ حرام عليكي اللي انتي بتعمليه فينا ده ياريم والله العظيم حرام ، إنتي بتحبيني زي مابحبك بالظبط وبتكابرى بس اللي متعرفيهوش إن المشاعر فضاحة ،
واسترسل بملامة:
_ كفاية بقي كدة وحنى عليا ووافقى على ارتباطنا وأنا أوعدك انك مش هتندمي أبداً ، وخلي بالك بقولها لك للمرة التانية إنتي كدة بتشيلي ذنوبي علشان كل لما أكلمك وأسمع صوتك بتسحر وبتخليني أقول كلام مينفعش يتقال غير من زوج لزوجته ،
وللمرة اللى مش عارفه عددها بقول لك أنا عايزك تكونى ليا .
ابتسمت على طريقته وكأنها الأخرى عادت ابنة السابعه عشره عاماً ثم ألقت كلمتها السريعة وأغلقت الهاتف فوراً:
_ خلاص هفكر .
استمع إلي كلماتها بقلب ينبض فرحا وعشقا وصار بعقله يفكر كيف يكون لقاؤها الأول بالتأكيد سيكن عاصفة شديدة في ليالى العشق والغرام ،
نظرت للسقف بشرود وتيهة وخطر على بالها رحيم ، هى تريد أن تتحدث مع شخص يتفهمها فأرسلت له رسالة عبر الواتساب:
_ رحيم عايزة نخرج أنا وإنت في مكان هادى ممكن .
جائته رسالتها وهو يهاتف مريم فاستئذن منها كي يراها ، قرأها وابتسم تلقائيا ثم أنهى حواره مع مريم وأرسل لها بموافقة:
_ فى ربع ساعه بالظبط هكون جاهز ياحبيبتي يلا جهزي نفسك .
سعد داخلها من أجل حنان أخيها عليها وقامت بنشاط وحيوية كي تأخذ حماما منعشا وبعد نصف ساعة كانو متحركين بالسيارة ،
وصلوا الي المكان المحبب لها ،دلفوا الي المكان وانتقوا مقعداً بجانب البحر الذي تعشق الجلوس أمامه ،
بعد استقرارهم في المكان أحس بحرجها ، تود أن تتحدث معه في ذاك الموضوع ولكن خجلها يقف عائقا أمامها ،
ولكنه تشجع قائلا:
_ أنا حاسس بيكي ياحبيبتي وحاسس بتعبك وجهادك مع نفسك بس ليه ده كله علشان باهر الله يرحمه اللى بين أيادي ربنا دلوقتي ،
واستطرد نصحه كي يطمئنها من نزاعها الداخلى :
_ هو عند اللى خلقه وانتى لسه عايشة فى الدنيا بني أدمة بتتنفسي ونفسك ليها حق عليكي .
نظرت إلي البحر بروح منهكة حاربتها كثيراً وأومأت بخفوت:
_ مش قادره أتخطى وجود باهر لحد دلوقتي ولا قادرة أتصور نفسي مع راجل غيره يارحيم .
التوي ثغره بحسرة على حالة أخته :
ليه ياريم ليه تعذبى نفسك وتعيشي على ماضى وذكريات وتأنبيها على حاجة ملكيش ذنب فيها ، وكمان تدفنيها جوة دوامة هتسحب جمال روحك لحد ماتخليكي هشة .
_طيب أعمل إيه دلنى على الصح … قالتها ريم برجاء وهى تنظر إلى أخيها .
ربت علي يديها بحنان وأجابها:
_ تدى لنفسك ولقلبك فرصة ، تدى لهم حق إنهم يعيشوا وملكيش دعوة بكلام الناس ارميه عرض الحيطة ، محدش هينفعك وانتي بتضيعى سنين عمرك ورا سراب هيحطمك عيشى الواقع والحقيقة وافرحى بشبابك طالما مبتعمليش حاجة تغضب ربنا .
سألته بتوهان :
_ طيب تنصحني أبتدى إزاي من جديد وخاصة انى معايا ولدين لايمكن هسيبهم أبداً أيا كانت الظروف.
تنهد براحة نظرا لأنه على مشارف إقناعها براحتها :
_ أنصحك بأنك لو جت لك فرصة كويسة مع راجل محترم ومتدين يعرف ربنا وابن ناس توافقى بس بشروطك وأولهم ولادك وتانيهم شغلك مانتي مش هتتنازلى عن حلمك للمرة التانية .
تلج الذكريات المحزنة كالمطارق في صدرها وقالت بيقين:
_ أكيد طبعاً دي أول حاجة هطلبها وأمن عليها كمان ،
وتابعت حديثها وهي تفرك يداها بتوتر:
_ طيب ايه رأيك لو كان الراجل ده مستر مالك ؟
انفرجت أساريره بسعادة تلقائية وأجابها بموافقة:
_ يازين ماختارتى راجل محترم وشهم وجدع وابن ناس وظروفه تنفع ظروفك جدا ،
واسترسل حديثه مستفسرا بخفة:
_ احكي لي كل حاجة ودلوقتي حالا حكم أنا بعشق حكايات العشق والغرام وخاصة الممنوعين.
ابتسمت بشدة علي دعابته وهتفت بعيون التمعت بالحب فور حديثها عنه:
_ تقريبا حبنى واتعلق بيا من أول ماشافني ومش بس كدة من قريب اعترف لى بحبه ومش عايزة أقول لك بقى محاصرنى في كل مكان وحتى التليفون .
_ الله الله ياست ريم ده انتى عيونك لمعوا وبيطلعوا دباديب أول ماجت سيرته …. جملة دعابية نطقها ذاك الرحيم بخفة لطيفة .
أحست بالحرج الشديد رغم أنه يداعبها إلا أنها خجلت بشدة وأردفت بتحذير:
_ والله لو مابطلت طريقتك دى لا هقوم أسيبك وأمشي يارحيم .
ضحك بشدة على خجلها وأردف بنفس الخفة:
_ خلاص ياستي متبقيش أفوشة كدة خدى وادى معايا ،
واسترسل حديثه مشيرا إلى هاتفها :
_ يالا امسكي التليفون حالا وقولي له إنك موافقة تقعدى معاه قعدة مبدئية تعرفوا فيها ظروف بعض واللى فيه الخير يقدمه ربنا .
اعترضت على كلامه بشدة :
_ ايه ده أكلم مين مش بالسرعة دي اهدى كدة .
خطف الهاتف من أمامها قائلا بتهديد:
_ هو انتو كدة الستات تمـ,ـوتوا في المحايلة وتبقى نفسكم في الحاجة وتتمنعوا وأنتن الراغبات ،
واسترسل بوعيد :
_ هتكلميه ولا أبعت له أنا رسالة دلوقتي من على تليفونك ومش عايزة أقول لك بقى هتبقى رسالة غرامية بحتة أبل بيها ريق الراجل اللي نشفتيه معاكي .
مطت شفتيها باعتراض وأردفت بمحايلة:
_ لااااا بالله عليك ماتعمل كدة وأنا خلاص هكلمه .
تحدث شارطا:
_ هتكلميه دلوقتي وقدامي .
أمائت برأسها بموافقة وهي تبتسم ،
أعطاها الهاتف وبيدين مرتعشتين طلبت رقمه ولم تنتظر أكثر من رنتين حتي أجابها قائلا:
_ مش مصدق نفسي والله ريم هانم المالكي بتتصل بيا بذات نفسها ده بايني القمر طلع بالنهار وأنا مش واخد بالى .
أحس رحيم بخجلها الشديد وأشار إليها بتشجيع أن تستمر في الحديث ،
ابتلعت أنفاسها بصعوبة بالغة وألقت كلماتها :
_ أنا موافقة نقعد مع بعض مبدئياً كدة واللي عايزه ربنا هو اللي هيكون .
قالت كلماتها وأغلقت الهاتف فوراً وصارت تتلفت حولها يميناً ويساراً من شدة خجلها .
______________________________
انتهى البارت
بين الحقيقة والسراب
بقلمي فاطيما يوسف